Si bu djobe ajuda pa lida ku dór di perde un algen ki bu ta ama, bu pode atxa un monti konsedju. Má, alguns ta djuda más ki otus. Talvês kel-li ta kontise pamodi sima nu odja antis, kada algen ta lida ku dór di manera diferenti. Kuzê ki pode djuda un algen pode ka djuda otu algen.

Txeu di kes konsedju ki spesialistas ta da, nu ta atxa-s na Bíblia, ki é un livru di sabedoria ki skrebedu dja ten un monti anu.

• Alguns spesialista ta fla ma kel-li é kel midjór ajuda ki bu pode ten pa lida ku dór di perde un algen ki bu ta ama. Má simé, alvês bu pode xinti vontadi di fika bo sô. Bu pode ti fika xatiadu ku kes algen ki sta ta tenta djuda-u. É normal bu xinti si.

• Ka bu xinti ma bu ten ki sta sénpri djuntu ku otus algen. Má tanbê ka bu afasta totalmenti di es, pamodi dipôs bu pode ben meste ses ajuda. Ku bondadi, dexa otus algen sabe kuzê ki bu sta meste i kuzê ki bu ka sta meste.

• Di akordu ku bus nisisidadi, ser ikilibradu na kantu ténpu ki bu ta sta djuntu ku otus algen i kantu ténpu ki bu ta sta bo sô.

KUZÊ KI BÍBLIA TA FLA: ‘Dôs é midjór ki un, pamodi si un di es kai, kel otu ta djuda se kunpanheru labanta.’ — Eclesiastes 4:9, 10.

• Kume kes kumida ki é bon pa saúdi ta djuda-u lida ku kel situason. Tenta kume diferentis tipu di fruta, verduras i kumida ki ka ten txeu gordura.

• Bebe txeu agu i otus bebida ki é bon pa saúdi.

• Si bu ka tene vontadi di kume, tenta kume poku-poku txeu bês duránti dia. Tanbê bu pode pidi bu dotor alguns konsedju. *

• Faze kaminhada i otus tipu di izersísiu pode djuda-u xinti más midjór. Izersísiu pode djuda-u pensa más dretu na kuzê ki kontise ô para di pensa un bokadinhu na kel kuza.

KUZÊ KI BÍBLIA TA FLA: ‘Ninhun ómi nunka ka ôdia se própi korpu; má, el ta da-l kumida i el ta kuida di el’. — Efésios 5:29.

• Durmi é inportanti pa tudu algen. Má prinsipalmenti pa kes ki perde un algen ki es ta ama, pamodi kel tristéza pode pô-s ta xinti más kansadu.

• Toma kuidadu pa bu ka bebe txeu kuza ki ten kafeína i álkuol, pamodi es pode prujudika bu sónu.

KUZÊ KI BÍBLIA TA FLA: ‘É midjór ten un mô xeiu di diskansu di ki ten dôs mô xeiu di trabadju duru i ta kóre tras di béntu.’ — Eclesiastes 4:6.

• Rekonhese ma kada algen ta lida ku dór di perde un algen di manera diferenti. Pur isu, bu meste djobe kuzê ki é midjór pa bo.

• Alguns algen ta xinti más midjór óras ki es ta pâpia ku otus sobri kuzê ki es sta ta xinti. Má otus algen ta prifiri ka pâpia ku otus. Ti mésmu spesialistas ten opinions diferenti sobri kel asuntu li. Si bu meste dizabafa ku un algen, má bu tene medu di faze-l, talvês bu pode kumesa ta pâpia poku-poku ku un algen ki nhos é txeu amigu.

• Alguns algen da kónta ma txora djuda-s lida ku kel dór. Má ta parse ma otus konsigi lida ku kel dór sikrê es ka txora txeu.

KUZÊ KI BÍBLIA TA FLA: ‘Kada korason ta konxe se própi tristéza’. — Provérbios 14:10.

• Alguns algen, pa alivia ses dór, es kaba pa abuza di álkuol ku ramedi ô uza dróga. Má kes kuza li sô ta prujudika-s. Kalker alíviu ki un algen pode xinti é pa poku ténpu, i el pode piora se situason. Tenta faze kuzas ki ta pô-u ta xinti midjór má ki ka ta prujudika-u.

KUZÊ KI BÍBLIA TA FLA: ‘Nu linpa di tudu sujidadi’. — 2 Coríntios 7:1.

• Txeu algen da kónta ma tra ténpu pa faze otus kuza djuda-s lida ku ses dór.

• Pasa ténpu ku bus amigu, faze novus amizadi, prende faze algun kuza novu ô faze algun tipu di diverson pode djuda-u xinti más midjór.

