Maliko 6:1-56
6 Na auma vau athi kĩsionĩ kya kwoo, na amanyĩw’a make maendany’a nake.
2 Na mũthenya wa Savato, ambĩĩa kũmanyĩsya ĩsinakokenĩ, na aingĩ ala mamwĩwie maseng’a na makũlya: “Mũndũ ũũ aumĩtye maũndũ aa va? Na nĩkĩ ũnengetwe ũĩ ũũ na syama ii ikwĩkĩka kwĩsĩla moko make?
3 Ũũ nĩ ũla vundi wa mbwaũ, mwana wa Meli, na ana-a-inyia make nĩ Yakovo, Yosevu, Yutasi, na Simoni, kana ti w’o? Na eĩtu-a-inyia make twĩ namo, kana tũi namo?” Na kwoou mambĩĩa kũlulutĩka nũndũ wake.
4 Ĩndĩ Yesũ amea: “Mwathani ethĩawa anengetwe ndaĩa, ate o kĩsionĩ kya kwoo na katĩ wa andũ make ma mũsyĩ na nyũmbanĩ yake mwene.”
5 Kwoou ndaatonya kwĩka syama vau, eka o kwilĩĩla moko andũ anini ala maĩ awau na kũmavosya.
6 Kwa w’o, nĩwaseng’ie oona mate na mũĩkĩĩo. Na athyũlũlũka motũinĩ akĩmanyĩsya.
7 Na ameta ala Ĩkũmi na Elĩ ambĩĩa kũmatũma elĩ elĩ, na amanenga ũkũmũ ĩũlũ wa maveva mavuku.
8 Na ameaĩa maikakue kĩndũ kwondũ wa kyalo ate o ndata—maikakue mĩkate, mũvuko wa lĩu, kana mbesa* mĩsivinĩ yoo ya kwĩkĩa mbesa—
9 ĩndĩ mekĩe iatũ na maikekĩe ngũa kũndũ kwĩlĩ.*
10 O na ĩngĩ amea: “Mũsyĩ o na wĩva ũla mwĩlika, ĩkalai vau nginya yĩla mwĩuma kũu.
11 Na vandũ o na va vala mũteũthokw’a kana kwĩthukĩĩw’a, mũyuma vau, tuangai kĩtoo kĩla kĩ maaũnĩ menyu nĩ kana ũu wĩthĩwe ũkũsĩ kwoo.”
12 Kwoou mathi na matavany’a kana andũ nĩmaĩle kwĩlila,
13 na maumya ndaimoni mbingĩ, na mamavaka mauta andũ aingĩ ala maĩ awau na mamavosya.
14 Na Mũsumbĩ Elote eew’a ũndũ ũsu, nũndũ ĩsyĩtwa ya Yesũ nĩyamanyĩkĩte mũno, na andũ maasya: “Yoana Mũvatisi nũnathayũũkiw’e, na nĩkyo kĩtumi ũkwĩka syama.”
15 Ĩndĩ angĩ maasya: “Nĩ Eliya.” Na angĩ makasya: “Nĩ mwathani o ta ũmwe wa athani ma tene.”
16 Ĩndĩ Elote eew’a ũu, asya: “Yoana ũla nĩnatilile mũtwe, ũsu nũnathayũũkiw’e.”
17 Nĩkwĩthĩwa Elote mwene nĩwatũmanĩte Yoana akakwatwa na akamwova yela nũndũ wa Elotia, mũka wa Vilivu mwana-a-ĩthe, nĩkwĩthĩwa nĩwamũtwaĩte.
18 Na Yoana nĩwamwĩaa Elote: “Ti ũndũ wosanĩte na mĩao kwosa mũka wa mwana-a-au.”
19 Kwoou Elotia nĩwamwĩw’ĩaa woo ngoonĩ na nĩwendaa kũmũaa, ĩndĩ ndaĩ atonya.
20 Nũndũ Elote nĩwakĩaa Yoana, akĩmanya kana aĩ mũndũ mũlũngalu na mũtheu, na nĩwamũsũvĩaa. Ĩtina wa kũmwĩthukĩĩsya, ndeesĩ ũndũ ũtonya kwĩka, ĩndĩ nĩwaendeeie kũmwĩthukĩĩsya na ũtanu.
