“GUMRA leng” ngu Mungkan Nnan Ga Gale Chyum Laika hta ga gale da ai madung ga si gaw, gumra leng amyu myu hpe tsun mayu ai rai na re. (Kas 8:28, 29, 38, NWT) Raitim, Ehtiopi unuk jawn ai gaw, majan hte shingjawng poi hta lang ai yu maya gumra leng n re ai sha, grai kaba ai gumra leng rai na masa nga ai. Lam nkau hpe maram yu ga.

Ehtiopi unuk gaw ahkang aya kaba ai wa rai nna, sumtsan kaw na bai wa nga ai. Shi gaw, “Ehtiopi mung up ai hkawhkam jan Kandake a man e ahkang kaba lu nna, shi a sut gan yawng sin ai, unuk re.” (Kas 8:27) Dai ni aten, Sudan mungdan hte Ijip mungdan dingda maga gaw, moi prat hta Ehtiopi ni a lamu ga re. Hkrun lam hkawm ai laman, htaw le sa ai hta lang na matu, grai kaba ai gumra leng jawn wa ai n re. Hkrun lam galu re ai majaw, arai law law htaw na matu jawn wa ai re. A.D. tsa ban 1 hta lang ai gumra leng nkau gaw, hkrun lam hkawm ai ni hpe htaw ai leng ni rai nna, shaprai 4 lawm ai. Magap ka-up da ai. Kasa Laika—Ga Htai Chyum hta, “dai zawn leng ni gaw, arai ni grai law hkra shang ai. Jawn yang mung manu ai. Hkrun lam galu hkawm ai shaloi lang yang grau kaja ai” ngu tsun da ai.

Hpilip ga sa shaga ai aten hta Ehtiopi unuk laika hti nga ai. “Hpilip mung gat sa wa nna, myihtoi Esaia laika hti nga ai na wu yang” ngu labau gaw madun dan ai. (Kas 8:30) Hkrun lam hkawm ai shaloi lang ai leng ni hpe lawan n mai gawt ai. Gau ngwi ngwi gawt ai majaw sha, unuk laika mai hti ai re. Hpilip mung kagat dep lu ai re.

Ehtiopi unuk wa gaw, “shi kaw rau lung dung na, Hpilip hpe saw wu ai.” (Kas 8:31) Shingjawng poi hta lang ai gumra leng nga yang, gumra gawt ai ni gaw rawt nna gawt ra ai. Raitim, hkrun lam hkawm ai shaloi lang ai leng re ai majaw, unuk mung, Hpilip mung dung shara nga ai re.

Kasa Laika daw kaba 8 hte labau hta madi madun da ai lam ni hku nga yang, ndai hpang de shapraw ai uhpung a laili laika ni hta, Ehtiopi unuk jawn ai gumra leng hpe hkrang shapraw ai shaloi, majan hte shingjawng poi hta lang ai yu maya gumra leng n re ai sha, grai kaba ai gumra leng hpe lang da ai.