“Pamodi palavra di Deus é bibu i el ten puder, i el é más moladu di ki kalker spada ki ta korta pa dôs ladu i el ta entra fundu ti dividi alma ku spritu, i osu ku tutanu, i el ta pode mostra kes kuza ki nu ta pensa i dizejus di nos korason.” — Ebreus 4:12, Traduson di Mundu Novu.

 Na Bíblia nu ta atxa kel mensajen di Deus pa nos. El ten puder di mostra kes kuza ki nu ta pensa di verdadi i nos intenson. Kel mensajen ten puder di muda vida di algen pa midjór.

 “Palavra di Deus é bibu”. “Palavra di Deus” krê fla kes promésa di Deus, ô se vontadi, ki sta na Bíblia. a Un kuza inportanti ki ta faze párti di se vontadi é pa kes algen obidienti vive pa tudu ténpu na téra unidu i ku pas di verdadi. — Génesis 1:28; Salmo 37:29; Apokalipse 21:3, 4.

 Modi ki palavra di Deus, ô se vontadi, é “bibu”? Primeru, el ten puder di influensia korason di kes ki ta seta-l, el ta da-s speransa i un obijetivu na vida. (Deuteronómio 30:14; 32:47) Tanbê, kes promésa di palavra di Deus é “bibu” pamodi kel Deus bibu sta ta trabadja pa kunpri tudu se promésa. (Juan 5:17) Diferenti di nos, Deus ka ta faze un promésa pa dipôs el skese di el ô pa el atxa ma el ka ta konsigi kunpri-l. (Números 23:19) Se palavra ‘ka ta volta pa [el] sen rezultadus’. — Isaías 55:10, 11.

 “Palavra di Deus. . . ten puder”. Kes palavra “ten puder” tanbê pode traduzidu pa “txeu puder”, ô ma el ta “kunpri kalker [palavra] ki el krê pa kunpri.” Pur isu, kalker kuza ki Jeová b Deus fla ô ki el promete, nu ten serteza ma el ta kunpri. (Salmo 135:6; Isaías 46:10) Na verdadi, Deus ta kunpri se promésa di un manera ki nunka nu ka ta imajina. — Efézius 3:20. c

 Tanbê palavra di Deus “ten puder” pamodi el ta djuda kes algen ki ta da-l valor midjora ses vida i ses manera di ser. Kes kuza ki Deus ta inxina ta bira ta faze párti di ses vida. Es ta influensia manera di pensa di kes algen, ses vida i ses obijetivu. (Romanus 12:2; Efézius 4:24) Di kel manera li, “palavra di Deus. . . sta ta djuda” kes ki ta seta-l ma el ben di Deus. — 1 Tesalonisensis 2:13.

 “Palavra di Deus. . . é más moladu di ki kalker spada ki ta korta pa dôs ladu”. Palavra di Deus é más moladu di ki kalker spada pamodi el ten puder di entra na nos. Mensajen di Deus pode toka nos korason, ki é kel algen ki nos é di pa déntu, di un manera ki ninhun di kes kuza ki ómis ta inxina ka ta pode faze. É kel-li ki Ebreus 4:12 ta kontinua ta fla.

 “Palavra di Deus. . . ta entra fundu ti dividi alma ku spritu, i osu ku tutanu”. Na Bíblia, “alma” pode krê fla kel algen ki ta parse ma nos é, i “spritu” krê fla kel algen ki nos é di pa déntu. (Gálatas 6:18) Nu pode fla ma “palavra di Deus” ta entra déntu “tutanu”, ki é nos sentimentus i pensamentus más fundu. Óras ki palavra di Deus ta mostra kenha ki nos é di pa déntu, di un manera ki ningen ka ta pode odja, kes kuza ki Jeová ta inxina pode pô-nu ta midjora nos vida. Kel-li ta traze alegria pa nos Kriador i pa nos tanbê.

 “Palavra di Deus. . . ta pode mostra kes kuza ki nu ta pensa i dizejus di nos korason.” Manera ki un algen ta reaji óras ki el lé palavra di Deus pode mostra se pensamentus ti se dizejus ô intensons ki ta influensia se manera di konporta. Pur izénplu, óras ki un algen reaji di un manera puzitivu, el ta faze mudansas ki el meste na se vida i el ta mostra ma el é umildi i sinseru. El krê agrada se Kriador. Má si el tenta atxa fadja na palavra di Deus, el pode mostra un atitudi mariadu, sima orgulhu i ma el ta pensa sô na se kabésa. Talvês el ta tenta justifika kes konportamentu ki Deus ka gosta. — Jeremias 17:9; Romanus 1:24-27.

 Un óbra di referénsia ta fla ma palavra di Deus “pode entra na kel párti más fundu di nos.” Ka ten ninhun párti déntu nos ki Deus ka ta pode odja i ki se palavra ka ta pode mostra. Ebreus 4:13 ta fla: “Tudu kuza sta nu i klaru dianti di odju di kel ki nu ten ki presta kónta.”

 Apóstlu Paulu skrebe livru di Ebreus pa vólta di anu 61 D.K. Livru di Ebreus é un karta ki Deus orienta Paulu pa skrebe pa kes kriston judeu na Jiruzalen i na Judea.

 Na kapítlus 3 i 4, Paulu mostra modi ki izénplu di kes israelita na ténpu antigu ta sirbi di avizu pa kristons. (Ebreus 3:8-12; 4:11) Jeová promete salva kes israelita di skravidon i da-s un téra undi ki es ta ba ‘moraba na suguransa’. (Deuteronómio 12:9, 10) Má, kel jerason di israelitas ki sai di Ijitu txeu bês ta mostraba falta di fé na kes promésa di Deus i sénpri es ta dizobideseba se mandamentus. Pur isu, es ka ‘entra na diskansu di Deus’ i es ka goza di un bon amizadi ku Deus. Má, es móre na dizértu. Sikrê ses disendenti erda kel téra ki Deus prometeba es, es tanbê es kumesa ta dizobidese Jeová. Ku ténpu, kel-li traze txeu sufrimentu pa kel nason. — Neemias 9:29, 30; Salmo 95:9-11; Lukas 13:34, 35.

 Paulu splika ma kristons debe prende ku kel mau izénplu di kes israelita ki foi infiel. Diferenti di es, nu pode entra na diskansu di Deus óras ki nu ta obi ku se palavra i ten un fé fórti na se promésa. — Ebreus 4:1-3, 11.

 Odja kel vídiu li pa bu sabe más sobri livru di Ebreus.