Wudang gaw Hkristan ni a madung masat dingsat re ngu nna masha law malawng mu mada ma ai. Raitim, Chyum Laika hta Yesu si ai shaloi lang wa ai hkingrai hpe n tsun da ai majaw, dai hkingrai a hkrang hpe kadai mung tup hkrak n lu chye ai. Raitim, Yesu gaw wudang hta n re ai sha, ading sha rai nga ai hpun shadaw hta si ai ngu nna Chyum Laika hta madi madun da ai hpe gaw mu lu ai.

 Yesu sat hkrum ai shaloi lang wa ai hkingrai hpe tsun ai shaloi, Chyum Laika hta law malawng hku nna Sataw rot (stau·rosʹ) ngu ai Grik ga si hpe lang da ai. (Mahte 27:40; Yawhan 19:17) Ndai ga si hpe “wudang” ngu nna ga gale nga ma tim, “ding ai shadaw” ngu nna lachyum nga ai hpe Chyum hpaji du law law gaw myit hkrum ma ai. a Laika buk langai (A Critical Lexicon and Concordance to the English and Greek New Testament) hta, Sataw rot ngu ai ga si gaw “hpun pyen lahkawng hpe n da hku kayat shakap nna matut da ai lachyum n re” ngu nna tsun da ai.

 Chyum Laika hta Sataw rot ngu ai ga si hte lachyum bung ai zai lun ngu ai Grik ga si hpe mung lang da ai. (Kasa 5:​30; 1 Petru 2:​24) Ndai ga si gaw “hpun daw,” “hpun pyen,” “hpun shadaw” shing nrai “hpun” ngu nna lachyum nga ai. b Laika buk langai (The Companion Bible) hta ndai hku tsun ai: “Ga shaka ningnan Chyum Laika hta hpun shadaw lahkawng hpe tsun mayu ai lachyum kachyi mi pyi n nga ai.”

Wudang hpe akyu jashawn nna nawku dawjau ai hpe Karai Kasang hkap la na kun?

 Yesu hpe sat ai shaloi lang wa ai hkingrai gaw gara hku mi raitim, lawu na lam ni hte Chyum daw ni gaw nawku dawjau ai lam hta wudang hpe n lang ging ai hpe madun nga ai.

1.   Wudang hte hpawn gawng ngu sumla ni hte masat dingsat ni hpe lang nna, nawku dawjau ai hpe Karai Kasang n hkap la ai. Karai Kasang gaw Israela masha ni hpe nawku dawjau ai lam hta “tawk ai sumla” yawng hpe n lang na matu tsun wa ai. Dai hte maren, Hkristan ni hpe mung “sumla naw ku na lam hpe koi gam mu” ngu nna tsun da ai.​—Tara Jahprang 4:​15-​19; 1 Korinhtu 10:14.

2.   Tsa ban langai na Hkristan ni gaw, nawku dawjau ai lam hta wudang hpe n lang wa ai. c Kasa ni sharin achyin ya ai lam ni hte shanhte a kasi ningli ni hpe Hkristan ni yawng hkan sa ging ai.​—2 Htesaloni 2:​15.

3.   Wudang hpe lang nna nawku dawjau ai gaw shut shai ai nawku htung kaw na yu hkrat wa ai re. d Yesu si ai shaning tsa hku na ai hpang Church ni gaw Yesu a sharin achyin ai lam ni kaw na shai mat nna, hpung masha nnan ni hpe wudang hte hpawn “shut shai ai masat dingsat ni, kumla ni hpe lang na ahkang jaw wa ai.” (The Expanded Vine’s Expository Dictionary of New Testament Words) Rai timung, kaga masha ni hpung shang wa hkra, shut shai ai masat dingsat ni hpe jailang nga ai hpe gaw Chyum Laika n hkap la ai.​—2 Korinhtu 6:​17.