Antis di un barboléta kumesa ta bua, el ta meste pa kalor di sól kenta se musklus. Má óras ki ka sta sól, barboléta di kobi ta konsigi bua más faxi di ki otus barboléta. Modi ki el ta konsigi faze kel-la?

 Pensa na kel-li: Txeu tipu di barboléta ta toma sól ku ses aza fitxadu ô abértu na orizontal, antis di kumesa ta bua. Má, barboléta di kobi ta fika paradu ku ses aza na puzison na fórma di V. Piskizas ta mostra ma pa lus di sól panha dretu na ses aza, el meste pô-s afastadu di kunpanheru na fórma di V. Na kel puzison la, kalor di sól ta bai dirétu pa kel párti ki ten kes musklu ki ta pô-l ta bua. Asi, ses aza ta fika kenti i el ta konsigi bua.

 Alguns piskizador di universidadi di Exeter na Inglatéra, studa modi ki es podia kopiaba kel puzison na fórma di V di kel barboléta di kobi pa es faze painel solar más midjór. Kantu es faze si, es diskubri ma kuantidadi di inerjia ki es produzi omenta pa kuazi 50 pursentu.

 Tanbê kes piskizador odja ma párti di riba di aza di barboléta di kobi ta límia txeu sima spedju. Nton es kôpia kel puzison na fórma di V di barboléta i tanbê kel párti ki ta límia txeu. Asi es konsigi faze painel solar más lébi i más midjór. Pamodi kes rezultadu li, profesor Richard ffrench-Constant ki é ménbru di kel ekipa ki faze kes piskiza, fla ma barboléta di kobi fazedu “pa panha lus di sól di midjór manera.”

 Kuzê ki bu ta atxa? Puzison na fórma di V di barboléta di kobi ben di ivoluson? Ô tevi un algen ki faze-l?