MOI na Babelon mare gawgap ai hta lang wa ai, wan hku law ai wut ni hpe lamu ga sawk sagawn ai ni htu shaw la lu wa ai. Lamu ga sawk sagawn ai Robat Kowe tsun dan ai hku nga yang, “ga kagam kaja nna ju hpun law ai mare shinggan hta wan htung ni galaw nna wut ju wa ai.”

Babelon ahkang aya nga ai ni gaw dai zawn wan htung ni hpe lang nna, hkrit hpa lam ni hpe galaw ai ngu moi na labau ni hta tsun da ai. Toronto Dakasu na Asuri labau hte amyu ga ninghkrin, Paw-Alai Bawliyu ndai hku tsun ai: “Moi na Babelon labau laika ni hta hkawhkam a ga n madat ai ni, Babelon hpara ni hpe n gawn nsawn galaw ai ni hpe wan htung de kabai bang kau shangun ai.” “Shanhte hpe wan nat kau u. Wan htung de bang kau u. Hpa n ngam hkra jahten kau u. Wan hkut manu mana pru hkra nat kau u” ngu Hkawhkam Nebuhkadneza prat na laika langai hta ka da ai.

Dai gaw Daniela laika daw kaba 3 hta ka da ai mabyin langai hpe bai dum shangun ai. Babelon mare shinggan na Dura pa hta ja sumla kaba langai hpe Hkawhkam Nebuhkadneza shadun da ai. Shadrak, Meshak, Abed-nego ngu ai Hebre ramma 3 gaw dai ja sumla hpe n nawku ai majaw, Nebuhkadneza grai masin pawt ai. Dai majaw “dai wan htung hpe shawng na hta, htam sanit kahtet shangun” nna, ramma 3 hpe “grung nga ai wan htung kata de, kabai bang” kau shangun ai. Raitim, atsam kaba ai lamu kasa langai sa hkye la ai majaw asak lawt mat ai.—Dan 3:1-6, 19-28.

Babelon hta tam mu wa ai wut ni hta ka da ai laika mung, Chyum Laika tup hkrak tengman ai hpe shagrin ya ai. Wut laika law law hta, hkawhkam hpe shagrau da ai laika ni tawk ka da ai. “Babelon mare kaba a Hkawhkam Nebuhkadneza, ngai Hkawhkam shanu na matu gap da ai hkawhkam hkaw, ndai hkawhkam hkaw hta nye a kashu kasha ni matut hkaw dung u ga” ngu wut laika langai hta lu hti ai. “Ndai mare gaw nye a mungdan daju tai nga nna, nye a hpung shingkang dan hkung na matu, nye a hpung dagu hte ngai de da ai, galu kaba ai Babelon mare rai nga ai” ngu Daniela 4:30 hta ka da ai hte grai bung ai.