Kantu ki N nase nha mai ku nha pai tinha un txon na interior di un zóna ki é Galícia, ki ta fika na Spanha. Nos éra 8 fidju i mi éra kel kuartu fidju. Nos família ta mostraba txeu amor pa kunpanheru. Na kel ténpu na Spanha, éra normal peloménus un fidju na kada família bai pa un skóla pa studa pa padri ô bai pa un kaza di frera. Mi ku más dôs di nhas irmon faze kel-li.

Kantu N tinha 13 anu, N bai pa kel mésmu kaza di frera ki nha irman staba, na Madrid. Na kel kaza di frera, gentis ka ta mostraba amor nen amizadi pa kunpanheru. Éra sô régras, orason i un monti limiti. Sédu palmanhan nu ta baba kapéla pa nu midita, má txeu bês N ka ta konsigiba pensa na nada. Dipôs nu ta kantaba múzikas di igreja i nu ta fazeba misa, tudu na latin. N ka ta ntendeba kuazi nada i N ta atxaba ma Deus staba lonji di mi. Es ka ta dexaba nos pâpia kuazi un dia interu. I ti óras ki mi ku nha irman ta nkontraba ku kunpanheru, nu podia flaba sô: “Ave Maria imaculada.” Kes frera ta dexaba nos pâpia sô duránti meia óra dipôs ki nu kume. Kel-li éra txeu diferenti di kel anbienti sábi ki tinha na nha família! N ta xintiba mi sô i N ta txoraba tudu óra.

N ka tinha un amizadi fórti ku Deus, má simé N bira frera ku 17 anu. Na verdadi, N faze kuzê ki otus krê pa N fazeba, má lógu N kumesa ta duvida si éra kel-la ki N kreba di nha vida. Kes frera ta flaba ma kes ki tinha kel tipu di dúvida li ta baba pa inférnu! Má simé N kontinua ku dúvida. N sabia ma Jizus Kristu ka ta staba el sô, apárti di otus algen. Envês di kel-li, el ta staba sénpri okupadu ta inxina i ta djuda otus algen. (Mateus 4:23-25) Ku 20 anu, N odja ma ka ta daba más pa N kontinua frera. N fika spantadu kantu kel frera ki tinha kel puzison más altu fla-m ma si N tinha dúvida, nton éra midjór N sai di la más faxi ki N pode. N ta atxa ma el xinti medu pa N ka influensiaba kes otu frera. Nton N sai di la.

Kantu N volta pa kaza, nha mai ku nha pai ntende dretu nha situason. Má dja ki ka tinha trabadju na undi ki es ta moraba,  N bai mora ku nha irmon na Alimanha. El ta staba djuntu ku un grupu di algen di Spanha, ki éra kumunista i ki mandadu pa la. N ta xintiba avontádi na meiu di kes algen la, pamodi es ta lutaba pa direitus di trabadjadoris i di mudjer. Nton, N bira kumunista i dipôs N kaza ku un algen di kel grupu. N ta atxaba ma N staba ta faze un kuza dretu óras ki N ta daba otus algen kes publikason di kumunistas i N ta fazeba manifestason djuntu ku otus algen.

Sima ténpu ba ta pasa, N fika diziludidu otu bês. N da kónta ma txeu bês kes kumunista ta inxinaba un kuza, má es ta fazeba otu kuza. N fika ku más sertéza di kel-li na anu 1971, kantu alguns jóven di nos grupu poi lumi na kel lugar ki ta reprizentaba govérnu di Spanha na Frankfurt. Es staba ta faze manifestason kóntra kes injustisa di govérnu di Spanha. N ta atxaba ma kel-li é ka éra un manera sértu di mostra ma nu ka staba kontenti.

Kantu nha primeru fidju nase, N fla nha maridu ma N ka ta baba más pa kes runion di kumunistas. N ta xintiba mi sô pamodi ninhun di nhas amigu ka bai djobe-m kantu nha fidju nase. N ta perguntaba nha kabésa sobri kal ki é obijetivu di vida. Ta baleba péna mê sforsa pa midjora mundu?

Na anu 1976, un kazal di Spanha, ki éra Tistimunha di Jeová, konku na nha pórta, es da-m alguns publikason di Bíblia i N seta. Kel sugundu bês ki es bai nha kaza, N faze-s txeu pergunta sobri sufrimentu, diskriminason i injustisa. N fika dimiradu kantu es uza Bíblia pa responde-m tudu nhas pergunta! N seta un studu di Bíblia kel óra.

Na komésu, N kreba sô prende kuzas novu. Má kantu mi ku nha maridu kumesa ta sisti runion na Salon di Reinu di Tistimunhas di Jeová, kuzas muda. Na kel ténpu, dja nu tinha dôs fidju. Ku amor, Tistimunhas di Jeová ta lebaba nos runion i es ta djudaba nos kuida di nos fidjus. N bira ta gosta txeu di Tistimunhas di Jeová.

Má simé, inda N tinha alguns dúvida. N disidi bai djobe nha família na Spanha. Nha tiu éra padri i el tenta pô-m ta dizisti di studa Bíblia. Má kes Tistimunha di Jeová di la djuda-m txeu. Es ta respondeba nhas pergunta ku bazi na Bíblia, sima kes Tistimunha di Jeová na Alimanha ta fazeba. N disidi ma N ta kontinuaba ta studa Bíblia óras ki N volta pa kaza. Nha maridu ka krê studaba más, má N ka dizisti simé. Na anu 1978, N batiza i N bira Tistimunha di Jeová.

Kel konhisimentu di verdadi ki sta na Bíblia da-m un obijetivu na vida. Pur izénplu, 1 Pedro 3:1-4 ta fla mudjer pa el ten ‘ruspetu di korason’ pa se maridu i pa el ten ‘un spritu kalmu i mansu ki ten grandi valor pa Deus.’ Kes konsedju li ta djuda-m ser un mudjer i un mai midjór.

Dja ten uns 35 anu ki N bira Tistimunha di Jeová. N ta xinti kontenti di faze párti di un família di irmons ku irmans na mundu interu ki ta sirbi Deus, i tanbê di odja ma kuatu di nhas sinku fidju sta ta sirbi Deus djuntu ku mi.