Ti ki enfin, kes ómi para di pâpia. Talvês úniku son ki ta daba pa obi éra kel barudju di béntu kenti ki ta binha di dizértu di Arábia. Dipôs di kel diskuson ki nunka más ka ta kababa, Jó dja staba txeu kansadu i el ka tinha más nada pa fla. Imajina Jó paradu ta djobe un bês bai pa kes três ómi ki el konxeba, Elifás, Bildadi i Zofar, sima si el staba ta dizafia-s pa es fla más algun kuza. Nen es ka kria djobe pa Jó pamodi es staba diziludidu ku ses rasusinu, ku ses palavra sen valor i kruel ki ka sirbi pa nada. (Jó 16:3) Jó staba más disididu di ki nunka na kontinua ta difende se lialdadi.

 Kuza más inportanti pa Jó éra mante lial i talvês kel-li éra úniku kuza ki restaba el. Dja el perdeba se rikéza, tudu se 10 fidju, kel apoiu i ruspetu di se amigus i vizinhus i el kaba pa perde se saúdi. Pamodi kel duénsa, se péli fika sukuru, xeiu di frida i di bitxu. Ti se bafu staba ta txera fédi. (Jó 7:5; 19:17; 30:30) Má, kes kuza kruel ki kes três ómi fla Jó, pô-l ta xinti txeu xatiadu. El fika konsentradu na prova ma el é ka éra un pekador sima es staba ta fla. Kes últimu kuza ki Jó fla, pô-s ta kala bóka. Ti ki enfin, ses fonti di palavras duru seka. Má, kel dór ki Jó staba ta xinti, kontinua simé. Ti inda el staba ta meste txeu di konsolu!

 Ta da pa ntende pamodi ki Jó ka staba ta pensa di manera ikilibradu. El mesteba di orientason i di koreson. Tanbê el mesteba di un algen pa da-l konsolu i nkoraja-l di verdadi. É kel-li ki kes três ómi devia faze. Dja bu kustuma xinti txeu falta di orientason i di konsolu? Dja bu kustuma xinti diziludidu ku kes algen ki bu ta atxaba ma éra bus amigu? Óras ki bu prende modi ki Jeová djuda se sérvu Jó i modi ki Jó reaji, kel-li pode da-u speransa i konsedjus ki ta djuda-u.

 Gósi, stória di Jó ta traze un surpréza. Tinha más un algen ki staba pértu. El éra un ómi jóven, ki txomaba Eliú. El staba la duránti tudu kel ténpu ki kes ómi más grandi staba ta pâpia. El fika ketu ta obi, má el ka gosta nada di kel ki es staba ta fla.

 Eliú staba xatiadu ku Jó. El fika diziludidu pamodi Jó, ki éra un ómi justu, dexa preson di kes ómi pô-l ta tenta ‘prova ma éra el ki tinha razon, envês di Deus.’ Má Eliú poi na lugar di Jó di korason, pa el konsigiba ntende kel ki Jó staba ta xinti. El odja ma Jó éra un algen sinseru ki mesteba txeu di konsolu i di konsedju dadu ku amor. Nu ka ta fika spantadu pamodi Eliú perde paxénxa ku kes três amigu falsu di Jó! Dja el obiba es ta fla kuzas ki mágua Jó, ta tenta poi se fé i lialdadi bira más fraku i ta tenta suja se nómi. Piór inda, kes kuza ki es fla da ideia ma Deus é mau. Dipôs di tudu kel ki Eliú obi, el xinti ma el mesteba fla algun kuza mê! — Jó 32:2-4, 18.

 El fla: ‘Ami é jóven, i nhos dja nhos é algen grandi. Pur isu N ruspeta nhos i N fika kaladu i nen N ka tenta fla nhos kel ki N sabe.’ Má el ka staba ta aguenta más fika kaladu. Inda el fla: ‘Sô idadi, ka ta poi ningen ta ten sabedoria, nen é ka sô algen di idadi ki sabe kuzê ki é dretu.’ (Jó 32:6, 9) Eliú prova ma kel-li é simé dipôs ki el pâpia duránti txeu ténpu. Se manera di pâpia éra txeu diferenti di kes di Elifás, Bildadi i Zofar. Eliú garanti Jó ma el ka ta trataba el di manera ki el ta xintiba inda más piór i nen el ka ta fazeba el más preson. Tanbê el trata Jó ku ruspetu pamodi el txoma-l pa se nómi i el fla Jó ma kes três ómi falta-l ruspetu. a Ku ruspetu, Eliú fla: ‘Gósi, Jó, favor, obi nhas palavra’. — Jó 33:1, 7; 34:7.

