1 Vetelo 2:1-25
2 Kwoou ĩvathanei na ũthũku w’onthe, na ũvũngũ, na wangangany’a, na kĩwĩu, na nzukũ syonthe.
2 Ta tũũkenge tũnasyaiwe mĩtũkĩ, ĩthĩwai na wendi mwingĩ wa ĩia yĩtongeletwe kĩndũ* ya ĩla ndeto, nĩ kana kwĩsĩla kwayo mũtonye kwĩana na kũvikĩa ũtangĩĩo,
3 nũndũ nĩmũsamĩte mũkamanya kana Mwĩaĩi e tei.
4 Mwamũthengeea, ũla nĩ ĩvia yĩ thayũ yaleilwe nĩ andũ ĩndĩ yĩnyuvĩtwe nĩ Ngai, na nĩ ya vata kwake,
5 inyw’ĩ ene ta mavia me thayũ nĩmwakawa mũkatw’ĩka nyũmba ya kĩ-veva na mũyĩthĩwa ũthembi mũtheu, nĩ kana kwĩsĩla Yesũ Klĩsto mumasye nthembo sya kĩ-veva syĩtĩkĩlĩkĩte kwa Ngai.
6 Nũndũ Maandĩko maĩtye: “Sisya! Nĩngwia Saioni ĩvia ĩnyuve, ĩvia ya mũsingi ya kĩkotonĩ yĩ vata, na vaiĩ mũndũ o na ũmwe wĩthĩawa na mũĩkĩĩo nthĩnĩ wayo ũkasonoka nongi.”
7 Kwoou, we nĩ wa vata kwenyu nũndũ mwĩ etĩkĩli; ĩndĩ kwa ala mate etĩkĩli, “ĩvia yĩla aki maleile, nĩyo yĩtw’ĩkĩte ĩvia ĩnene ya kĩkotonĩ”
8 na “ĩvia ya kũlulutĩkya, na ĩvia ĩnene ya kũtulya.” Malulutĩkaa nũndũ mayĩw’aa ĩla ndeto. Na manyuviwe kwondũ wa ũndũ ũsu.
9 Ĩndĩ mwĩ “ũko mũnyuve, ũthembi wa kĩ-ũsumbĩ, mbaĩ ntheu, andũ manyuvĩtwe methĩwe malĩ ya mwanya, nĩ kana mũtavany’e kũndũ kw’onthe nguma nzeo” sya Ũla wamwĩtie mume kĩvindunĩ na mũlike kyeninĩ kyake kya ũsengy’a.
10 Nĩkwĩthĩwa ve ĩvinda inyw’ĩ mũtaĩ andũ, ĩndĩ yu mwĩ andũ ma Ngai; ve ĩvinda mũtaĩ ew’ĩe tei, ĩndĩ yu mwĩ ew’ĩe tei.
11 Endwa, nĩngũmwĩsũva ta mwĩ aeni na ekali ma ĩvinda, mũendeee kwĩvathana na mawendi ma mwĩĩ ala mokitanaa nenyu.
12 Ĩthĩwai na mwĩkalĩle mũseo katĩ wa andũ ma nthĩ, nĩ kana yĩla mekwasya mwĩ eki ma naĩ, methĩwe matonya kwĩyonea mawĩa menyu maseo na kwondũ wa ũu maimũkumya Ngai mũthenyanĩ wake wa kũthiana andũ.
13 Na kwondũ wa Mwĩaĩi, ĩnyivĩsyei mũtongoi o na wĩva ũnyuvĩtwe nĩ andũ, ethĩwe nĩ mũsumbĩ nũndũ nĩ mũnene kwĩ inyw’ĩ,
14 kana nĩ makavana ala matũmĩtwe nĩwe masilĩle eki ma naĩ, ĩndĩ maikatha ala mekaa nesa.
15 Nũndũ nĩ kwenda kwa Ngai kana mweeka maũndũ maseo mũkamavindĩthya andũ atumanu ala maneenaa ndeto sya mana.
16 Ĩthĩwai ta andũ athasye na mũitũmĩa ũthasyo wenyu ta ngombo sya Ngai, ĩndĩ mũikaũtũmĩe ta kĩtumi kya kwĩka ũthũku.
17 Nengai andũ ma mĩthemba yonthe ndaĩa, endai ana-a-asa menyu onthe, kĩai Ngai, nengai mũsumbĩ ndaĩa.
18 Athũkũmi nĩmenyivĩsye mavwana moo me na kĩkĩo kyonthe, na ti o kwa ala aseo na mate omũ ngoo ĩndĩ o na kwa ala mate laisi kũmendeesya.
19 Nĩkwĩthĩwa nũseo mũndũ kũmĩĩsya maũndũ momũ na kũthĩna ataĩlĩte kũthĩna nũndũ eenda kwĩthĩwa na wasya mũseo wa ngoo methonĩ ma Ngai.
20 Nũndũ ve ũseo mwaũ ethĩwa nĩmũũvũwa nũndũ wa kwĩka naĩ na mũyũmĩĩsya? Ĩndĩ ethĩwa mwĩũmĩĩsya mathĩna nũndũ wa kwĩka ũla ũseo, ũndũ ũsu nũmwendeeasya Ngai.
21 Vate nzika mweetĩiwe ũndũ ũsu, nĩkwĩthĩwa o nake Klĩsto nĩwathĩniw’e kwondũ wenyu na amũtiĩa ngelekany’o nĩ kana mũatĩĩae nyaaĩ syake nesa.
22 We ndaaĩka naĩ, o na ũvũngũ ndwaaoneka kanyw’anĩ wake.
23 Yĩla waumawa ndaaĩyĩumĩa. Yĩla wathĩnaw’a, ndaatĩsya ala mamũthĩnasya, ĩndĩ eenenganie mokonĩ ma Ũla ũsilaa kwa ũlũngalu.
24 We mwene nĩwakuie naĩ sitũ mwĩĩnĩ wake yĩla waathĩĩiwe mũtĩnĩ, nĩ kana tũkw’e maũndũnĩ ma naĩ na tũyĩkala kwondũ wa ũlũngalu. Na “kwondũ wa itau syake nĩmwavoiw’e.”
25 Nĩkwĩthĩwa mwailye ta malondu mau, ĩndĩ yu nĩmũsyokete kwa mũĩthi na mũsũvĩi wa mathayũ menyu.
Maelesyo ma kwongeleela
^ Kana “ĩia ĩtheu.”