• Ku ténpu, bu situason pode muda. Talvês bu ta da kónta ma kes momentu ki bu ta xinti midjór ta bira más txeu di ki kes momentu ki bu ta xinti tristi. Kel-li ta mostra ma bu sta ta rekupera.

KUZÊ KI BÍBLIA TA FLA: ‘Ten un ténpu markadu pa tudu kuza. Ténpu pa txora i ténpu pa ri; ténpu pa lamenta i ténpu pa badja’. — Eclesiastes 3:1, 4.

• Lógu ki da, kumesa ta faze bus atividadi.

• Óras ki bu ta durmi dretu, bu ta trabadja i bu ta faze otus atividadi, kel-li pode djuda-u xinti ma kuzas sta ta volta normal otu bês.

• Mante okupadu ku atividadis ki ta pô-u ta xinti dretu pode djuda-u xinti ménus dór.

KUZÊ KI BÍBLIA TA FLA: ‘El ka ta pensa txeu na dias di se vida ki ta pasa faxi, dja ki kel Deus verdaderu ta pô-l okupadu ku alegria di se korason.’ — Eclesiastes 5:20.

• Txeu algen rapende pamodi es toma disizons inportanti lógu dipôs ki more-s un algen ki es ta ama.

• Si ta da, dexa un ténpu pasa antis di bu disidi muda, ranja otu trabadju ô disfaze di kes kuza di kel algen ki móre.

KUZÊ KI BÍBLIA TA FLA: ‘Planus di un algen ki ta sforsa, di sertéza ta ten bons rezultadu, má tudu kes ki ta faze kuzas sen pensa, ta kaba na pobréza’. — Provérbios 21:5.

• Txeu algen ta atxa ma é bon faze kuzas ki ta djuda-s lenbra di kel algen ki móre.

• Un kuza ki pode pô-u ta xinti midjór é djunta alguns fotu ô skrebe sobri alguns kuza ki nhos faze djuntu ki bu ka krê skese.

• Guarda alguns kuza ki ta djuda-u lenbra di kes bon momentu ki nhos pasa djuntu, i dipôs bu pode djobe-s óras ki bu sta xinti priparadu.

KUZÊ KI BÍBLIA TA FLA: ‘Lenbra di kes ténpu antigu’. — Deuteronómio 32:7.

• Odja si bu ta konsigi tra féria.

• Si bu ka ta konsigi tra txeu dia di féria, talvês bu pode tra un ô dôs dia pa bu faze algun kuza ki bu gosta, sima pâsia ku amigus, konxe un lugar diferenti ô bai mar.

• Óras ki bu ta faze un kuza diferenti, mésmu si é pa poku ténpu, el ta djuda-u lida midjór ku kel dór ki bu sta xinti.

KUZÊ KI BÍBLIA TA FLA: ‘Nhos ben, nu bai nos sô pa un lugar izoladu pa diskansa un bokadinhu.’ — Marcos 6:31.

• Lenbra ma óras ki bu ta tra ténpu pa djuda otus algen, bu sta ta djuda bu kabésa tanbê.

• Bu pode kumesa ta djuda otus ki tanbê sta ta sufri pamodi kel algen ki bu ta ama móre. Pur izénplu, amigus ô famílias ki talvês meste di algen ki ta ntende ses dór i kuzê ki es sta ta xinti.

• Óras ki bu ta djuda i konsola otus, bu pode ten alegria otu bês i xinti ma bu ten valor.

KUZÊ KI BÍBLIA TA FLA: ‘É más sábi da di ki toma.’ — Atos 20:35.

• Óras ki un algen ki bu ta ama móre, kel-li ta djuda-u pensa na kuzê ki é más inportanti na vida.

• Uza kel ténpu pa bu pensa na modi ki bu sta ta leba bu vida.

• Si meste, faze mudansas pa bu pode poi kes kuza más inportanti na primeru lugar.

KUZÊ KI BÍBLIA TA FLA: ‘É midjór bai pa kaza di lutu di ki bai pa kaza di fésta, pamodi mórti é fin di tudu ómi, i ken ki sta bibu debe pensa na kel-li.’ — Eclesiastes 7:2.

 Na verdadi, ka ten nada ki bu pode faze pa kaba ku tudu bu dór. Má, txeu algen ki more-s un algen ki es ta ama sigi kes konsedju di kel artigu li i kel-li djuda-s atxa konsolu. É klaru ki kel-li é ka un lista konplétu di tudu konsedju ki pode djuda-u lida ku dór di perde un algen. Má si bu tenta sigi kes konsedju li, talvês es pode djuda-u xinti midjór.