Ngai E Masyĩtwa Meana?

THAŨKA

Ũndũ Mbivilia ĩsũngĩĩte

Ngai e o ĩsyĩtwa yĩmwe. Ĩsyĩtwa yĩu yĩandĩkawa יהוה kwa kĩthyomo kya Kĩevelania na kwa Kĩkamba yĩandĩkawa “Yeova.” a Kwĩsĩla mwathani wake Isaia, Ngai aisye atĩĩ: “Ninyie Yeova, nĩyo syĩtwa yakwa.” (Isaia 42:8) Ĩsyĩtwa yĩu yonekaa mavinda ta 7,000 mavukunĩ ma tene ma Mbivilia. Ũu nĩ kwasya kana yonekaa mavinda maingĩ mũno kwĩ ĩsyĩtwa yĩngĩ yĩtũmĩĩtwe kwondũ wa Ngai, o na kwĩ ĩsyĩtwa ya mũndũ ũngĩ o na wĩva.

Yeova e masyĩtwa angĩ?

O kau Mbivilia yonanasya kana Ngai e ĩsyĩtwa o yĩmwe, ĩtũmĩaa masyĩtwa maingĩ ma ndaĩa na ma kũmũelesya. Amwe ma masyĩtwa asu ma ndaĩa na ma kũmũelesya nĩmonanĩtwʼe vaa ĩtheo. Kĩla ĩsyĩtwa yonanĩtye ndaĩa sya Ngai.

Ĩsyĩtwa	Vala yonekaa	Ũndũ yonanasya
Mwene Vinya Wʼonthe	Mwambĩlĩlyo 17:1	E vinya mwingĩ ũte maela. Ndeto ya Kĩevelania ʼEl Shad·daiʹ, “Ngai Mwene Vinya Wʼonthe,” yonekaa mavinda mũonza Mbivilianĩ.
Aliva na Omeka	Ũvuanʼyo 1:8; 21:6; 22:13	“Wa mbee na wa ĩtina,” kana “mwambĩlĩlyo na mũminũkĩlyo,” kwonanyʼa kana vayaaĩthĩwa ĩngĩ na Ngai Mwene Vinya Wʼonthe eka Yeova na vaikethĩwa ũngĩ ĩtina wake. (Isaia 43:10) Aliva nĩyo ndeto ya mbee, nayo Omeka nĩyo ndeto ya mũthya nthĩnĩ wa nthoo sya Kĩkiliki.
Mũtumĩa wa Matukũ	Ndanieli 7:9, 13, 22	Ndaĩ na mwambĩlĩlyo, na kwoou atwĩe kwʼo kuma tene na tene o na vate mũndũ waaĩthĩwa kana kĩndũ kĩngĩ kwĩthĩwa vo.—Savuli 90:2.
Mũmbi	Isaia 40:28	Nĩwe watumie syĩndũ syonthe syĩthĩwa.
Asa	Mathayo 6:9	Nĩwe ũtũnengae thayũ.
Ngai	Mwambĩlĩlyo 1:1	Ũla waĩle kũthaithwa, na wĩ vinya mwingĩ. Ndeto ya Kĩevelania ʼElo·himʹ ĩandĩkĩtwe kwa wingĩ kwonanyʼa kana Yeova nĩ mũnene, na nĩwaĩle kũnewa ndaĩa.
Ngai wa i ngai	Kũtũngĩlĩlwa Kwa Mĩao 10:17	Nĩwe Ngai ũla menene vyũ, na wĩ kĩvathũkanyʼo na “mĩvwʼanano” ĩla ĩthaithawa nĩ andũ amwe.—Isaia 2:8.
Mũmanyĩsya Mũnene	Isaia 30:20, 21	Nũtũmanyĩasya na aitũtongoesya kwa nzĩa ĩla yaĩle.—Isaia 48:17, 18.
Ngai mũtanu	1 Timotheo 1:11	Ethĩawa e mũtanu mavinda onthe.—Savuli 104:31.
Mwĩthukĩĩsya wa mboya	Savuli 65:2	We mwene nĩwĩthukĩĩasya andũ onthe ala mamũvoya na mũĩkĩĩo.
Ninyie Ũla Ninyie	Kuma 3:14	Atwʼĩkaa kyonthe kĩla kĩkwendeka nĩ kana eanĩsye kĩeleelo kyake. Ndeto isu syĩtũtetheesya kũelewa ĩsyĩtwa ya Ngai, Yeova, yĩla yonanĩtwʼe mũsoanĩ ũla ũatĩĩe.—Kuma 3:15.
Wĩ-kĩwĩu	Kuma 34:14	Ndetĩkĩlasya andũ mathaithe ngai ingĩ maimũthaitha.
Mũsumbĩ wa tene na tene	Ũvuanʼyo 15:3	Ũsumbĩki wake ndwĩ mwambĩlĩĩlyo kana mũminũkĩlyo.
Mwĩaĩi	Savuli 135:5	Nĩwe mũnene kana wĩ ĩũlũ wa kĩla kĩndũ, kwa Kĩevelania nĩ ʼA·dhohnʹ na ʼAdho·nimʹ.
Yeova wa nguthu, Mwĩaĩi wa Savaothi	Isaia 1:9; Alomi 9:29	Mũnene wa nguthu sya alaĩka.
Ũla wĩ Ĩũlũ wa Onthe	Savuli 47:2	Nĩwe wĩ ũkũmũ ũla mũnene vyũ.
Ũla Mũtheu	Nthimo 9:10	Nĩ mũtheu vyũ maũndũnĩ onthe kwĩ kyũmbe o na kĩmwe.
Mũmbi waitũ	Isaia 64:8	E na ũkũmũ ĩũlũ wa kĩla mũndũ na mbaĩ, o tondũ mũmbi wĩthĩawa na ũkũmũ ĩũlũ wa yũmba.—Alomi 9:20, 21.
Mwovosya	Isaia 41:14	Nĩwovoasya andũ kuma naĩnĩ na kĩkwʼũnĩ kwĩsĩla nthembo ya wovosyo ya Yesũ Klĩsto.—Yoana 3:16.
Ĩvia	Savuli 18:2, 46	Nĩ wĩvitho mũlũmu na nũtangĩĩaa.
Mũtangĩĩi	Isaia 45:21	Nũtangĩĩaa ĩla kweethĩwa na mĩisyo kana wanangĩko.
Mũĩthi	Savuli 23:1	Nũsũvĩaa athaithi make.
Mwĩaĩi Mũsumbĩ Mũnene	Mwambĩlĩlyo 15:2	E ũkũmũ ũla mũnene vyũ, kwa kĩthyomo kya Kĩevelania nĩ ʼAdho·naiʹ.