21 Ĩndĩ ĩvinda yĩla yaaĩlĩte nĩyavikie, na waĩ mũthenya wa kũsyawa kwa Elote, na ũ Elote avangĩthya kwĩthĩwe lĩu wa wĩoo kwondũ wa andũ make anene, anene ma ita, na andũ me nguma mũno ma Kalilii.
22 Na mwĩĩtu wa Elotia ooka asũnga na endeesya Elote na ala maĩsaa nake.* Kwoou mũsumbĩ amwĩa mwĩĩtu ũsu: “Mbĩtye kĩla ũkwenda, na nĩngũũnenga.”
23 Ĩĩ, amwĩvĩtĩa atĩĩ: “Kĩndũ o na kĩva kĩla ũũmbĩtya nĩngũũnenga, o na ethĩwa nĩ nusu ya ũsumbĩ wakwa.”
24 Kwoou aumaala na akũlya inyia wake: “Naĩle kũmwĩtya kyaũ?” Nake amwĩa: “Mũtwe wa Yoana Mũvatisi.”
25 Na vau kwa vau athi na mĩtũkĩ kũla kwĩ mũsumbĩ na amwĩtya, akyasya: “Nĩenda ũnenge oyu mũtwe wa Yoana Mũvatisi wĩ ĩsaaninĩ.”
26 O na kau ũndũ ũsu nĩwatumie mũsumbĩ akwatwa nĩ kyeva kingĩ, ndaĩ atonya kũlea, nũndũ wa mawĩvĩto make na nũndũ wa aeni make.*
27 Na vau kwa vau mũsumbĩ atũma mũsungi na amwĩaĩa aete mũtwe wa Yoana. Kwoou athi na amũtila mũtwe e yela
28 na aete mũtwe wake wĩ ĩsaaninĩ. Na aũnenga ũla mwĩĩtu, nake mwĩĩtu anenga inyia wake.
29 Yĩla amanyĩw’a make meewie ũndũ ũsu, mooka na moosa mwĩĩ wake na maũthika mbũanĩ.
30 Na atũmwa moombana mamũthyũlũlũkĩte Yesũ na mamũtavya maũndũ onthe ala meekĩte na kũmanyĩsya.
31 Nake amea: “Ũkai, inyw’ĩ, tũthi vandũ vate andũ nĩ kana mũthũmũe vanini.” Nũndũ ve aingĩ ala mookaa na kũthi, na kwoou mayaĩ na ĩvinda ya kũthũmũa o na ya kũya lĩu.
32 Kwoou mathi malika ĩsiwanĩ* nĩ kana mathi vandũ vate andũ makekale me oka.
33 Ĩndĩ andũ mamona maendete na aingĩ mamanya ũndũ ũsu, na masemba vamwe kuma ndũanĩ syonthe na mavika vo mbee woo.
34 Na auma ĩsiwanĩ, nĩwoonie ĩkomano ĩnene ya andũ na amew’ĩa tei mũno, nũndũ mailye ta malondu mate na mũĩthi. Na ambĩĩa kũmamanyĩsya maũndũ maingĩ.
35 Kũvikĩĩa vau kwaĩ kũnambĩĩa kũtuka, na amanyĩw’a make mooka vala ũĩ na mamwĩa: “Vandũ vaa vaitwĩe andũ, na nĩkwambĩĩa kũtuka.
36 Ũmbũũkya andũ, nĩ kana mathi mĩũndanĩ na motũinĩ ala me vakuvĩ makethooee kĩndũ maye.”
37 Nake amasũngĩa, amea: “Manengei kĩndũ maye.” Namo meew’a ũu mamũkũlya: “We yu wĩasya tũthi tũkathooe mĩkate ya ndinalĩ 200 tũnenge andũ aa maye?”
