Régras di privasidadi
AVIZU INPORTANTI: ÓRAS KI BU TA UZA NOS SITE I TUDU KES APLIKATIVU KI STA LIGADU KU EL KI WATCHTOWER BIBLE AND TRACT SOCIETY OF NEW YORK, INC. TA OFERESE I/Ô SI BU DA-NU KALKER DI BUS INFORMASON PESOAL, BU STA TA MOSTRA MA BU TA KONKORDA MA NU PODE UZA KES INFORMASON PA KES OBIJETIVU I DI KES MANERA KI STA NA KES RÉGRA DI PRIVASIDADI KI STA LI DIBAXU I DI AKORDU KU TUDU LEIS I RÉGRAS ATUALIZADU SOBRI INFORMASONS PESOAL.
Régras jeral di privasidadi
Odja tanbê
RUSPETU PA BU PRIVASIDADI
Nu ta proteje i ruspeta bu privasidadi. Es Régra li ta mostra pasus ki nu ta da, pa nu uza kalker di bus informason ki nu ta tra ô ki bu ta da-nu na nos site i na tudu kes aplikativu ki sta ligadu ku el ki Watchtower Bible and Tract Society of New York, Inc. (“Watchtower”) ta oferese. Óras ki bu entra na nos site, alguns informason di bo ta fika na undi ki nu ta guarda informasons. Nu ta rekonhese ma nu debe guarda kes informason suguru i informa-u modi ki es ta ser uzadu. Bu pode skodje si bu ta da-nu ô nau bus informason pesoal. Na es Régra, palavras “informason pesoal” é kuzas sima bu nómi, email, na undi ki bu ta mora, bu nunbru di tilifóni i otus informason ki ta uzadu pa identifika-u. Palavra “site” ta inklui kel site li i otus site ki é di nos, sima aplikativus apps.pr418.com, ba.pr418.com, stream.pr418.com, i wol.pr418.com.
INFORMASONS SOBRI KENHA KI TA KONTROLA BUS INFORMASON
Es site i tudu kes aplikativu ki sta ligadu ku el é di Watchtower, ki é un organizason na Nova York ki ka ta faze nogósiu, má el ta apoia trabadju ki Tistimunhas di Jeová ta faze i ses prugrama pa inxina Bíblia. Si bu disidi di bu livri vontadi abri un kónta, faze un kontribuison, pidi un studu di Bíblia di grasa ô faze kalker otu kuza ki bu ten ki da bus informason, bu sta ta konkorda ku nos régras di privasidadi, i tanbê bu sta ta konkorda ma bus informason pode ser guardadu na kes sirvidor ki sta na Mérka i ma Watchtower i otus organizason ki ta apoia trabadju ki Tistimunhas di Jeová ta faze na txeu país pode toma, prosesa, manda i guarda bus informason pesoal, óra ki mestedu pa faze kuzas ki bu pidi. Nos relijion ta trabadja na mundu interu ku ajuda di organizasons ki sta na txeu país. Di akordu ku lei di proteson sobri informasons, kes organizason na kes país pode ser kongregasons, skritórius di filial i otus.
Ken ki ta kontrola bus informason pesoal, ta dipende di kuzê ki bu sta djobe na nos site. Pur izénplu, si bu faze un kontribuison pa un kongregason ô filial di otu país, bu nómi i bus informason ta mandadu pa kel lugar óras ki bu sta faze kel kontribuison. Otu izénplu é si bu pidi un studu di Bíblia, bu nómi i bus informason di kontatu ta mandadu pa un filial ô kongregason di Tistimunhas di Jeová na país ki bu sta, pa es pode vizita-u.
Pa djuda-u, si na país ki bu sta, ten leis sobri proteson di informasons, bu pode atxa kes informason di kontatu di kel país na pájina di Kontatus pa proteson di informasons.
SUGURANSA I PROTESON DI INFORMASONS
Pa nos, suguransa i proteson di informason é un asuntu sériu. Nu ta uza kes manera más suguru pa nu guarda i proteje bus informason pesoal pa algen ki ka ten autorizason ka odja-s, pa ka uza-s ô divulga-s di manera mariadu, pa ka mudadu sen autorizason, ô pa es ka distruídu di manera ki lei ka ta permiti ô pa ka perdedu sen krê. Tudu kenha ki ta uza bus informason pesoal ô kalker otus site ki resebe bus informason ten obrigason di ka divulga bus informason. Nu ta fika ku bus informason sô pa kel ténpu ki nu meste pa kunpri kel obijetivu ki nu toma-s ô pa nu kunpri algun lei sobri informasons ki nu debe da ô sobri kantu ténpu ki nu debe guarda-s.
