Jesu haazo layila batobeli babe kuti ba be ne bana kene ba si be ne bana. Na ibo badiyiwa babe habazo layila chingwe mu khani iyeyi. Akuna mu Baibili pa ino dzibila ku laula kuti u nga be ne bana bangana. Mu khani iyeyi, nlayontewo u muna Baroma 14:12 u no shinga: “Mmwe ne mmwe wedu unowozwidabiligwa ku Ndzimu.”

 Ba ka lobolana ba ka sununguka ku zwishalulila kuti a ba nowo be ne bana kene aa. Kakale ba nga zwishalulila kuti ba nowo be ne bana bangana ne kuti lini. Ha nlume ne nkadzi baka lobolana be shalula zila ye ku sa zwisenga ba singa chinye mimba, ikoko i thambo yabo kakale ndibo ba no zwidabilila mu ili. Akuna wa ka fanila ku ba athula.—Baroma 14:4, 10-13.