Nasyaĩwe vandũ vetawa Saxony, ĩla yĩ kĩsionĩ tene kyeetawa German Democratic Republic (GDR). Mũsyĩ kwitũ twekalanasya nesa na nĩtwendanĩte, na asyai makwa nĩmamanyĩĩtye kwĩthĩwa na mwĩkalĩle mũseo. Andũ aingĩ kĩsionĩ kya Saxony mayendeeaw’a nĩ maũndũ ma ndĩni nũndũ German Democratic Republic yaĩ ungu wa kyama kya Communist. O nakwa ndyaĩkĩĩaa kana Ngai e kw’o. Ve maũndũ elĩ noonaa me ma vata kwakwa myakanĩ yakwa ya mbee 18. Maũndũ asu nĩ kũĩkĩĩa kana kũi Ngai na ngwatanĩo ya Communism.

Nĩkĩ noonaa ngwatanĩo ya Communism yĩ nzeo? Nũndũ nĩnendeeaw’a mũno nĩ woni wa kana andũ onthe nĩmeanene. O na nĩnaĩkĩĩaa kana syĩndũ syonthe syaĩle kũaanw’a nesa vate kyende, nũndũ kwĩka ũu no kũtume andũ methĩwa meaneny’e ũkwati. Na nũndũ wa ũu, nĩnalikile ngwatanĩonĩ ya andũ ma mũika ya Communist. Nĩ na myaka 14, natũmĩie ĩvinda yakwa yingĩ ndithũkũma wĩa waendeee wa kũthesya mawĩthyũlũlũko. Andũ taoninĩ ya Aue nĩmendeeiw’e mũno nĩ kĩthito kyakwa na kwoou anene ma kĩsio kĩu manenga mũthĩnzĩo. O na kau naĩ mũnini, nĩnamanyie amwe ma atongoi anene ma siasa ma German Democratic Republic. Noonaa nĩ na mĩvango ĩla yaĩle na ĩvinda yakwa yĩla yũkĩte yĩ ĩseo vyũ.

Ĩtina wa kavinda o kanini, maũndũ makwa nĩmaalyũkile. Mwaka wa 1989, Ũkũta wa Berlin (Berlin Wall) nĩwavalũkile vamwe na ngwatanĩo ya Communist ya Eastern Europe. Maũndũ mate maseo maendeee kwĩkĩka. Ĩtina wa ĩvinda ĩkuvĩ nĩnamanyie kana kũyaĩ sila wa katĩ kĩsionĩ kya German Democratic Republic. Kwa ngelekany’o, andũ ala mateetĩkĩlanaa na ngwatanĩo ya Communism moonekaa mate ma vata. Ũndũ wa mũthemba ũsu ũtonya kwĩthĩwa waendeee ata na kyama kitũ kya Communist kyaĩkĩĩaa kana andũ onthe nĩmeanene? Kwani ngwatanĩo ĩsu ko yaemetwe nĩ wĩa wayo? Nĩnakwatiwe nĩ mawĩmakĩo maingĩ.

Maũndũ asu nĩmatumie nambĩĩa kwona kwina na kũsola nemo maũndũ ala ma vata vyũ kwakwa. Nũndũ nĩneemanyĩisye kwina sukulunĩ ya sekondalĩ nĩ na kĩeleelo kya kũthi yunivasĩtĩ, nĩnavangie kwĩthĩwa nĩ mwini na mũndũ wa kũsola mavisa. O na nĩnaekie kwĩthĩwa na mwĩkalĩle mũseo ũla namanyĩĩtw’e nĩ mũnini. Ũndũ ũla waĩ wa vata kwakwa waĩ kwĩtanĩthya na kũtuma ndũũ na twĩlĩtu twingĩ. Ĩndĩ kwina, kũsola, na kwĩtanĩthya kwa nzĩa ĩtaĩle kũyaatuma nĩeka kwĩthĩwa na mawĩmakĩo. O na mavisa ala nasolaa moonanasya kana naĩ na wia na ndyaĩ mũtanu. Neekũlasya-ĩ,  Kũkeethĩwa kũilyĩ ata ĩvinda yũkĩte? Na nĩkĩ andũ moombiwe?

Ĩla nesie ũkwata mosũngĩo ma makũlyo ala neekũlasya, nĩnaseng’ie mũno. Mũthenya ũmwe nĩ sukulu, nĩnekalile na kĩkundi kya amanyĩw’a maneeneaa ĩũlũ wa ĩvinda yũkĩte. Ve mwĩĩtu weetawa Mandy * twasomaa ĩmwe na waĩ Ngũsĩ ya Yeova. Mũthenya ũsu Mandy nĩwanengie ũtao mũseo. Ambĩie atĩĩ: “Andreas, ethĩwa nũkwenda kũkwata mosũngĩo ma makũlyo ala wĩkũlasya ĩũlũ wa thayũ na ĩvinda yũkĩte, ĩmanyĩsye Mbivilia kwa ũliku.”