 Eliú da Jó konsedjus sinseru. El fla: ‘N obi-u ta fla: “Ami é puru, N ka faze nada mariadu; N sta linpu, N ka da ninhun fadja. Má Deus ta atxa motivus pa fika kóntra mi’”. Eliú bai dirétu ti raís di kel prubléma i el pergunta Jó: ‘Bu ten tantu sertéza si ma bu sta sértu óras ki bu fla: “Ami é más justu di ki Deus”?’ El ka podia dexa pasa un rasusinu di kel-li. Eliú fla: ‘Bu ka ten razon óras ki bu ta fla kel-li’. (Jó 33:8-12; 35:2) Eliú sabia ma Jó staba ku txeu raiba pamodi tudu kes kuza ki dja el perdeba i pamodi manera ki kes se amigus falsu trata-l. Má Eliú aviza Jó: ‘Toma kuidadu pa raiba ka pô-u ta aji ku rankor’. — Jó 36:18.

 Kes kuza ki Eliú fla éra prinsipalmenti pa difende Jeová Deus. Ku palavras sinplis má ki ten txeu forsa, el splika un verdadi inportanti: ‘Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu! Kel Tudu-Poderozu ka ta faze justisa mariadu.’ (Jó 34:10, 12) Pa Eliú da Jó un izénplu di justisa i mizerikórdia di Jeová, el lenbra-l ma Jeová podia kastigaba el pamodi kes palavra ki el fla sen pensa i ki ka mostra ruspetu pa Deus, má Jeová ka faze kel-la. (Jó 35:13-15) I envês di Eliú finji ma el tinha respósta pa tudu, el rekonhese ku umildadi: ‘Deus é mutu más grandi di ki kel ki nu ta pode ntende’. — Jó 36:26.

 Nbóra Eliú da Jó konsedju di manera dirétu, simé el kontinua ta mostra-l bondadi. El pâpia di un speransa rei di sábi kantu ki el fla ma un dia Jeová ta ben daba Jó saúdi otu bês. Deus ta ben flaba se sérvu lial: ‘Pa se karni bira más frésku di ki kel di un jóven; pa el torna volta pa kes dia ki el tinha forsa di juventudi.’ Un otu izénplu ki ta mostra bondadi di Eliú é ki envês di el pâpia el sô, ku amor el konvida Jó pa pâpia. El fla: ‘Pâpia, pamodi N krê prova ma bu sta sértu.’ (Jó 33:25, 32) Má Jó ka responde. Talvês kel konsedju mostra amor pa el i nkoraja-l di tal manera ki el ka xinti nisisidadi di difende se kabésa. Talvês ti el txora di alíviu kantu ki el odja ma Eliú éra un amigu ki ta preokupaba ku el di verdadi.

 Nu pode prende txeu ku kes dôs ómi fiel li. Ku Eliú nu ta prende modi ki nu pode da konsedju i konsola kes ki sta meste. Un amigu di verdadi ka ta dexa di fla sobri un éru gravi ô sobri un atitudi ki pode leba pa un situason prigozu. (Provérbios 27:6) Nu krê ser un amigu ki ta pâpia di manera klaru, má simé nu krê mostra amor i nkoraja kes ki sta meste, mésmu óras ki es pâpia sen pensa. I óras ki é nos mê ki meste di un konsedju si, izénplu di Jó pode lenbra-nu ma nu debe obi kel konsedju ku umildadi envês di ka da-l valor. Nos tudu nu ta meste di konsedju i di koreson. Si nu seta-s, es pode salva nos vida. — Provérbios 4:13.

 Eliú pâpia txeu bês di béntu, núven, strubon i raiu di séu. El fla kel-li sobri Jeová: ‘Nhos obi kel uma barudju di se vós ku atenson.’ Dipôs Eliú pâpia di un ‘tenporal ku béntu’. (Jó 37:2, 9) Ta parse ma timenti el staba ta pâpia, kontise un tenpistadi ki ba ta fika más fórti i ba ta txiga más pértu ti ki txiga na es. I dipôs kontise un kuza mutu más spetakular: Jeová pâpia! — Jó 38:1.

