Sin, Diabu ta izisti. El é ‘governanti di mundu’, un anju ki bira mau i ki rabela kóntra Deus. (João 14:30; Efésios 6:11, 12) Bíblia ta uza alguns titlu ki ta djuda-nu ntende kal ki é manera di ser di Diabu:

•   Satanás, ki siginifika ‘opozitor’ ô algen ki ta fika kóntra otu algen. — Jó 1:6.

•   Diabu, ki siginifika ‘algen ki ta labanta alébi’ ô algen ki ta konta mintira pa prujudika otu algen. — Apocalipse 12:9.

•   Kóbra, ki na Bíblia ta reprizenta ‘kel algen ki ta ngana otus algen.’ — 2 Coríntios 11:3.

•   Tentador. — Mateus 4:3.

•   Mintirozu. — João 8:44.

Diabu é ka un kualidadi mau

 Alguns algen ta atxa ma Satanás ô Diabu é un kualidadi ô un ladu mau déntu di nos. Má Bíblia ta mostra ma Deus ku Satanás pâpia ku kunpanheru. Deus é perfetu, pur isu el ka pode pâpia ku un ladu mau déntu di el. (Deuteronómio 32:4; Jó 2:1-6) Satanás tanbê krê poba Jizus ta kai na tentason, má Jizus éra un algen ki ka tinha ninhun pekadu. (Mateus 4:8-10; 1 João 3:5) Nton, Bíblia ta mostra ma Diabu é un algen ki ta izisti mê, el é ka un kualidadi ki ta reprizenta un ladu mau déntu di nos.

 Nu ka debe fika dimiradu pamodi txeu algen ka ta kridita ma Diabu izisti mê. Pamodi? Pamodi Bíblia ta fla ma Diabu ta ngana algen pa el txiga na kel ki el krê. (2 Tessalonicenses 2:9, 10) El ta poi otus algen ta kridita ma el ka izisti. Kel-li é un di kes armadilha ki el gosta di uza. — 2 Coríntios 4:4.

  Stória inventadu: Lúsifer é otu nómi di Diabu.

 Verdadi: Kel palavra ebraiku ki alguns Bíblia ta traduzi pa ‘Lúsifer’ krê fla ‘brilhanti’. (Isaías 14:12) Kes versíklu antis i dipôs ta mostra ma kes rei di Babilónia éra orgulhozu dimás, pur isu Deus ta ba rabaxaba es. (Isaías 14:4, 13-20) Kel titlu ‘brilhanti’ uzadu pa faze trósa di kes rei di Babilónia dipôs ki ses govérnu kaba.

  Stória inventadu: Satanás ta trabadja pa Deus, óras ki Deus ta julga un algen.

 Verdadi: Diabu é inimigu di Deus, el é ka sérvu di Deus. Satanás ô Diabu ta fika kóntra kes ki ta sirbi Deus i el ta pâpia mal di es. — 1 Pedro 5:8; Apocalipse 12:10.