N re ai nga nna Chyum Laika hta ahkyak shatai tsun da ai. Masha ni a matu Karai Kasang a yaw shada ai lam hta yakhkak jamjau lam n lawm ai. Raitim, shawng nnan na yan la gaw, Karai Kasang a uphkang lam hpe gumlau wa ai. Karai Kasang a tsang madang hpe n hkan sa ai sha, kaja ai n kaja ai hte seng nna tinang nan tsang madang ni jahkrat na matu lata wa ai. Karai Kasang kaw nna shan kayin mat ai majaw, lu la ai akyu gaw yakhkak jamjau ai lam re.

 Shan a n kaja ai hku lata wa ai lam a majaw, anhte ni daini hkrum sha nga ai re. Raitim, masha ni hkrum nga ai yakhkak jamjau lam ni gaw Karai Kasang kaw nna sa ai n re.

 Chyum Laika hta ndai hku tsun da ai: “Gunglau hkrum yang, Karai Kasang ngai hpe gunglau da nngai, nga nna kadai mung hkum tsun u ga: kaning rai nme law, n hkru n hkra ai gaw Karai Kasang hpe gunglau di lu ai n rai; shi hkum nan kadai hpe mung gunglau jahkrum nga ai n rai.” (Yaku 1:13) Masha yawng yakhkak jamjau hkrum chye ai. Karai Kasang a ra sharawng lam lu ai ni pyi hkrum nga ai.