 Óras ki nu ta lé livru di Jó, nu ta fika kontenti óras ki nu ta txiga na kes párti ki ta pâpia di kes kuza ki Jeová fla Jó. Éra sima si un tenporal ku béntu di verdadi staba ta leba pa lonji tudu kes kuza falsu i sen sentidu ki Elifás, Bildadi i Zofar fla. Na komésu, Jeová nen ka pâpia ku kes ómi. El konsentra sô na Jó, el koriji se sérvu ki el ta amaba sima un pai ta koriji se fidju.

 Jeová sabia di dór ki Jó staba ta xinti. I el xinti péna di el. Sénpri el ta xinti si óras ki se fidjus ki el ta ama txeu ta sufri. (Isaías 63:9; Zacarias 2:8) Má tanbê el sabia ma Jó staba ta ‘pâpia sen konhisimentu’ i kel-li poi se prublémas ta fika más piór. Nton Jeová koriji Jó através di kes pergunta li: ‘Undi ki bu staba kantu ki N lansa lisérsi di Téra? Responde-m, si bu ta atxa ma bu ten ntendimentu.’ Na komésu di kriason, ‘kes stréla di palmanhan’, ki é kes anju di família di Deus, da-l lovor pamodi kes kuza ki el kria. (Jó 38:2, 4, 7) É klaru ki Jó ka ta konsigiba responde pamodi el ka sabia di ninhun di kes kuza li.

 Jeová kumesa ta pâpia sobri kuzas ki el kria. É sima si el leba Jó pa faze un vizita brévi na naturéza i el pâpia di kuzas ki oji é konxedu pa astronomia, biolojia, jiolojia i fízika. Jeová pâpia sobri alguns di kes animal ki ta staba na undi ki Jó ta moraba, sima lion, korbu, kabra di montanha, buru brabu, toru brabu, avestrús, kabalu, falkon, ágia, Biemoti (ki talvês é ipopotámu) i Leviatan (ki talvês é krokodilu). Fórti priviléjiu grandi obi Kriador di séu ku Téra ta faze un diskursu sobri naturéza! b

 Na undi ki Jeová krê txigaba ku tudu kel-li? Jó mesteba ten más umildadi. Jó staba ta reklama ma Jeová foi injustu ku el. Kantu el faze kel-li, el staba ta prujudika amizadi ki el tinha ku se Pai ki ta amaba el. Kel-li piora se situason inda más txeu. Pur isu Jeová pergunta-l monti bês undi ki el staba kantu ki El faze kes kuza rei di bunitu na séu ku Téra i si Jó ta konsigiba kuida di es i kontrola-s. Si Jó ka ta konsigiba kontrola nen kes kuza más sinplis di kriason di Jeová, modi ki el podia atxa ma el pode julgaba Deus? Manera di Jeová pensa i faze kuzas é ka mutu más midjór di ki kel ki Jó ta konsigiba ntende?

 Na tudu kel ki Jeová fla, el mostra kel grandi amor ki el tinha pa Jó. É sima ki el staba ta fla Jó: ‘Nha fidju, si N ta konsigi faze i kuida di tudu kes kuza li, bu ta atxa mê ma N ka ta kuida di bo? N ta bandonaba bo própi, tra-u bus fidju, bu suguransa i bu saúdi? Ami é ka kel úniku algen ki pode torna da-u kes kuza ki bu perde i kura bu dór ki é dimás?’

 Jó pâpia sô dôs bês pa responde kes pergunta ki Jeová faze-l. El ka fika ta diskuti ku Jeová ô ta da diskulpa. Ku umildadi, el rekonhese ma el sabia mutu poku i el rapende pamodi el fla kes palavra sen pensa. (Jó 40:4, 5; 42:1-6) Kel párti li é un di kes midjór izénplu ki ta mostra fé di Jó. Dipôs di tudu kuza ki el tevi ki aguenta, el kontinua ta ser un ómi ki tinha txeu fé. El seta di korason kel koreson ki Jeová da-l. Se izénplu ta pô-nu pergunta nos kabésa: ‘Óras ki N ta dadu konsedju i koreson, N ten umildadi pa N seta-s?’ Nos tudu nu meste kel tipu di ajuda li. Óras ki nu ta seta-l, nu ta imita fé di Jó.