Kũndũ kũla kwĩtanĩwʼe na ĩsyĩtwa ya Yeova nthĩnĩ wa Maandĩko ma Kĩevelania

Masyĩtwa ma kũndũ kũmwe kũwetetwe Mbivilianĩ metanĩwʼe na ĩsyĩtwa ya Ngai, ĩndĩ asu ti masyĩtwa angĩ ma Ngai.

Ĩsyĩtwa ya vandũ	Vala yonanĩtwʼe	Ũndũ yonanasya
Yeova-yile	Mwambĩlĩlyo 22:13, 14	“Yeova Nĩwĩanĩasya Mavata.”
Yeova-nisi	Kuma 17:15	“Yeova Nĩ Kĩtuĩ kya Ũsindi Wakwa.” Yeova nĩ Ngai ũla andũ make matonya kũmwĩkwatya amasũvĩe na aimatethya.—Kuma 17:13-16.
Yeova-salomu	Asili 6:23, 24	“Yeova Nĩ Mũuo”

Nĩkĩ waĩle kũmanya ĩsyĩtwa ya Ngai na kũyĩtũmĩa?

No nginya Ngai ethĩwe onaa ĩsyĩtwa yake, Yeova, yĩ ya vata nũndũ nũyĩkĩĩte Mbivilianĩ mavinda ngili mbingĩ.—Malaki 1:11.
Mwana wa Ngai, Yesũ, nĩwakindĩlĩĩile mavinda maingĩ vata wa ĩsyĩtwa ya Ngai. Kwa ngelekanyʼo ve ĩvinda wavoyie Yeova asya atĩĩ: “Syĩtwa yaku yĩtaĩwe.”—Mathayo 6:9; Yoana 17:6.
Mũndũ ũla wĩmanyĩasya ĩsyĩtwa ya Ngai na aiyĩtũmĩa ethĩawa oosa matambya ma mbee ma kũseũvya ngwatanĩo yake na Yeova. (Savuli 9:10; Malaki 3:16) Ngwatanĩo isu nĩtumaa atetheka kumana na watho ũũ wa Ngai: ‘Nĩkwĩthĩwa nũlũlũmĩlĩtye wendo wake vala nĩĩ, kwondũ wa ũu ngamũvonokya: ngamũtũlya, nĩkwĩthĩwa nũmanyĩte syĩtwa yakwa.’—Savuli 91:14.
Mbivilia yaĩtye atĩĩ: “Kwĩ ingĩ syĩtawa ngai, syethĩwa syĩ ĩtunĩ, o na syethĩwa syĩ nthĩ; o ũndũ kwĩ ngai nyingĩ, na eaĩi aingĩ.” (1 Akolintho 8:5, 6) Ĩndĩ o na vamwe na ũu, nĩyonanasya kana ĩsyĩtwa ya Ngai wa wʼo weka nĩ Yeova.—Savuli 83:18.