Kuvilingananga na munu woewoe, Yesu avele imumu kuwa akanava kuvalekwa mu shilambo shapai. (Nshuwau 8:23) Nnungu panantandi animumba Yesu, badae Yesu animpwashela Nnungu kumba vinu uti. Yesu bai andyumbigwa namu Yeova, ndyomana nae ankushamegwa “Mwana jumo” wa Nnungu. (Nshuwau 1:14) Yesu anditumika kenga Ntumwa wa Nnungu, ndyomana nae ankushamegwa “Lilove.”—Shomya Mikong’o 8:22, 23, 30; Vakoloshu 1:15, 16.

Nnungu anintumidya Mwanagwe mu shilambo shapai kwa kumya shingumi shake sha kuwa, kuvika mushitumbo sha mwalindembo muyuda wa lina Maliya. Ndyomana, Tatake Yesu havele munu wa shilambo shapai. (Lukashi 1:30-35) Yesu andida mu shilambo shapai pakulota: (1) kuvapundisha vanu umwiu wa Nnungu, (2) kulodya mwashi mwakuntumikila Nnungu ata tukavanavo matatisho lakunanopa, na (3) kujaula shingumi shake shikavé lidambi pakulota kuvambola vanu.—Shomya Mateu 20:28.

Kwambola ni kulipila shinu pakulota kumumya munu aungwidye. (Kuma 21:29, 30) Tangu kunantandi Nnungu halotile vanu vakangapale na vapele. Tunkumanya dashi shinu ashi? Nnungu animwaulila munu ntandi, Adamu, nae akandipela kuleka atandile ashilá shishamegwa mu Ibibiliya “lidambi.” Napanelo, Adamu kuleka hakatandile lidambi, hakanapele. (Kutunduvanga 2:16, 17; 5:5) Kulingana na Ibibiliya, kupela kundiinjila mu shilambo kupitila kumwe Adamu. Napavedoni, Adamu andiyambukisha  lidambi na kupela kwa udukulu wake uti. Wetu inkutuvaikila twambolegwe mu kupela kwa tupatile kumwe Adamu.—Shomya Valoma 5:12; 6:23.

Ni nyani avaikidile alipe pakulota atwambole mu kupela? Muwakati wa tupela, tunkulipila shimadambi shetu bai. Kwadananga wetu tunkuva tuvakutega, hatunaulula shinu kulipila shimadambi sha vanu vanji.—Shomya Dimu 49:7-9.

Kuvilingananga namu wetu, Yesu havanee madambi. Napavedoni, nae hapadile kwa mwaa wamadambi lake, mwaa nae hatagile. Yesu andipela kwa mwaa wamadambi lavanu. Nnungu andilodya linagwaledyo lyoe kwa vanu kwa kuntumidya Mwanagwe pakulota apele kwa mwaa wetu. Yesu yadavo andilodya linagwaledyo kwetu kwa kumwigwilila Tatake na kujaula shingumi shake kwa mwaa wamadambi letu.—Shomya Nshuwau 3:16; Valoma 5:18, 19.

Yesu pavele mushilambo, ashinavaponia valwele, kuvadyuwa vakupela na kuwapwashela vanu vashuvauvanga. Na ivé doni, nae andilodya ashilá shalota kutenda mushu kwa vanu vamwigwilila Nnungu. (Mateu 15:30, 31; Nshuwau 5:28) Baada Yesu akapele, Nnungu anindyuwa, na kumupa shingumi sha imumu kuwa. (1 Patulu 3:18) Baada Yesu akauke kuwa, andilindilila kunkanakono kwake Nnungu mpaka Nnungu namupa madalaka pakulota alangalele mushilambo uti. (Vabalaniya 10:12, 13) Muwakati au Yesu ankutawala kuwa, na vakwoda vake vankuvalanganga “mitenga vyambone” mushilambo uti shapai.—Shomya Daniyele 7:13, 14; Mateu 24:14.

Muwakati wakuvandika, Umu Yesu andatumila dimongo dyake pakulota kumalila mauvilo uti na ashilá shitadya kupagwa kuvauvanga. Vanu uti vankulupila Yesu kwa kumwigwilila vanavanavo shingumi shambone mu palaishu mushilambo shapai.—Shomya Dimu 37:9-11.