 Dipôs Jeová faze kuzas pa alivia dór di Jó. El pâpia ku Elifás, ki talvês éra kel más grandi di kes três amigu falsu di Jó. Jeová fla: ‘Nha raiba sta kóntra bo i kóntra bus dôs amigu, pamodi nhos ka fla verdadi sobri mi, sima nha sérvu Jó faze.’ (Jó 42:7) Pensa na kes palavra li. Jeová staba ta fla ma tudu kuza ki kes três ómi fla éra mintira i ma tudu kuza ki Jó fla staba sértu? É klaru ki nau. c Má, tinha un diferénsa grandi entri Jó i kes ómi ki akuza-l. Kel dór ki Jó staba ta xinti i kes mintira ki es fla sobri el, kaba ku Jó. Pur isu, ta da pa ntende pamodi ki alguns bês el pâpia sen pensa. Má Elifás ku se dôs amigu ka staba ta pasa pa kes difikuldadi li. Es tinha un fé fraku, pur isu ki es pâpia di kel manera li di propózitu i ku orgulhu. Es ka sô ataka Jó, ki éra un ómi inosenti, má inda más piór é ki es falta Jeová ruspetu pamodi es pasa ideia ma el é un Deus duru i mau.

 Pur isu nu ka ta fika dimiradu ki Jeová fla kes ómi pa es faze un sakrifisiu ki ta kustaba es txeu. Es tinha ki sakrifikaba 7 bixéru i 7 karneru. Kel-li ka éra un kuza pikinoti, pamodi más tardi, na lei di Muizés, sakrifisiu di bixéru éra kel sakrifísiu ki saserdóti prinsipal ta daba si el fazeba un pekadu ki ta poba nason interu ku kulpa. (Levítico 4:3) Na lei di Muizés kel-li éra kel sakrifisiu más karu ki es ta fazeba. Alén di kel-li, Jeová fla ma el ta setaba ses sakrifisiu sô si primeru, Jó fazeba orason pa Jeová djuda-s. d (Jó 42:8) Di sertéza Jó xinti konsoladu kantu Jeová mostra kes ómi ma el ka éra un ómi injustu!

 Jeová tinha sertéza ma Jó ta fazeba kel ki el pidiba el i ma el ta purduaba kes ómi ki magua-l rei di txeu. Jó ka diziludi se Pai. (Jó 42:9) Próva más grandi di se lialdadi é kantu el obi ku Jeová. Un próva más fórti ki palavras. I pamodi kel-li, Jeová abênsua Jó rei di txeu.

 Jeová tevi ‘grandi konpaxon i el foi mizerikordiozu’ ku Jó. (Tiago 5:11) Di ki manera? Jeová torna da Jó se saúdi. Imajina modi ki Jó xinti kantu el da kónta ma se karni bira mê ‘más frésku di ki kel di un jóven’, sima Eliú flaba! Se família i se amigus gósi staba djuntu ku el, pa da-l apoiu ki el mesteba i alguns prezenti. Jeová da-l rikéza dôs bês más txeu di ki kel ki el tinha antis. I kel dór más grandi pamodi el perde se fidjus? Jó ku se mudjer xinti más konsoladu kantu es tevi más 10 fidju! Jeová faze un milagri pa Jó viveba más anu di vida. Jó vive más 140 anu i pamodi kel-li el odja kuatu jerason di se disendenti. Nu ta lé kel-li: ‘Nton, Jó móre, dipôs di un vida kunpridu i filís.’ (Jó 42:10-17) I na paraízu, Jó ku se mudjer ki el ta amaba txeu, ta ben sta djuntu ku se família ki ta inklui kes 10 fidju ki Satanás tra di es. — João 5:28, 29.

 Pamodi ki Jeová abênsua Jó txeu si? Bíblia ta responde: ‘Nhos obi ta fladu ma Jó aguenta firmi’. (Tiago 5:11) Jó aguenta firmi kantu el pasa pa un monti di difikuldadi ki maioria di nos ka ta pasa. Palavras ‘aguenta firmi’ ta mostra ma Jó faze más di ki sô pasa pa kes difikuldadi. El aguenta firmi ku se fé i se amor fórti na Jeová. Envês di el bira un algen duru ô guarda rankor, el kontinua ta púrdua kes ki magua-l di propózitu. Nunka el ka dexa di ten speransa i el proteje kel kuza ki tinha más valor pa el, ki éra se lialdadi pa Deus. — Jó 27:5.

 Kada un di nos nu meste aguenta firmi. Nu pode ten sertéza ma Satanás ta ben tenta dizanima-nu sima el faze ku Jó. Má si nu mante nos fé, nu kontinua umildi, nu kontinua dispostu pa púrdua otus i disididu na proteje nos lialdadi, nos tanbê nu ta pega riju na nos speransa. (Hebreus 10:36) Si nu kontinua lial sima Jó, nu ta dexa Satanás txeu xatiadu i nu ta dexa Jeová, nos Deus ki ta ama-nu, txeu filís!