Nicolas ku Céline pasa pa un prubléma diferenti. Es resebe un diziginason di Betel di Fransa pa es muda pa un novu kongregason. Es fla: “Na komésu nu staba txeu animadu, má dipôs nu kumesa ta xinti sodadi di nos amigus. Tanbê, nu ka tinha un amizadi fórti ku kes irmon di kel kongregason novu.” a Dja ki pode ser difísil, modi ki bu pode ser filís i ten bons rezultadu óras ki bu muda pa un kongregason novu? Modi ki otus algen pode djuda? I di ki manera ki bu pode inkoraja otus algen i resebe koraji na bu novu kongregason?

KUATU KUZA KI PODE DJUDA-U ADAPTA

1. Kunfia na Jeová. (Sal. 37:5) Kazumi, un irman na Japon, sai di se kongregason ki dja el tinha 20 anu na el, kantu se maridu mudadu di trabadju. Modi ki el ‘dexa Jeová mostra-l kaminhu’? El fla: “Sénpri N ta flaba Jeová modi ki N staba ta xinti ku medu, mi sô i txeu preokupadu. Tudu óra N ta fazeba kel-li. Pur isu, el da-m kel forsa ki N staba ta meste.”

Modi ki bu pode kunfia más na Jeová? Sima un planta ta meste di agu i el ta meste sta na un bon txon pa el pode kria, nos fé tanbê meste di kes dôs kuza li na sentidu spritual pa el pode kria. Nicolas, ki dja nu papiaba di el antis, midita na izénplu di ómis sima Abraon, Jizus i Paulu, ki faze txeu sakrifisiu pa faze vontadi di Deus. I kel-li djuda-l kunfia más txeu na ajuda di Jeová. Si bu studa Bíblia sénpri, kel-li ta djuda-u lida ku kalker prubléma na vida i bu ta prende  kuzas ki bu pode uza pa bu da otus algen na bu novu kongregason koraji.

2. Ka bu konpara kel kongregason ki bu staba na el ku bu novu kongregason. (Ecl. 7:10) Jules tevi ki adapta na un kultura txeu diferenti kantu el muda di Benin pa Mérka. El fla: “N tinha ki flaba kada algen ki N konxeba tudu kuza sobri mi.” Pamodi tudu kuza éra diferenti di kel ki el staba kustumadu ku el, el kumesa ta ivita sta djuntu ku irmons di kongregason. Má dipôs, ki el kumesa ta konxe irmons ku irmans midjór, el muda se manera di pensa. El fla: “N da kónta ma na kalker lugar na mundu, pesoas é kel mê. Úniku kuza é ki es ta pâpia i aji di manera diferenti. Nu ten ki seta kes algen sima es é.” Nton, ka bu fika ta konpara kel kongregason ki bu staba na el ku bu novu kongregason. Un irman ki txoma Anne-Lise, ki é pionera, fla: “N muda pamodi N krê prendeba kuzas novu, ka pamodi N ta speraba ma kel novu lugar ta sérba igual ku kel ki N dexa pa tras.”

Ansions tanbê ka debe fika ta konpara ku kel kongregason ki es staba na el antis. Un manera di faze kuzas diferenti ka krê fla ma é mariadu. É bon prende más sobri situason di kel lugar antis di da sujiston. (Ecl. 3:1, 7b) É midjór inxina irmons através di bu izénplu di ki tenta pô-s ta pensa sima bo. — 2 Kor. 1:24.

3. Sta okupadu na bu novu kongregason. (Flp. 1:27) Enbóra faze mudansa ta da txeu trabadju i ta leba txeu ténpu, é inportanti bu kumesa ta sisti runion na Salon di Reinu na bu novu kongregason más sédu ki bu ta pode. Kes irmon ku irmans na bu novu kongregason meste odja-u sénpri, asi pa es pode bira bu amigu i pa es pode djuda-u. Lucinda, ki muda el ku se dôs fidju-fémia pa un sidadi grandi na Áfrika di Sul fla: “Nha amigu insentiva-m pa N konsentra na bira amigu di irmons na kongregason, trabadja ku otus na pregason i da komentárius na runion. Tanbê, nu fla irmons ma es pode uzaba nos kaza pa es faze runion pa pregason.”

“Trabadja djuntu” na atividadis spritual ku kes irmon na bu novu kongregason ta djuda-u i ta djuda kes irmon. Anne-Lise, ki dja nu papiaba di el antis, fla ma un ansion insentiva-l pa el sai na pregason ku tudu algen di se novu kongregason. Kal ki foi rezultadu? El fla: “Lógu N da kónta ma kel-li é midjór manera di xinti párti di kongregason.” Tanbê, óras ki bu ta oferese pa faze kuzas sima linpa i kuida di Salon di Reinu, kel-li ta mostra pa bus irmon ku irmans ma kel-la gósi é bu novu kongregason. Kantu más sédu bu kumesa ta faze kes kuza li, bus irmons ta xinti más avontádi ku bo i ma bu ta faze párti di un novu família spritual.

