Ũvũngũ: Ngũsĩ sya Yeova iinyusaa ndawa na iyĩendaa sivitalĩ.

 Ũwʼo: Ithyĩ nĩtũtataa ũndũ tũtonya tũkwate ũiiti ũla mũseo vyũ, na tũiitĩthye syana na iveti sitũ nesa vyũ. Ĩla twawaa tũmanthaa matakĩtalĩ ala mesĩ wĩa woo nesa na matonya kũtũthĩnza vate kũtwongela nthakame. Nĩtũtanĩthawʼa mũno nĩ maendeeo ala mekĩtwe maũndũnĩ ma ũiiti. O na nzĩa ila syaseũviwʼe itetheesye kũiita Ngũsĩ sya Yeova vate kũtũmĩa nthakame, matukũ aa nikee kũtũmĩwa kũiita andũ ala angĩ onthe. Ũsu nĩ ũndũ mũseo nũndũ nthĩnĩ wa nthĩ mbingĩ, mũndũ o na wĩva nũtonya kũtwʼa kũiitwa ate kwongelwa nthakame na ayĩvathana na mathĩna ala matonya kũkwata mũndũ nũndũ wa kwongelwa nthakame. Mathĩna asu nĩ ta mowau ala makwatanawʼa kwĩsĩla nthakame, mwĩĩ kũleana na nthakame ĩte yawʼo, kana o thĩna ũtonya kumĩla nũndũ wa mavĩtyo ma ndakĩtalĩ.

 Ũvũngũ: Ngũsĩ sya Yeova iĩkĩĩaa kana mũndũ avoawʼa nĩ mũĩkĩĩo wĩ wʼoka.

 Ũwʼo: Ithyĩ tũivoasya andũ kwa nzĩa ya syama.

 Ũvũngũ: Kũiitwa vate nthakame kwĩ ngalama nene mũno.

 Ũwʼo: Kũiita mũndũ ate kwongelwa nthakame kũtũmĩaa mbesa nini. a

 Ũvũngũ: Ngũsĩ mbingĩ mũno o na syana nikusaa kĩla mwaka nũndũ wa kũlea kwongelwa nthakame.

 Ũwʼo: Ũndũ ũsu ti wa wʼo o na vanini. Matakĩtalĩ maingĩ ma kũthĩnza nĩmatemaa awau me na mowau manene ta ũwau wa ngoo, ũwau wa mavĩndĩ na malenyũ, na mowau ala wĩthĩaa mũndũ no ekĩawa mamutha angĩ. Makũnaa wĩa ũsu wʼonthe mateũtũmĩa nthakame o na vanini. b Andũ awau na syana ndwau ala maiitawa vate nthakame maendeeaa nesa o ta ala mongelawa nthakame kana o na makaendeea nesanga kũte ala mongelawa nthakame. c Ĩndĩ o na kũkatwʼĩka kũilyĩ ata, vai mũndũ ũtonya kũĩkĩĩthya kana mũwau nũkũkwʼa nũndũ wa kũlea nthakame na kana nũkũvĩta nũndũ wa kwĩtĩkĩla ongelwe nthakame.

 Kĩla kĩtumaa Ngũsĩ sya Yeova ilea kwongelwa nthakame nĩ mũĩkĩĩo woo ĩndĩ ti atĩ syĩthĩawa iilea ũiiti. Mavuku ma Mbivilia ala me nthĩnĩ wa ũtianĩo mũkũũ na ala me nthĩnĩ wa ũtianĩo mweũ onthe nĩmatũtavĩtye sanzũ kana twaĩle kwĩvathana na nthakame. (Mwambĩlĩlyo 9:4; Alivai 17:10; Kũtũngĩlĩlwa Kwa Mĩao 12:23; Meko ma Atũmwa 15:28, 29) O na ĩngĩ Ngai onaa nthakame ĩanene na thayũ. (Alivai 17:14) Kwoou tũleaa nthakame nũndũ nĩtũmwĩwʼaa Ngai. Ti ũu wĩ wʼoka, tũmĩleaa nũndũ nĩtũnengete Ngai ndaĩa ũla nĩwe ũtũnengaa thayũ.

 Ve ĩvinda matakĩtalĩ moonaa nzĩa sya kũiita ala maleete nthakame syĩ nthũku mũno na itonya kũtuma mũndũ akwʼa, ĩndĩ myakanĩ ya mĩtũkĩ nĩmaekete kwĩthĩwa na woni ũsu. Kwa ngelekanyʼo mwakanĩ wa 2004, ve ũvoo waandĩkiwe ĩkasetinĩ yĩmwe ya kũmanyĩsya maũndũ ma ũiiti waisye kana “myaka yũkĩte nzĩa mbingĩ sya ũiiti ila syaseũviwʼe itetheesye Ngũsĩ sya Yeova ikatũmĩawa kũiita andũ onthe.” d Nakyo kĩlungu kĩngĩ nthĩnĩ wa ĩkaseti yĩmwe (Heart, Lung and Circulation) mwakanĩ wa 2010 kyaisye kana “ndakĩtalĩ ala mathĩnzaa maĩle kũtũmĩaa ‘mũthemba wa ũiiti ũla ũtatũmĩaa nthakame’ kĩla ĩvinda maithĩnza awau ĩndĩ mayaĩle kũtwʼa atĩ no Ngũsĩ sya Yeova syĩ syoka syaĩle kũiitwa ũu.”

 Ngili mbingĩ sya matakĩtalĩ nithĩnzaa awau iitũmĩa nzĩa ila isũvĩaa mũwau ndakasye nthakame mbingĩ mũno. Itũmĩaa nzĩa isu o na ĩla iũtema awau mekwenda kũtemwa masaa maingĩ mũno na iyĩsaa kũmongela nthakame. Mĩthemba ĩsu ya ũiiti nĩtũmĩawa o na nthĩ ila ite nthwii na awau mate Ngũsĩ nĩmakũlasya maiitwe ũu.