Hpang jahtum na nhtoi hta chyam bra loi ai, kap bra ana ni byin wa na ngu Chyum Laika hta tau hkrau tsun da ai. (Luka 21:11) Raitim, ndai kap bra ana ni gaw, masha ni hpe Karai Kasang dam jaw ai n re. Kaja nga yang, Karai a Mungdan gaw, kap bra ana hte hpawn, hkam kaja lam hte seng ai manghkang yawng hpe yeng seng kau ya sana re.

•  Chyum Laika hta kap bra ana hte seng nna tau hkrau tsun da ai kun?

•  Machyi makaw lam ni hte masha ni hpe Karai Kasang dam jaw ai kun?

•  Dai ni aten na kap bra ana ni gaw Karai Kasang dam jaw ai rai kun?

•  Kap bra ana ni ngut gaw ngut mat na kun?

•  Machyi makaw lam hte seng na tsun da ai chyum daw ni

 Kobit 19, AIDS, Sping waw waw ana (Spanish flu) ni a lam Chyum Laika hta laksan hku nna tsun da ai gaw n nga ai. Raitim, “ana zinli” ni byin wa na ngu gaw tau hkrau tsun da ai. (Luka 21:11; Shingran 6:8) Dai ni gaw, “hpang jahtum na nhtoi” a namik kumla ni re.—2 Timohti 3:1; Mahte 24:3.

 Machyi makaw lam ni hte masha ni hpe Karai Kasang dam jaw ai mabyin masam nkau mi a lam Chyum Laika hta tsun da ai. Ga shadawn, masha nkau hpe manggang ana kap shangun ai. (Bu Hkawm 12:1-16; 2 Hkawhkam 5:20-27; 2 Hkawhkam Labau 26:16-21) Raitim, dai ari zinli ni gaw mara n nga ai ni hpe n hkra ai. Karai Kasang hpe gumlau ai marai langai ngai a ntsa sha du ai tara je yang ai lam ni re.

 N re. Kap bra ana ni, machyi makaw lam ni hte masha ni hpe Karai Kasang dam jaw ai ngu tsun ai ni nga ai. Chyum Laika hta gaw dai hku n tsun da ai. Hpa majaw kun?

 Lam langai gaw, moi prat hte ya prat na Karai hpe nawku nga ai ni gaw machyi makaw hkrum ma ai. Ga shadawn, sadi dung ai Timohti gaw, “chyahkring hkring machyi wa wa” re ai. (1 Timohti 5:23, JCLB) Dai gaw Karai Kasang dam jaw ai re ngu Chyum Laika hta n tsun da ai. Ya prat hta mung, Karai Kasang ntsa sadi dung ai ni machyi makaw hkrum nga ma ai. Kap bra ana ni byin nga ma ai. Dai mung, n nga ging ai aten hta n nga ging ai shara kaw du taw ai majaw re.—Hpaji 9:11.

 Dai sha n-ga, nhkru ai masha ni hpe Karai Kasang dam jaw na aten n du shi ai ngu Chyum Laika hta tsun da ai. Teng nga yang, anhte gaw “hkye hkrang la ai nhtoi” hta asak hkrung nga ai re. (2 Korinhtu 6:2) Karai Kasang gaw masha yawng hpe hkye hkrang lam lu shangun mayu ai. Dai majaw shi hte hku hkau hkra shakut u ngu nna masha ni hpe saw shaga nga ai. Saw shaga ai lam langai gaw, mungkan ting hta ‘mungdan kabu gara shi ga’ hkaw tsun ai hku nna re.—Mahte 24:14.

 Ngut mat na re. Kade n na yang, langai mi pyi machyi sana n re ngu Chyum Laika hta tau hkrau tsun da ai. Karai a Mungdan uphkang ai npu hta ana ahkya, machyi makaw langai mi pyi n nga hkra galaw ya na re. (Esaia 33:24; 35:5, 6) Yakhkak jamjau ai, hkra machyi ai lam ni, si hkrung si htan ni hpe yeng seng kau ya sana re. (Shingran 21:4) Si mat ai ni hpe bai jahkrung sharawt ya na re. Hkum tsup nna, hkam kaja let mungkan ntsa nga lu na re.—Shakawn 37:29; Kasa 24:15.

 Shingran 6:8: “Shaloi ngai yu yang, yu u, atsit nsan ai gumra nga nga ai rai nna, dai hta jawn ai wa a amying gaw, Si du rai nga ai; katsan ga mung dai wa kaw hkan nang nga ai. . . . ana ahkya . . . hte sat kau na matu, lamu ga daw mali hta na daw mi a ntsa e up ai ahkang, shanhte lu la ma ai.”

 Lachyum: Shingran laika hta lawm ai gumra jawn ai marai mali hte seng ai myihtoi ga gaw, anhte a prat hta kap bra ana ni byin wa na ngu ai hpe madun dan ai.