4. Faze novus amigu. (2 Kor. 6:11-13) Mostra interesi pa un algen é midjór manera  di faze amigus. Pur isu, tra ténpu antis i dipôs di runion pa pâpia i konxe irmons. Faze txeu sforsu pa bu lenbra di ses nómi. Óras ki bu ta lenbra nómi di pesoas, bu ta krê ser ses amigu i bo é un algen ki é fásil di pâpia ku el, otus algen ta krê konxe-u i talvês bu ta ser un bon amigu pa es.

Envês di finji ser kuzê ki bu ka é pa otus algen pode gosta di bo, mostra irmons di bu novu kongregason ken ki bo é di verdadi. Prende ku izénplu di Lucinda, ki fla: “Gósi nu ten bons amigu pamodi nu disidi konvida otus algen pa nos kaza.”

“NHOS RESEBE KUNPANHERU DRETU”

Alguns algen ta atxa difísil entra na un Salon di Reinu ki ten sô algen ki es ka konxe. Nton, kuzê ki bu pode faze pa djuda kes algen ki muda pa bu kongregason? Apóstlu Paulu fla: “Nhos resebe kunpanheru dretu, sima Kristu tanbê resebe nhos”. (Rom. 15:7) Óras ki ansions ta imita Jizus, es pode djuda kes algen novu na kongregason xinti dretu. (Odja kuadru “ Kuzê ki pode djuda-u ten bons rezultadu óras ki bu muda”.) Má, tudu algen na kongregason, kel-li ta inklui mininus tanbê, pode djuda kes algen novu xinti dretu na kongregason.

Resebe otus algen dretu ta inklui kuzas sima resebe-s na bu kaza i tanbê djuda-s na kuzas ki es meste. Pur izénplu, un irman leba un otu irman ki muda pa se kongregason dja tinha poku ténpu, pa bai konxe sidadi i el mostra-l modi ki el ta panhaba transpórti pa públiku. Kuzê ki kel irman faze dexa kel otu irman txeu dimiradu i kel-la djuda-l adapta.

UN OPORTUNIDADI PA BU BIRA MÁS MADURU

Pa un gafanhotu konsigi abri se azas i bua, el meste troka di péli txeu bês. Di mésmu manera, si bu muda pa un kongregason bu meste libra di kalker medu ki ta inpidi-u  pa abri bus aza i bua na sirvisu di Jeová. Nicolas i Céline fla: “Muda di kongregason é un bon trenu. Pa kustuma ku pesoas novu i un lugar diferenti, nu tevi ki dizenvolve novus kualidadi.” Jean-Charles, ki dja nu papiaba di el antis, fla ki bons rezultadu se família tevi. El fla: “Na nos novu kongregason, nos fidjus bira más maduru i más amigus di Jeová. Dipôs di alguns mês na kel novu kongregason, nos fidju-fémia kumesa ta faze diziginason na runion di meiu di simana i nos fidju matxu bira publikador.”

Kuzê ki bu pode faze si bu ka ta konsigi muda pa undi ki ten más nisisidadi? Faze di kónta ma kel kongregason ki bu sta é un kongregason novu pa bo i faze kes kuza ki sta na kel artigu li. Timenti bu ta kunfia na Jeová, sta txeu okupadu na bu kongregason, ta faze planus pa trabadju ku otus irmon na pregason i ta faze novus amigu ô ta bira más amigu di kes algen ki dja bu konxe. Bu pode djuda kes novu na kongregason ô kes ki meste di ajuda. Dja ki amor é kel kualidadi ki ta mostra kenha ki é kristons verdaderu, djuda otus pode djuda-u bira más amigu di Jeová. (Juan 13:35) Bu pode ten serteza ma “Deus ta fika kontenti ku kes sakrifisiu li.” — Ebr. 13:16.

Sikrê ku difikuldadis, txeu irmons tevi bons rezultadu kantu es muda pa un novu kongregason i bo tanbê bu pode ten! Anne-Lise fla: “Muda di kongregason djuda-m abri nha korason más txeu.” Gósi Kazumi odja ma óras ki nu ta muda di kongregason, “Jeová pode djuda-nu di maneras ki nen nu ka staba ta spera.” I modi ki Jules xinti? El fla: “Kes amizadi ki N faze djuda-m ka xinti más mi sô. Gósi N ta xinti párti di nha novu kongregason ki ta sérba difísil si N torna muda.”