Aũme na aka aingĩ me mũtwaanonĩ mewʼaa ve vinya kũea ngewa, o na yĩla meũtinda yĩmwe. Nĩkĩ mewʼaa ũu?

•  Nĩkĩ amwe mewʼaa ngwatanĩo yoo ĩte ndũmu o na kau nĩmatũmĩaa ĩvinda vamwe?

•  Ũndũ ũtonya kwĩka

•  Kĩla andũ angĩ me mũtwaanonĩ maasya

•  Ũndũ mũtonya kũneenea maũndũ

•   Mĩnoo

   “Yĩla tũkwenda kũtũmĩa ĩvinda vamwe, kaingĩ wĩthĩaa mũemewa nĩ mũnou mũno kana nyie nĩ mũnou mũno. Yĩla nĩnoete, nĩthĩawa ndonya kũthatwʼa nĩ tũindo tũnini tũnini. Kwoou nonaa nĩ kavaa tũkeloela Televiseni.”—Anna.

•   Kũvĩngĩĩswa nĩ syĩndũ ta simũ

   “Isese sya kũea ngewa na maũndũ ma kwĩtanĩthya Indanetinĩ no maye ĩvinda yaku yingĩ. No ũtũmĩe masaa maingĩ syĩndũnĩ isu na ũyĩthĩa o na ndũnesa kũneena na ũla ũtwaanĩte nake, o na kau mwĩ nyũmba vamwe. Kĩu no kĩtume mũtatũmĩa ĩvinda kũea ngewa nesa yĩla mwĩ vamwe.”—Katherine.

•   Kwendeewʼa nĩ maũndũ me kĩvathũkanyʼo

   “Kaingĩ mũemewa auma wĩanĩ atũmĩaa ĩvinda yingĩ ayĩka maũndũ ala wendete. Athũkũmaa na kĩthito kingĩ mũno na kwoou ethĩawa na vata wa kũtũmĩa ĩvinda e weka ayĩka maũndũ ala wendete. Ĩndĩ nĩwʼaa ta keka no tũtũmĩe ĩvinda yingangĩ vamwe.”—Jane.

•   Wĩa

   “Nũndũ wa tekinolongyi, tũendeeaa kũthũkũma o na yĩla twĩ mũsyĩ na andũ maitũ. Kaingĩ nzũngĩaa e-mail na mesengyi sya wĩa saa ila naĩle kwĩthĩwa nditũmĩa ĩvinda na kĩveti kyakwa.”—Mark.

•   Manya kana ĩvinda yĩla mũtũmĩaa vamwe nĩ ya vata, na ti kĩndũ kya kwĩkaa o yĩla mwathũlũmũkĩla.

   Mwolooto wĩ Mbivilianĩ: “[Ĩkĩĩthyai] nesa maũndũ ala ma vata nĩ meva.”—Avilivi 1:10.

   Sũanĩa ũndũ ũũ: Meko maku nĩmonanasya kana wonaa mũtwaano waku wĩ wa vata mũnango kwĩ wĩa waku kana maũndũ ala wendete? Ũtũmĩaa ĩvinda na ũla ũtwaanĩte nake o yĩla ũte na ũndũ ũngĩ wa kwĩka?

   Kaũndũ ũtonya kwĩka: Vangĩĩaa ĩvinda ya kũtũmĩa vamwe na ũla ũtwaanĩte nake ũteũvĩngĩĩswa nĩ kĩndũ. Ndũkeekae ũu o yĩla walekanyʼa.

   “Ndanaa mũno yĩla mũemewa wavanga twĩke kaũndũ twĩ o elĩ. Kĩu kĩtũmaa nĩwʼa nĩ wa mwanya, na kĩmbĩkĩĩthasya kana nũtanĩaa kũtindanyʼa nakwa. O na kĩtumaa nĩmwenda mũnango.”—Anna.

•   Ĩmanyĩsye kwĩkala ũteũkwatanga syĩndũ ta simũ.

   Mwolooto wĩ Mbivilianĩ: “Kwondũ wa kĩla kĩndũ ve ĩvinda.”—Mũtavanʼya 3:1.

