AJUDA PA FAMÍLIA | PA PAI KU MAI
Modi ki bu pode ser un bon pai
Kal ki é papel di un pai?
Antis di bu fidju nase. Kel tipu di maridu ki bo é gósi ta mostra ki tipu di pai ki bu ta ben ser dipôs. Un livru a ki ta pâpia sobri papel di pai, ta fla:
“Un pai ki ta djuda se mudjer ki sta grávida faze kónpra, ki ta leba-l na dotor i ki ta odja se fidju na ekografia ô ta obi se korason ta bate, ten más xansi di djuda se mudjer i se bebé dipôs ki el nase.”
“N ka kria pa nha mudjer xintiba el sô timenti el staba grávida, pur isu N faze tudu kel ki N pode pa djuda-l. Ti nu organiza kuartu di bebé djuntu. Kel ténpu ki nu pripara kuzas pa resebe nos bebé foi spesial pa nos dôs.” — James.
Prinsípiu di Bíblia: “Ka nhos djobe sô nhos própi interesi, má nhos djobe interesi di otus algen tanbê.”— Filipensis 2:4.
Dipôs ki bu fidju nase. Bu pode kria amizadi ku bu fidju óras ki bu ta brinka ku el i ta karega-l. Djuda bu mudjer kuida di bebé tanbê. Kel ajuda ki bu ta da, ta djuda txeu pa bu fidju kontinua ta dizenvolve. Kel amizadi ki bu ta dizenvolve ku bu fidju ta mostra ma el ten valor pa bo.
“Xinta na txon ku bu fidju. Djuga ku el. Brinka ku el. Ka bu fika sériu dimás. Lenbra ma kes primeru ideia ki bu fidju ta ten sobri amor ta ben di nhos, ki é se pai ku se mai.” — Richard.
Prinsípiu di Bíblia: ‘Fidjus é un eransa di Jeová; frutu di madri é un rekonpénsa’. — Salmo 127:3.
Sima bu fidju ta ba ta kria. Piskizas ta mostra ma kes mininu ki ten bon amizadi ku ses pai es é bon alunu, es ten ménus prubléma ku ses sentimentu i es ten ménus xansi di uza dróga ô di konporta mariadu. Tra tudu kel ténpu ki meste pa bu dizenvolve un bon amizadi ku bu fidju.
“Kantu nha fidju sai di kaza, el fla-m ma kuza ki más el ta ben xintiba falta éra di kes konbérsu ki nu ta tinha na kes viaji lonji ô na óra di janta. Alguns di kes midjór konbérsu ki dja nu tevi, kontise na óra ki N ka sta speraba. Nu tevi kes konbérsu li, pamodi nu ta pasaba txeu ténpu djuntu.” — Dennis.
Prinsípiu di Bíblia: ‘Nhos mante txeu sienti pa nhos ka anda sima algen tolu, má sima algen ki ten sabedoria, ta uza nhos ténpu di midjór manera ki nhos pode’. — Efésios 5:15,16.
Pamodi ki papel di un pai é txeu inportanti?
Normalmenti, pesoas ta atxa ma pai é kel algen ki debe da família kes kuza ki es meste i proteje-s. Má es ta atxa ma mai é kel algen ki debe kuida di família i da-s amor. (Deuteronómio 1:31; Isaías 49:15) Na alguns família, pai ta faze alguns papel ki é di mai i mai ta faze alguns papel ki é di pai. Má piskizas ta mostra ma ten alguns kuza inportanti ki é sô pai ô sô mai ki ta pode faze pa djuda ses fidjus. b
Un mudjer ki ta faze piskiza sobri família, ki txoma Judith Wallerstein, konta un situason ki el pasa pa el ki ta mostra kel pontu li. El skrebe: “Kantu nha fidju-fémia di 12 anu panha asidenti di karu, el kria pa se pai konduziba anbulánsia pamodi el ta kunfiaba dimás ma el ta proteje-l. Dipôs, na ospital, el kria pa N xintaba na ladu di se kama dia interu pa N konsola-l.” c
“Un pai ta proteje se família i pô-s xinti suguru di un manera ki pode ser difísil pa un mai konsigi faze el sô. Má tanbê, un mai ta djuda se fidju xinti amor i ma el ta ntende-l óras ki el ta obi-l i el ta poi na se lugar. Pai ku mai debe trabadja sima un ekipa.” — Daniel.
Prinsípiu di Bíblia: ‘Nha fidju, seta disiplina di bu pai i ka bu bandona lei di bu mai.’ — Provérbios 1:8.
Pai i fidju-fémia
Bo ki é pai, bu ta inxina bu fidju-fémia modi ki el merese pa otus ómi trata-l. El ta prende kel lison li di dôs manera:
Óras ki el ta odja modi ki bu trata se mai. Óras ki bu ta mostra amor i bu ta ruspeta bu mudjer, bu fidju-fémia ta odja kes kualidadi ki é inportanti el djobe na un ómi óras ki el ta ben skodje un maridu na futuru. — 1 Pedro 3:7.
Óras ki el ta odja modi ki bu ta trata-l. Óras ki bu ta ruspeta bu fidju-fémia bu ta inxina-l ruspeta se kabésa. Tanbê, el ta prende odja modi ki un ómi debe trata-l.
Má, óras ki un pai ta kritika se fidju-fémia sénpri, kel-li pode pô-l ta xinti ma el ka ten valor i pode pô-l ta djobe aprovason na otus ómi ki pode tene mau intenson.
“Un fidju-fémia ki ta xinti ma se pai ta ama-l i ta apoia-l, ka ta kustuma paxona pa un ómi ki ka ten kes kualidadi pa ser un bon maridu.” — Wayne.