Naaũ Maendaa Ĩtunĩ?
Ũndũ Mbivilia ĩsũngĩĩte
Ngai nũnyuvaa Aklĩsto avũthũ aĩkĩĩku ala ĩtina wa kũkwʼa mathayũũkawʼa makathi ĩtunĩ. (1 Vetelo 1:3, 4) Manyuvwa, no nginya maendeee kwĩthĩwa na mũĩkĩĩo mũlũmu vamwe na mwĩkalĩle mũseo wa Kĩklĩsto nĩ kana mekwata ĩtuvi yoo.—Aeveso 5:5; Avilivi 3:12-14.
Ala manyuvĩtwe kũthi ĩtunĩ makathi kwĩka ata kũu?
Makasumbĩka vamwe na Yesũ me asumbĩ na athembi kwa myaka 1,000. (Ũvuanʼyo 5:9, 10; 20:6) Nĩmo makatwʼĩka “matu meũ,” kana silikalĩ ya ĩtunĩ ĩla ĩkasumbĩka “nthĩ nzaũ,” ĩla nĩ andũ alũngalu ala makethĩwa vaa ĩũlũ wa nthĩ. Asumbĩ asu ma ĩtunĩ makatetheesya andũ methĩwe me eanĩu na maitanĩa kwĩkalaa nthĩ tene na tene, o tondũ Ngai wavangĩte.—Isaia 65:17; 2 Vetelo 3:13.
Nĩ meana ala methayũũkwʼa mathi ĩtunĩ?
Mbivilia yaĩtye kana andũ 144,000 nĩmo methayũũkwʼa mathi ĩtunĩ. (Ũvuanʼyo 7:4) Nthĩnĩ wa woni ũla wĩ ĩandĩkonĩ ya Ũvuanʼyo 14:1-3, mũtũmwa Yoana oonie “kala Katena ka ĩlondu aũngeme kĩĩmanĩ kya Saioni, na vamwe nake andũ ngili ĩana na mĩongo ĩna na inya.” Woninĩ ũũ, “Katena ka ĩlondũ” kaũngamĩe Yesũ e ĩtunĩ ĩtina wa kũthayũũkwʼa. (Yoana 1:29; 1 Vetelo 1:19) Nakyo ‘kĩĩma kya Saioni’ kĩũngamĩe kĩanda kĩnene kĩla Yesũ vamwe na ala 144,000, makethĩwa nakyo kya kũsumbĩka ĩtunĩ.—Savuli 2:6; Aevelania 12:22.
Ala ‘metĩtwe’ na “anyuve” kũsumbĩka vamwe na Klĩsto Ũsumbĩnĩ wa Ngai metawa “ĩĩthya ĩnini.” (Ũvuanʼyo 17:14; Luka 12:32) Ũu nĩ kwonanyʼa kana makeethĩwa me avũthũ masyaanĩwʼa na ũtalo wa malondu onthe ma Yesũ.—Yoana 10:16.
Momanyĩsyo ma ũvũngũ ĩũlũ wa ala methi ĩtunĩ
Ũmanyĩsyo wa ũvũngũ: Andũ onthe ala aseo maendaa ĩtunĩ.
Kĩla Mbivilia ĩmanyĩasya: Ngai athĩte andũ aingĩ ala aseo thayũ ũtathela ĩũlũ wa nthĩ.—Savuli 37:11, 29, 34.
Yesũ aisye atĩĩ: “Vai mũndũ waambata ĩtunĩ.” (Yoana 3:13) Kwoou Yesũ oonanisye kana andũ aseo ala makwie mbee wake ta Avalaamu, Mose, Yovu, na Ndaviti, mayaathi ĩtunĩ. (Meko ma Atũmwa 2:29, 34) Vandũ va ũu, maĩ na wĩkwatyo wa kwĩsa kũthayũũkwʼa matanĩe thayũ ĩũlũ wa nthĩ.—Yovu 14:13-15.
Ũthayũũkyo wa kũthi ĩtunĩ wĩtawa ‘ũthayũũkyo wa mbee.’ (Ũvuanʼyo 20:6) Ũu nĩ kwonanyʼa kana kũkeethĩwa ũthayũũkyo ũngĩ, nawʼo nĩ ũthayũũkyo wa kũũ nthĩ.
Mbivilia ĩmanyĩasya kana ungu wa Ũsumbĩ wa Ngai, “kĩkwʼũ kĩikethĩwa vo ĩngĩ.” (Ũvuanʼyo 21:3, 4) No nginya watho ũsu wĩthĩwe ũineenea vaa ĩũlũ wa nthĩ, nũndũ vai ĩvinda kĩkwʼũ kyaaĩthĩwa ĩtunĩ.
Ũmanyĩsyo wa ũvũngũ: Kĩla mũndũ nĩwe wĩnyuvĩaa vala ũkekala, vethĩwe nĩ ĩtunĩ, kana nĩ ĩũlũ wa nthĩ.
Kĩla Mbivilia ĩmanyĩasya: Ngai nĩwe ũnyuvaa Aklĩsto aĩkĩĩku ala makakwata ‘mũthĩnzĩo ũla meetĩiwe ĩũlũ,’ nawʼo nĩ wĩkwatyo wa kũthi ĩtunĩ. (Avilivi 3:14) Ngai ndasiasya wendi wa mũndũ ainyuva akakwata thayũ wa tene na tene e va.—Mathayo 20:20-23.
