Grupu Enkaregadu di Óbra é un grupu pikinoti di kristons maduru ki ta orienta Tistimunhas di Jeová na mundu interu. Es ta faze kel-li di dôs manera:

•   Es é responsável pa pripara kumida spritual ku bazi na Bíblia ki nu ta resebe através di publikasons, runions i skólas di Tistimunhas di Jeová. — Lucas 12:42.

•   Es ta organiza trabadju di pregason di Tistimunhas di Jeová na mundu interu i es ta disidi modi ki ta uzadu kes kontribuison ki nos organizason ta resebe.

 Grupu Enkaregadu di Óbra ta imita izénplu di ‘apóstlus i kes ansion’ na Jiruzalen na primeru séklu, ki ta tomaba disizons inportanti pa djuda tudu irmons na kongregason. (Atos 15:2) Sima kes ómi fiel la, kes irmon ki ta faze párti di Grupu Enkaregadu di Óbra é ka xéfi di nos organizason. Es ta djobe orientason na Bíblia i es ta rekonhese ma Jeová Deus skodje Jizus pa ser kabésa di kongregason. — 1 Coríntios 11:3; Efésios 5:23.

 Kes irmon ki ta faze párti di Grupu Enkaregadu di Óbra é David Splane, Gage Fleegle, Geoffrey Jackson, Gerrit Lösch, Jeffrey Winder, Kenneth Cook, Mark Sanderson, Samuel Herd i Stephen Lett. Es ta sirbi na Sédi Mundial na Warwick, Nova York, na Mérka.

 Grupu Enkaregadu di Óbra kria 6 kumison pa kuida di txeu ária di nos trabadju, i kada un di kes irmon ki ta faze párti di Grupu Enkaregadu di Óbra ta sirbi na un ô más di kes kumison.

•   Kumison di Kordenadoris: Es ta kuida di asuntus ki ten aver ku lei, i es ta djuda nos irmons óras ki kontise dizastris, óras ki Tistimunhas di Jeová ta pirsigidu pamodi ses fé, i es ta kuida di kes asuntu urjenti ki ta afeta Tistimunhas di Jeová.

•   Kumison di Pesoal: Es ta kuida di tudu kes kuza ki família di Betel ta meste.

•   Kumison Editora: Es é responsável pa idison i distribuison di publikasons ki ten bazi na Bíblia, konstruson di Salons di Reinu, skritórius di traduson i prédius di Betel.

•   Kumison di Sirvisu: Es ta organiza nos trabadju di prega ‘notísia sábi di Reinu’. — Mateus 24:14.

•   Kumison di Ensinu: Es é responsável pa pripara material pa inxina ki nu ta resebe através di runions, di skólas i tanbê através di prugramas di audiu i vídiu.

•   Kumison di Redason: Es é responsável pa pripara kes publikason ki ta inprimidu, kes publikason ki ta sta na jw.org i tanbê pa traduson di kes publikason li.

 Alén di tudu kes trabadju ki Grupu Enkaregadu di Óbra ta faze através di kes kumison li, tudu simana es ta faze runion pa sabe kuzê ki organizason sta meste. Na kes runion li, kes irmon ta pâpia sobri kuzê ki Bíblia ta fla, i es ta dexa spritu santu di Deus orienta-s, pa es pode toma kes midjór disizon. — Atos 15:25.

 Es é irmons di kunfiansa ki ta djuda kes kumison di Grupu Enkaregadu di Óbra. (1 Coríntios 4:2) Kes irmon li ta uza ses spiriénsia pa djuda kes kumison di Grupu Enkaregadu di Óbra. Kada un di es diziginadu pa trabadja ku un kumison i es ta sisti kes runion ki kumisons ta faze tudu simana. Es ka ta toma disizons, má es ta da konsedjus i es ta djobe si kes kumison sta ta sigi kes disizon ki tomadu. Tanbê es ta sta sienti na rezultadus di kes disizon ki tomadu. Grupu Enkaregadu di Óbra ta dizigina-s pa vizita irmons na txeu párti di mundu i tanbê pa es faze diskursu na prugramas spritual sima runions anual i formatura di Jiliádi.