Ve mũndũũme wakĩĩe nthĩ ya Norway aumĩte nthĩ ya Eritrea mwaka wa 2011. Mũthenya ũmwe nĩwathokeiwe nĩ Ngũsĩ sya Yeova, na aitavya kana nĩwakomanĩte na Ngũsĩ ingĩ yĩla waĩ nthĩ yoo. Aisye kana ve ĩvinda waĩ mũsikalĩ, na nĩwoonie Ngũsĩ mbingĩ ila syoovetwe nũndũ wa mũĩkĩĩo wasyo iilea vyũ kũlika itanĩ sya kaũ o na syathingʼĩĩwʼa na kũthĩnwʼa mũno.

 Ĩndĩ e o ku Eritrea maũndũ nĩmamũvĩndũkĩie atataĩĩe, na nũndũ wa kĩtumi kĩna, ekwʼa yela. Vau yela eethĩanie na Ngũsĩ itatũ, nasyo nĩ Paulos Eyasu, Negede Teklemariam, na Isaac Mogos. Ana-a-asa asu moovetwe nũndũ wa mũĩkĩĩo woo, na mekalĩte vau yela kuma mwaka wa 1994.

 E ku yela, nĩweeyoneie kana Ngũsĩ sya Yeova niatĩĩaa maũndũ ala imanyĩasya. O na nĩwoonie kana syaĩ ndĩkĩĩku na nĩsyolanaa kalĩu kala syaĩ nako na avungwa ala angĩ. Nĩwoonaa kĩla mũthenya Ngũsĩ iyĩmanyĩsya Mbivilia syĩ vamwe, o na nĩsyathokasya avungwa ala angĩ memanyĩsye ĩmwe. Na yĩla Ngũsĩ isu syeewa niũthawʼa syeekĩa saii valũanĩ wonanĩtye kana iiendeea kũmũthũkũma Yeova, nĩsyaleaa vyũ.

 Maũndũ asu mũndũũme ũsu weeyoneie nĩmamũkiitie ngoo mũno. Kwoou ĩtina wa kũkĩĩa Norway na kĩlĩko kũusya, nĩwendie kũmanya nĩkĩ Ngũsĩ sya Yeova syĩthĩawa na mũĩkĩĩo ũlũmĩte ũu. Na nũndũ aĩ na ngoo nzeo, yĩla ila Ngũsĩ syamũthokeie, nĩwambĩĩie kwĩmanyĩsya Mbivilia ate kwananga ĩvinda, na ambĩĩa kũthi maũmbanonĩ maitũ.

 Twĩ Mwei wa 9, 2018, mũndũũme ũsu nĩwavatisiwe atwʼĩka Ngũsĩ ya Yeova. Ũmũnthĩ atũmĩaa kamwanya konthe kala wakwata aneene na andũ kuma nthĩ ya Eritrea na Sudan, na aimekĩa vinya mambĩĩe kwĩmanyĩsya Mbivilia nĩ kana methĩwe na mũĩkĩĩo mũlũmu.