Ũmanyĩsyo wa ũvũngũ: Wĩkwatyo wa kwĩkala kũũ nthĩ tene na tene ti mũseo ta wa ĩtunĩ, na ũnengawe ala mateanĩĩe kũthi ĩtunĩ.
Kĩla Mbivilia ĩmanyĩasya: Ngai ametĩte ala makakwata thayũ ũtathela ĩũlũ wa nthĩ “andũ makwa,” “anyuve makwa,” na “ala aathime ma Yeova.” (Isaia 65:21-23) Makatanĩa kĩanda kya kũtetheesya kwĩanĩsya kĩeleelo kĩla Ngai waĩ nakyo mwambĩĩonĩ, kya andũ eanĩu kũtanĩa kwĩkala ĩũlũ wa nthĩ tene na tene yĩ vandũ vaseo.—Mwambĩlĩlyo 1:28; Savuli 115:16; Isaia 45:18.
Ũmanyĩsyo wa ũvũngũ: Namba 144,000 ĩtũmĩĩtwe ta ngelekanyʼo, ti ũtalo wa wʼo.
Kĩla Mbivilia ĩmanyĩasya: O na kau ĩvuku ya Ũvuanʼyo yĩ na namba syaĩle kwoswa ta ngelekanyʼo, namba imwe syonanasya ũtalo wa wʼo. Kwa ngelekanyʼo, nĩyĩwetete ĩũlũ wa “masyĩtwa ĩkũmi na elĩ ma ala atũmwa ĩkũmi na elĩ ma kala Katena.” (Ũvuanʼyo 21:14) Ekai tũsisye itumi imwe sya kwasya kana namba 144,000 ndyaĩle kwoswa ta ngelekanyʼo.
Ũvuanʼyo 7:4 nĩyonanĩtye, “ũtalo wa ala meekĩĩtwe ũsiĩlo [kana, ala maĩkĩĩthĩtwʼe kũkwata thayũ ĩtunĩ], ngili ĩana na mĩongo ĩna na inya.” Mĩsoa ĩla ĩatĩĩe nĩwetete ĩũlũ wa kĩkundi kĩngĩ kĩtĩtwe “ĩkomano ĩnene ya andũ, yĩla mũndũ o na wĩva ũtatonya kũyĩtalĩkya.” Asu ma “ĩkomano ĩnene,” o namo makwataa ũtangĩĩo kuma kwa Ngai. (Ũvuanʼyo 7:9, 10) Ethĩwa namba ĩno 144,000 nĩ ya ngelekanyʼo na yĩonanyʼa kĩkundi kĩ na ũtalo ũtesĩkĩwe, vaiĩ vata wa kũelekanyʼa ikundi isu syelĩ. a
O na eka ũu, andũ asu 144,000 maeleetwʼe ta “mathooetwe kumwʼa andũnĩ, methĩwe ũsyao wa mbee.” (Ũvuanʼyo 14:4) Ndeto “ũsyao wa mbee” syĩonanyʼa kana kĩu no kĩkundi kĩnini kĩnyuvĩtwe kuma andũnĩ. Na nĩ ndeto ieleetye nesa ala makasumbĩka ĩtunĩ vamwe na Klĩsto masumbĩkĩte ũtalo ũtesĩkĩwe wa andũ ala makethĩwa ĩũlũ wa nthĩ.—Ũvuanʼyo 5:10.
a Nake mũsomi ũmwe wĩtawa Robert L. Thomas aineenea ũtalo wa 144,000 ũla wĩ nthĩnĩ wa Ũvuanʼyo 7:4, aandĩkie ũũ: “Nĩ ũtalo wa wʼo, kĩvathũkanyʼo na ũtalo ũtesĩkĩwe ũla wĩ nthĩnĩ wa 7:9. Namba ĩsu ĩkoswa ta ngelekanyʼo, vai namba yĩthĩwa yĩ ũtalo wa wʼo ĩvukunĩ ya Ũvuanʼyo.”—Revelation 1-7: An Exegetical Commentary, ĩthangũ ya 474.
No Wendeewʼe Nĩ Ii
MOMANYĨSYO MA VATA MA MBIVILIA
Ũsumbĩ wa Ngai Nĩ Kyaũ?
Ĩla Yesũ waĩ ĩũlũ wa nthĩ, amanyĩisye ĩũlũ wa Ũsumbĩ wa Ngai kwĩ ũvoo ũngĩ o na wĩva. Kwa myaka maana maingĩ, andũ methĩĩtwe maivoya Ũsumbĩ ũsu wũke.
MĨSOA YA MBIVILIA ĨELEETWʼE
Ĩandĩko ya Ũvuanyʼo 21:1 Yĩeleetwʼe—“Ĩtu Yeũ na Nthĩ Nzaũ”
Nĩ maũndũ meva Mbivilia ĩwetete matonya kũtũtetheesya kũmanya kĩla kyonanawʼa nĩ mũsoa ũũ?
MOMANYĨSYO MA MBIVILIA
Ambĩĩa Kwĩmanyĩsya Mbivilia Naitũ
Ambĩĩa kwĩmanyĩsya Mbivilia na mwalimũ waku vate ndĩvi.