NA UN ilha pikinoti di Indonézia ki txoma Sangir Besar, ta mora três irman. Dja ten alguns anu ki es ta trabadja djuntu na bera mar. Es é txeu konxedu na kel ilha pamodi ses trabadju di pregason ki ta djuda pesoas intende Bíblia. Má na kel ténpu, es staba ta faze un trabadju diferenti.

Primeru, es ta entraba na mar, es ta panhaba pédras i es ta trazeba es pa areia. Alguns di kes pédra éra grandi sima un bóla di futibol. Dipôs, kes mudjer ta xintaba na bankinhus di madera i es ta uzaba martelus pa kebraba kes pédra na padás más pikinoti di ki un ovu di galinha. Dipôs di kel-li, es ta poba kes pédra más pikinoti na baldi di plástiku i es ta subiba un skada ta karegaba kes baldi ti undi ki es ta moraba. I dipôs, es ta poba kes pédra na sakus grandi pa kamions ba panhaba. Dipôs kes pédra ta ba uzadu pa faze stradas.

Un di kes irman éra Ulda. El tinha más ténpu di ki kes otu irman pa fazeba kel trabadju li. El ta kustuma uzaba tudu kel dinheru ki el ta ganhaba pa el sustenta se família. Má di es bês, tanbê el krê guardaba un réstu di dinheru pa fazeba un otu kuza. El krê kunpraba un tablet pa el pode poba aplikativu JW Library^® na el. Ulda sabia ma kes vídiu i kes otu kuza ki ta sta na JW Library^® ta ba midjoraba se pregason i se studu pesoal.

Duránti kuazi dôs mês, Ulda trabadja dôs óra más txeu tudu dia di palmanhan, ta kebra pédras ki ta daba pa intxiba párti tras di un kamion pikinoti. Dipôs di tudu kel sforsu li, el konsigi dinheru ki ta daba pa kunpraba un tablet.

Ulda fla: “Sikrê N ta fikaba txeu kansadu i ku dór na korpu, lógu N skese tudu kes dór kantu N kumesa ta uza nha tablet. El djuda-m ten bons rezultadu na pregason i pripara midjór pa runions.” Tanbê el fla ma se tablet djuda-l duránti COVID-19, kantu tudu kuza di kongregason fika ta fazedu pa internet. Nos tanbê nu ta fika kontenti pamodi Ulda alkansa se obijetivu.