“Sakse Hkam ni gaw, masha hpe sha tsawra myit madun ai n re. Nye a gwi ni hpe mung tsawra ai. Lani mi hta, leng makau kaw tsap nga ai I-ling gaw nye a gwi ni hpe bisakit muk jaw sha ai. Dai hpang, dai makau de du shagu, gwi ni gaw Sakse Hkam ni kaw sha sa mayu nga ai.

“Dai hku nna shata law law lai mat ai. Gwi ni bisakit sha nga ai laman, ngai mung Sakse Hkam ni hte ga shaga byin ai. Raitim, shanhte hpe nau n hkau gwi shi ai. Ngai gaw asak 70 jan sai. Sakse Hkam ni a makam masham hpe nau n chye ai. Protestint Church hpe myit htum ai majaw, tinang hkrai Chyum Laika hkaja ai gaw kaja htum re ngu myit da ai.

“Dai aten laman, mare kaw na kaga shara ni hta mung, leng makau kaw tsap nga ai Sakse Hkam ni hpe sadi hkrup ai. Shanhte gaw hku hkau chye ai. Chyum Laika ga san ni hpe mung htai ya ai. Dai majaw, shanhte hpe grau kam wa ai.

“Lani mi hta, I-ling gaw, ‘Dusat ni gaw Karai Kasang kaw na kumhpa re ai ngu shadu ai kun?’ ngu san ai. ‘Shadu ai’ ngu bai htai dat ai. Dai shaloi, shi gaw Esaia 11:6-9 hpe hti dan ai. Dai gaw nye prat hpe galai shai ya ai. Dai aten du hkra, shanhte a laili laika ni hpe ngai n hkap la shi ai.

“Hpang shani ni hta, I-ling, shi madu wa Bran hte rau Chyum Laika lam loi mi bawngban byin ai. Hkristan ajet byin ai hta hpa ni lawm ai lam chye na matu, Mahte Laika kaw nna Kasa Laika du hkra hti yu na matu, shan n-gun jaw ai. Ngai mung hti yu ai. Kade n na yang, shan hte rau Chyum Laika hkaja na matu hkap la dat ai. Dai gaw 2016, gin htawng ta hta re.

“Bat shagu, Chyum Laika hkaja na matu, zuphpawng lung na matu sha la nga ai. Chyum Laika teng sha sharin ya ai hpe chye wa ai majaw, shaman chyeju lu ai ngu hkamsha nna ngwi pyaw wa ai. Laning mi jan daram na ai hpang, Yehowa Sakse langai hku nna hkalup hkam la ai. Ya asak 79 ning rai sai. Tengman ai lam hta du nga sai hpe chye ai. Yehowa a mungkan grup dinghku hta shang lawm lu ai gaw shaman chyeju re.”