Ndyaĩkĩĩaa vyũ maũndũ ala natavĩtw’e, ĩndĩ nĩnatwie kwĩmanyĩsya Mbivilia nĩ kana nĩkwate mosũngĩo. Mandy ambonisye ĩandĩko ya Ndanieli kĩlungu kya 2, na maũndũ ala nasomie vau nĩmanzeng’isye. Wathani ũsu nũeleetye ĩũlũ wa silikalĩ nene mũno ĩũlũ wa nthĩ (world powers) ila syaĩ syĩthĩwe kw’o kũvika o na ũmũnthĩ. Mandy nĩwambonisye wathani ũngĩ wa Mbivilia ũkonetye ĩvinda yitũ yũkĩte. Nĩnambĩĩie kũkwata mosũngĩo ma makũlyo ala neekũlasya! Ĩndĩ nĩneekũlasya-ĩ, Nũũ waandĩkie wathani ũsu, na nũũ waĩ atonya kũweta ĩũlũ wa ĩvinda yũkĩte ate kũvĩtya? Nĩvatonyeka Ngai akethĩwa e kw’o?

Mandy nĩwambonanisye na mũndũũme weetawa Horst na mũka wake Angelika, ala maĩ Ngũsĩ sya Yeova, na nĩmandetheeisye kũmanya Ndeto ya Ngai nesa. Kwa ĩvinda ĩkuvĩ, nĩnamanyie kana ndĩni ya Ngũsĩ sya Yeova nĩyo yendete kũtũmĩa ĩsyĩtwa ya Ngai, Yeova. (Savuli 83:18; Mathayo 6:9) Nĩneemanyĩisye kana Yeova Ngai nũnengete andũ wĩkwatyo wa kwĩkala tene na tene ĩũlũ wa nthĩ nzaũ. Savuli 37:9 yaĩtye atĩĩ: “Ala mamweteelaa Yeova, asu makatiĩwa nthĩ.” Nĩnendeeiw’e nĩ kũmanya kana ndeto isu nĩ kwondũ wa onthe ala mekĩaa kĩthito mekale kwosana na myolooto ya Ngai ĩla yĩ Mbivilianĩ.

Ĩndĩ, nĩnang’ang’anie mũno kũalyũla mwĩkalĩle wakwa nĩ kana nĩkale kwosana na Mbivilia. Kwĩthĩwa nĩ mwini mũseo na mũsoli wa mavisa nĩkwatumĩte nĩthĩwa na mĩyimbyo, kwoou nĩnaĩlĩte kwamba kwĩmanyĩsya kwĩthĩwa na wĩnyivyo. O na ĩngĩ, ndwaĩ ũndũ wĩ laisi kũekana na mwĩkalĩle mũthũku ũla naĩ naw’o. Nĩnĩtũngaa mũvea nũndũ Yeova nĩwĩthĩawa na wũmĩĩsyo, tei, na nĩ ũeleawa andũ ala matataa ũndũ matonya meke kwosana na kĩla Mbivilia ĩmanyĩasya!

O na kau kwa myaka 18 naĩ ngwatanĩonĩ ya Communism na ndyaĩkĩĩaa kana Ngai e kw’o, Mbivilia nĩtumĩte nĩalyũka vyũ kuma ĩvindanĩ yĩu. Maũndũ ala neemanyĩisye nĩmatumie nĩeka kwĩmakĩa ĩũlũ wa ĩvinda yũkĩte na matuma nĩmanya kĩeleelo kya kwĩthĩwa nĩ thayũ. Mwakanĩ wa 1993, nĩnavatisiwe na natw’ĩka Ngũsĩ ya Yeova, na mwakanĩ wa 2000, nĩnatwaie Tabitha, mũndũ mũka wĩ kĩthito kingĩ maũndũnĩ ma kĩ-veva. Nĩtũtũmĩaa ĩvinda yingĩ kũtetheesya andũ mamanye Mbivilia. Andũ aingĩ tũkomanaa namo me ngwatanĩonĩ ya Communism na maiĩkĩĩaa kana kwĩ Ngai o tondũ nailyĩ tene. Nĩnĩw’aa neanĩwa mũno ĩla namony’a ũndũ matonya kũmũmanya Yeova.

Ĩla nambĩĩe kwĩthĩwa na ngwatanĩo na Ngũsĩ sya Yeova, asyai makwa nĩmakĩaa. Ĩndĩ kuma ĩvinda yĩu, nĩmonete ũndũ nĩtethekete nũndũ wa kwĩthĩwa na ngwatanĩo na Ngũsĩ. Ũndũ ũla ũndanĩthasya nĩ kana nĩmasomaa Mbivilia na makathi maũmbanonĩ ma Kĩklĩsto ma Ngũsĩ sya Yeova.

Nĩ na Tabitha nĩtũtanĩaa mũtwaano witũ nũndũ nĩtũtataa vyũ kũatĩĩa ũtao ũla ũnenganĩtwe Mbivilianĩ ĩũlũ wa andũ ala matwaanĩte. Kwa ngelekany’o, kũatĩĩa ũtao ũla wonanĩtye kana ala matwaanĩte maĩle kwĩthĩwa maĩkĩĩanĩte nĩkũlũlũmĩĩlasya mũtwaano witũ.—Aevelania 13:4.

Nĩnaekie kwĩthĩwa na wia na kwĩmakĩa ĩũlũ wa ĩvinda yũkĩte. Nĩnĩtanĩaa kwĩthĩwa nĩ ũmwe wa ana-a-asa ĩũlũ wa nthĩ yonthe ala matanĩaa mũuo wa w’o na ngwatanĩo nzeo. Ithyonthe twĩthĩawa twĩanene na ũsu nĩ ũndũ nendeeaw’a nĩw’o kuma tene.