Nau, tudu relijion é ka igual. Na Bíblia ten txeu izénplu di relijions ki ka ta agrada Deus. Es sta divididu na dôs tipu.

1: Relijions ki ta adora deus falsu

 Bíblia ta fla ma adora deus falsu é ‘kuzas sen valor i ki ka ta sirbi pa nada’. (Jeremias 10:3-5; 16:19, 20) Jeová a Deus fla nason di Israel na ténpu antigu: ‘Ka bu ranja otus deus alén di mi.’ (Êxodo 20:3, 23; 23:24) Kantu israelitas ta adoraba otus deus, ‘Jeová ta fikaba xatiadu.’ — Números 25:3; Levítico 20:2; Juízes 2:13, 14.

 Deus ka muda se opinion sobri kes adorason ki ta fazedu pa kes ‘ki ta txomadu deus.’ (1 Coríntios 8:5, 6; Gálatas 4:8) El ta pidi pa tudu kes ki krê adora-l pa para di djunta ku kes ki ta sigi relijion falsu. Na Bíblia el ta fla: ‘Nhos sai di ses meiu i nhos sipara di es.’ (2 Coríntios 6:14-17) Si tudu relijion éra igual i ta lebaba nos pa Deus, nton pamodi ki Deus da kel órdi li?

2: Relijions ki ta adora Deus verdaderu di un manera ki ka ta agrada-l

 Alvês, na ses adorason pa Deus, israelitas ta fazeba kuzas ki otus algen ta kustumaba faze na adora deus falsu. Má Jeová ka seta kel kustumu di mistura relijion verdaderu ku falsu. (Êxodo 32:8; Deuteronómio 12:2-4) Jizus kondena kes xéfi di relijion di se ténpu pamodi manera ki es ta adoraba Deus. Es ta krê parseba ma es éra relijiozu, má es éra finjidus i es ‘ka ta fazeba kes kuza más inportanti di Lei, ki é, justisa, mizerikórdia i ser fiel.’ — Mateus 23:23.

 Oji, di mésmu manera, pesoas sô ta konsigi txiga na Deus através di un relijion ki ta inxina verdadi. É na Bíblia ki nu ta atxa verdadi. (João 4:24; 17:17; 2 Timóteo 3:16, 17) Kes relijion ki ta inxina kuzas ki ka sta na Bíblia, na verdadi ta afasta pesoas di Deus. Txeu algen ta atxa ma ensinus sima — Trindadi, ma alma ka ta móre i inférnu di lumi, sta na Bíblia. — Má kes ensinu li, ben di adorason ki ta fazedu pa deus falsu. Kel tipu di adorason li, ka ten valor, pamodi es ta sigi tradisons di relijion envês di leis di Deus. — Marcos 7:7, 8.

 Deus ta ôdia finjimentu ki ten na relijions. (Tito 1:16) Pa djuda pesoas bira amigu di Deus, un relijion ka debe sigi sô serimónias i tradisons, má djuda pesoas muda ses manera di vive. Pur izénplu, Bíblia ta fla: ‘Si un algen ta atxa ma el é relijiozu, má el ka ta kontrola se língua, el sta ta ngana se própi korason i se adorason ka ten ninhun valor. Kel tipu di relijion ki é puru i sen mantxa pa nos Deus i Pai, é kel-li: kuida di órfus i di viúvas na ses difikuldadi, i mante sen mantxa di mundu.’ (Tiago 1:26, 27; nótas) Bíblia ta fla ‘relijion ki é puru’ pa mostra ma kel tipu di adorason li é sen finjimentu.