38 Nake amakũlya: “Mwĩ na mĩkate yĩana ata? Endai mũsisye!” Na ĩtina wa kũmanya, mamwĩa: “Ĩtano, na makũyũ elĩ.”
39 Na ameaĩa andũ onthe mekale nthĩ ikundi ikundi nyekinĩ nziũ.
40 Kwoou mekala nthĩ me ikundi sya andũ 100 na sya andũ 50.
41 Na oosa ĩla mĩkate ĩtano na ala makũyũ elĩ, asisya ĩũlũ ĩtunĩ na aiathima. Na ĩndĩ atilanga mĩkate ĩsu na ambĩĩa kũnenga amanyĩw’a make maaĩe andũ, na aany’a ala makũyũ elĩ kwondũ wa andũ onthe.
42 Na andũ onthe maya mavũna,
43 na moosany’a tũlungu twa mĩkate tũla twatialĩte mausũsya ikavũ 12, o na nĩmoosanisye makũyũ ala matialĩte.
44 Ala maĩe mĩkate maĩ aũme 5,000.
45 Na vate kũselewa, amea amanyĩw’a make malike ĩsiwa maendae mũingo ũla ũngĩ wa ũkanga melekele Vethisaita, nake atiwa ayũmbũũkya ĩkomano.
46 Na ĩtina wa kũtaanĩsya namo, athi kĩĩmanĩ kũvoya.
47 Yĩla kwavikie wĩoo, ĩsiwa yaĩ katĩkatĩ wa ũkanga, nake aĩ weka nthĩ nyũmũ.
48 Kwoou yĩla wamonie maing’ang’ana kũtwaa ĩsiwa, nũndũ kĩseve kyaumĩte ngalĩko ĩla maendete, kũkilye kũkya* ooka vala maĩ akinyĩle ũkanganĩ ĩũlũ; ĩndĩ ailye ta ũkwenda* kũmavĩtũka.
49 Yĩla mamwonie akinyĩle ũkanganĩ ĩũlũ, makaya na wasya mũnene, makyasya: “Kĩya nĩ kyaũ kyũkĩte!”*
50 Nũndũ onthe nĩmamwonie na makwatwa nĩ wia. Ĩndĩ vau kwa vau aneena namo, na amea: “Ĩthĩwai na ũkũmbaũ! Ninyie; ekai ũkĩa.”
51 Nĩvo ĩndĩ walikile ĩsiwanĩ vala maĩ, na kĩseve kyausya. Na moona ũu maseng’a mũno,
52 nũndũ mayaaelewa nĩ kĩla kyoonanaw’a nĩ ĩla mĩkate, ĩndĩ ngoo syoo syaendeea kwĩthĩwa ite na ũmanyi.
53 Yĩla maendie mũingo ũla ũngĩ wa ũkanga, mavika Kenesaleti na moova ĩsiwa vau vakuvĩ.
54 Na mauma ĩsiwanĩ oou, andũ mamũmanya.
55 Na masemba mathi kĩsionĩ kyonthe, na mambĩlĩlya kũtwaa andũ ala maĩ awau vala meew’a ũĩ, mamakuĩte na mokomo moo.
56 Na kw’onthe kũla wavika, motũinĩ kana ndũanĩ kana ndee sya ndũa, andũ nĩmaiaa ala awau sokonĩ, na maimwĩsũva nĩ kana o makiite ũtiivo wa ngũa yake ya ĩũlũ. Na onthe ala maũkiitaa nĩmavoaa.
Maelesyo ma kwongeleela
^ Ndeto kwa ndeto, “ũthuku.”
^ Kana “ngũa ĩngĩ.”
^ Kana “mekalĩte mesanĩ.”
^ Kana “ala mekalĩte mesanĩ.”
^ Kana “ĩtalũnĩ.”
^ Kana “ũsyaĩĩsyonĩ wa kana wa ũtukũ,” ũu nĩ kwasya, kwambĩĩa ta saa kenda sya ũtukũ nginya syũa yĩkaume ta saa kũmi na ilĩ.
^ Kana “aĩ vakuvĩ.”
^ Kana “Nĩ woni!”