Nu ta proteje bus informason pesoal óras ki nu ta uza alguns tipu di enkriptason sima TLS (Transport Layer Security). Nu ta uza sistéma di konputador ku régras di asésu limitadu i ki ta sta na lugaris ku proteson fíziku, eletróniku i ku medidas di suguransa pa garanti ma ken ki ka ten direitu ka ta odja bus informason i pa proteje kes informason ki nu ta resebe. Tanbê nu ta mante un nível altu di suguransa pa inpidi otus algen di uza bus informason.
KES MENÓR DI IDADI
Si di akordu ku lei di país ki bu sta ta uza nos site, abo é menór di idadi, sô bu pode da-nu bus informason ku autorizason di bu pai ku bu mai ô otu algen responsável pa bo. Si bo é pai ô mai ô responsável i bu ta dexa kel menór da-nu se informason pesoal na kel site li, kel-la krê fla ma bu ta konkorda ku nos régras di uzu di site pa kes menór di idadi.
ÓRAS KI BUS INFORMANSON TA BAI PA OTUS SITE
Alvês kel site li i tudu kes aplikativu ki sta ligadu ku el pode sta ligadu ku otus site. Kel-li pode inklui link pa un otu site ki ta presta sirvisu (pur izénplu, pa pode prenxe formuláriu na internet). Bu ta odja lógu ma bu sta na un otu site, pamodi site é diferenti i bara di inderésu di navegason tanbê é diferenti. Tanbê, bu pode resebe emails ô mensajéns di otus site di akordu ku informason ki bu sta djobe na kel site li, i kel-li ta inklui avizus sobri kes informason ki bu staba ta buska. Manenti nu ta djobe si kes site sta ta ruspeta kes régra di suguransa ki nu ta uza pa nu garanti proteson di informasons. Má, nu ka ta kontrola régras di uzu, modi ki es ta prugrama ses site, régras di privasidadi i régras di kontratu di aplikativus i sirvisus di internet di otus site ki nu ta uza na nos site. Pamodi kel-li, uzu di aplikativus i sirvisus di internet di otus site ten ki ruspeta kes régra di uzu atualizadu i régras di kontratu di kes otu site. Dja ki es ka ta informa-nu sobri kes atualizason di ses régras, nton favor, djobe kes régra antis di uza sirvisus di kes otu site. Si bu ten algun dúvida sobri modi ki sirvisu di otus site ta funsiona, favor lé ses régra di privasidadi na ses site.
Si bu uza sirvisus di Google Maps na nos site bu ten ki ruspeta kes Régra di privasidadi di Google. Nu ka ta pode kontrola kes aplikativu, modi ki es ta prugrama ses site i Régras di sirvisu di Google. Pur isu, óras ki bu ta uza sirvisus di Google Maps na nos site bu ten ki ruspeta Kes otu régra di sirvisu di Google Maps/Google Earth. Dja ki es ka ta informa-nu sobri kes atualizason di ses régra, nton favor, djobe kes régra antis di uza sirvisus di Google Maps. Si bu ka seta kes régra di sirvisu ki es ta poi, ka bu uza sirvisus di Google Maps.
AVIZU DI MUDANSAS DI RÉGRAS DI PRIVASIDADI
Nu ta sta sénpri ta midjora i ta poi novus funson, feraméntas i sirvisus na nos site i na tudu kes aplikativu ki sta ligadu ku el. Pamodi kes mudansa li i mudansas di lei i mudansas di tekinolojia, nos uzu di informasons alvês pode muda. Óras ki nu meste faze kalker mudansa di régras, bu ta fladu na kel pájina li, kal ki é informason di bo ki nu uza i modi ki nu ta uza-l.
SCRIPT ATIVU Ô JAVASCRIPT
Nu ta uza scripts pa midjora nos site i tudu kes aplikativu ki sta ligadu ku el. Kel tékinika di scripts ta djuda-nu responde bus pididu más rápidu. Kes script ka ta uzadu na kel site i na tudu kes aplikativu ki sta ligadu ku el pa instala un software na bu konputador ô pa tra bus informason sen bu autorizason.
Pa nos site, Script ativu ô JavaScript debe sta na bu navegador pa alguns párti di site funsiona dretu. Txeu prugrama di navega na internet ta dexa-u ativa ô dizativa scripts óras ki bu ta entra na alguns site. Djobe ajuda di bu prugrama di navega na internet pa bu sabe modi ki bu ta ativa script pa alguns site.