Mungkam simsa lam lu na matu, shinggyim masha ni a shakut galaw nga ai lam ni gaw hkrat sum nga ai. Matut nna mung hkrat tsum nga na re. Hpa majaw hkrat sum nga ai hpe yu yu ga.

•   “Shinggyim masha gaw tinang lam hpe n up nga ai . . . hkawm wa yang pyi, shi gaw tinang lagaw lahkam hpe hkang lu ai n rai.” (Yeremia 10:23) Karai Kasang gaw shiggyim masha hpe hpan ai shaloi, shada da up hkang na ahkang hte up hkang lu ai atsam n bang da ya ai. Dai majaw, galoi mung grin nga na simsa lam lu hkra masha ni n lu galaw ai.

•   “Hpa hta mung n karum lu ai, du ni hte, Shinggyim masha hpe, hkum hpa nga myit. Shi a nsoi nsa hkyet mat yang, Shi ga de bai nhtang mat wa ai rai nna, Dai shani jang, shi maw ai hku yawng hten mat wa ai.” (Shakawn 146:3, 4) Up hkang du ni gaw kaja ai myit jasat nga tim, majan byin shangun ai lam ni hpe aten na na koi yen lu hkra n galaw ya lu ai.

•   “Hpang jahtum na nhtoi ni hta e, yak la ai aten du na ra ai, chye nga u, kaning rai nme law, masha ni gaw, . . . myit matse ai ni, kaja lam hpe ndawng ai ni, mayun gumlau ai ni, sadi n dung ai ni, myit tsaw myit dap ai ni, . . . rai na mara ai.” (2 Timohti 3:1–4) Simsa lam lu na matu yak shangun ai myit jasat ni chyam bra nga ai ndai nhkru ai mungkan a “hpang jahtum na nhtoi ni” hta anhte asak hkrung nga ai.

•   “Ginding aga hte nammukdara chyawm gaw dingnye lu ma ai: kaning rai nme law, Nat gaw, shi a nhtoi loi mi sha ngam sai chye wu ai majaw, n-yun bu let nanhte hpang de yu wa sai.” (Shingran 12:12) Karai Kasang a hpyen Satan gaw, mungkan ga grup-yin kaw sha nga na matu masat da hkrum nna shi a n hkru n kaja ai myit jasat ni masha ni hta nga wa hkra galaw nga ai. Shi gaw “ndai mungkan Du wa” rai nga dingyang anhte ni simsa let galoi mung lu nga na n re.​—Yawhan 12:31.

•   “[Karai Kasang a Mungdan] gaw ya tsun ai mungdan ni yawng hpe, agrawp shamyit kau nna, dai nan htani htana a grin nga na ra ai.” (Daniela 2:44) Mungkam hpe htani htana simsa shangun mayu ai anhte ni a myit hpe masha asuya n re ai sha, Karai Kasang a Mungdan sha shadik ya lu na re.​—Shakawn 145:16.