Mu chibaka ichechi che bugwele gwe COVID-19, bazwalani ne dziazwadzi dzedu ba ka shandula zila dza ba no rerela bathu nlaetsa u no nyaladza we Baibili. Pana ne ku rera mu ndawo dze bose, kene be yenda mu mizi ye bathu, ba ka rera kwazo be shingisa dzifouni ne ku kwala makwalo. a Bathu banjinji ba ka bokela ku be ba thama be jalo, ngono kwa ka boneka kuti Jehova wa ka kombolela nshingo wabo. (Zwiani 16:3, 4) Bona zwa ka shingikalila bamwe mu shango ingwe ye island.

 Ha bugwele gu sathu gu ka wa, Helen wa kabe e gala e kumba nngwe nkadzi ku kumbila ku zwidiya Baibili naye. Nkadzi iwoyo wa kabe e gala e lamba ku zwidiya Baibili. Ne kwa ka jalo, zhuba koga lockdown ye COVID-19 i sathu i ka tangisa, Helen wa ka mpa Baibili ne buka ye Baebele e re Ruta Eng? Mu chibaka che lockdown, Helen wa ka kumbila ku tangisa ku zwidiya Baibili ne nkadzi iwoyo, e chenesa kuti ba nowo bata thuto yabo ne founi. Mu chibaka ichecho, nkadzi iwoyo wa ka amuchila ku zwidiya Baibili. Wa ka shathila kwazo ku zwidiya ngono ka kumbila Helen ku zwidiya naye zhuba ne zhuba! Nkadzi iwoyo ka tangisa ku be po ku zwidiyo viki ne viki e shingisa founi. Pezhugwi kwa ichecho, u no shingisa cha a no zwidiya mu Baibili mu buchilo gugwe, ne ku lebesana ne bangwe ne kwe zwithu zwa a no zwidiya.

 Bafakazi ba mu gubungano lingwe ba ka kwalila maphorisa makwalo be ba bokela nshingo wa ba no thama. Maphorisa a ka be a ka chenama ku be ba kwaligwa makwalo. Phorisa lingwe la ka dwa nkugwana ungwe we gubungano unoyi Jefferson liti: “Nda kabe ndi kumbula kuti Bafakazi ba Jehova ba no nyanyaidza maphorisa.” Jefferson wa ka mbatsha ku wisisa kuti Bafakazi ba Jehova ha ba to nyanyaidza maphorisa. Maphorisa ba ka shathila kwazo cha ka kwagwa mu makwalo iyawo, ngono ba ka a biga pa a nga bongwa ne bathu ba no ngina mu police station. Phorisa lingwe la kati: “Ichechi chi nga batsha bangwe bo ku ti linga zwibuyanana ne ku si nyanyaidze nshingo wa ti no thama.

 Edna na Ednalyn bazhulazila be misi yose. b Ne kuti ha bana Internet ku nzi wabo, ba kabe ba si nga khone ku be po mu zwidiyo be shingisa videoconferencing. Ndizo ba ka lidzila nngwe we babakisani babo u si Nfakazi ku kumbila kuti a ba nga shingisa Internet iye ngono be be be mbatsha ku i ruwelela. Nkadzi iwoyo wa ka ba dumilila kuti ba shingise Internet iye ngono ba singa ruwele. Ha Edna na Ednalyn be nkoka ku lingilila zwidiyo, wa ka duma. Ngwenu mbakisani iwoyo, ungwe we bana babe, ne bana babili be bana babe ba no zwidiya Baibili ne Bafakazi kakale ba no be po ku zwidiyo zwe gubungano kanjinji.

 Bazwalani ne dziazwadzi ba ikoko ba ka koka babakisani babo, ba no shinga nabo, ne bangwe ku ndebo ye bose i no piwa ku shingisiwa videoconference. Ellaine, u no shinga mu ipatela ku ndawo iyeyo, kutanga wa kabe e cha ku koka ba a no shinga nabo. Wa be e kumbula kuti nganga dzingwe dza kabe dzi singa linge Bafakazi ba Jehova zwibuyanana. Ne kwa ka jalo, wa ka ba tumilila milaetsa e ba koka ne ludo. Ellaine wa ka be e cha kwazo ku koka nganga dzi li mbili-nlume ne nkadzi ba ka lobolana. Shule kwe ku kumbula ne kwako ne ku tembezelela khani iyeyo, wa ka ba tumilila nlaetsa e ba koka. Nkadzi wa ka shandula eti: “No shaka kuti ndi be nngwe we budumili gwenyu?” Ellaine wa ka leba kuti nngwe ne nngwe u no amuchigwa ku be po ku zwidiyo, isini Bafakazi ba Jehova koga. Zhuba li no tobela, Ellaine wa ka chenamisiwa ne ku bona balobolani ibabo ba ngina mu zwidiyo nako i chi yapo! Wa kati: “Ha zwidiyo zwi sathu zwi ka pela, nda ka amuchila nlayetsa u no dwa ku nkadzi iwoyo eti: ‘Ndi gwe kutanga ndi be po mu zwidiyo zwe Bafakazi ba Jehova. Kwa be ku shathisa kwazo. Ndo boka ku be wa ndi koka.’”

 Ellaine waka koka nganga dzi li 20 ku be po ku zwidiyo ngono wa ka shathisiwa ne ku ziba kuti ba li 16 babo ba ka be po mu zwidiyo. Ha e leba ne kwe cha ka lebgwa na Paulo, wa kati: “Ndo shathila kuti ‘ndakasimisa moyo’ ku rerela bangwe ba ndino shinga nabo ‘ndebo mbuya.’”—1 Bathesalonika 2:2.

 Bugwele igogu gwa ka simisa mamo e nngwe ne nngwe. Ngono bazwalani ne dziazwadzi ku shango iyeyi ye island ne dzingwe shango ba ka khona ku dwilila ba ka shatha ne ku linga zwithu zwibuyanana ne ku thama kose kwa ba nga khona ku nyaladza ne ku batsha bangwe.—Mishingo 20:35.