   Sũanĩa ũndũ ũũ: Nĩ keana ũekaa mesengyi kana o ũvoo ũngĩ ũlulutĩkye wĩthĩe ndũtũnga kĩlĩko kyaku kyonthe kwa ũla ũtwaanĩte nake?

   Kaũndũ ũtonya kwĩka: Tatai kũĩsaa lĩu ũmwe kwa mũthenya mwĩ vamwe kĩla mũthenya na mũitiaa simũ syenyu lumunĩ ũngĩ. Kũya lĩu vamwe kũmũnengae mwanya mũseo wa kũneenea ũndũ mũthenya wenyu wĩĩilye.

•   Yĩla vatonyeka, endai mũkathooe syĩndũ sya nyũmba vamwe kana mũtethye mawĩa ma mũsyĩ vamwe.

   Mwolooto wĩ Mbivilianĩ: “Elĩ me kavaa kwĩ ũmwe, nũndũ me na ĩtuvi ĩseo ũndũ wa wĩa woo.”—Mũtavanʼya 4:9.

   Sũanĩa ũndũ ũũ: Nĩ keana kĩla ũmwe wenyu ũendaa kũthooa syĩndũ sya nyũmba e weka?

   Kaũndũ ũtonya kwĩka: Tetheanĩsyaĩ kwĩka maũndũ, o na ethĩwa nĩ ala matonya kũtethwʼa no mũndũ ũmwe.

   “Onaai mawĩa ta kũthooa lĩu, kũthambya mĩio, kũtũlanĩla ngũa, na kũtuta nza ta myanya ya kũtũmĩa ĩvinda vamwe.”—Nina.

•    Ĩthĩwa na wĩnyivyo.

   Mwolooto wĩ Mbivilianĩ: “Ekai wĩnyivyo wenyu ũmanyĩke.”—Avilivi 4:5.

   Sũanĩa ũndũ ũũ: Ũtonya kwonanyʼa wĩnyivyo ata maũndũnĩ ala wĩkwatasya ũla ũtwaanĩte nake eanĩsye?

   Kaũndũ ũtonya kwĩka: Eai ngewa na ũitata ũelewe kĩla ũla ũngĩ ũkwenda. Twʼai ũndũ kĩla ũmwe ũtonya kũtũmĩa ĩvinda yake kwa nzĩa ĩkũtanĩthya ũla ũngĩ.

   “Mũemewa ethĩawa na vinya mwingĩ kwĩ inyie, nũndũ nĩthĩawa na mathĩna ma mwĩĩ. Kaingĩ nĩmwĩsũvaa aumaale aketanĩthye na ndimwĩa nĩtũkwonana asyoka. Nĩtiawa nyũmba nũndũ nĩthĩawa ndyenda kũthyũmũa, nake aithi nũndũ e na vata wa kwĩka masoesi. Ithyonthe nĩtũtanĩaa nũndũ twĩthĩawa tweeka tũkwenda.”—Daniela.

 Mbee, kĩla ũmwe no asũanĩe makũlyo aa e weka. Na ĩndĩ no mũneenee mosũngĩo menyu mwĩ vamwe.

•    No wasye yu tũĩ ũtũmĩaa ĩvinda yĩtoetye na ũla ũtwaanĩte nake?

•    Ũla ũtwaanĩte nake eekĩĩte kĩthito kĩva kya kũtũmĩa ĩvinda vamwe naku ũtonya kũmũkatha?

•    Nĩ va ũtonya kwenda aĩlangye?

•    Nĩ keana welelũkawʼa kĩlĩko nĩ syĩndũ ta simũ nginya ũkethĩa ndwĩthukĩĩsya nesa kĩla ũũtavwʼa nĩ ũla ũtwaanĩte nake?

•    Kĩla ũmwe atonya kwonanyʼa wĩnyivyo ata maũndũnĩ ala ũkwĩkwatya ũla ũngĩ eanĩsye?

•    Nĩ moalyũku meva kĩla ũmwe ũtonya kwĩka kyumwanĩ kĩĩ nĩ kana mũtũmĩe ĩvinda yingangĩ vamwe mũteũlulutĩkwʼa nĩ kĩndũ?