Chyoi pra ai wenyi ngu ai gaw, Karai Kasang asung jashawn ai n-gun atsam re. (Mihka 3:8; Luka 1:35) Karai Kasang gaw shi a myit ra ai lam ngut kre awng dang lu hkra, chyoi pra ai wenyi hpe shangun dat ai.​—Shakawn 104:30; 139:7.

 Chyum Laika hta lawm ai “wenyi” ngu ai ga si gaw Hebre ga si ruʹach hte Greek ga si pneuʹma kaw nna ga gale da ai re. Dai ga si ni gaw, Karai Kasang a n-gun atsam (sh) chyoi pra ai wenyi hpe law malawng tsun mayu ai re. (Ningpawt 1:2) Raitim, Chyum Laika hta ruʹach hte pneuʹma hpe ndai hku nna mung ga gale da ai:

•   Nsoi nsa.​—Habaku 2:19, 20; Shingran 13:15.

•   Nbung.​—Ningpawt 8:1; Yawhan 3:8.

•   Hkrung mahkrung yawng hta nga ai nsoi nsa.​—Yoba 34:14, 15.

•   Masha langai a myit masin.​—Bu Hkawm 14:24.

•   Karai Kasang hte lamu kasa ni zawn, masha myi hte n mu lu ai wenyi hkum ni.​—1 Hkawhkam 22:21; Yawhan 4:24.

 Ndai lachyum yawng gaw, masha a myi hte n mu lu ai lama ma hpe tsun mayu ai re. Karai Kasang a chyoi pra ai wenyi mung, “nbung zawn, n mu lu ai, atawng apa n nga ai lam raitim, dagu nga ai atsam re.”​—An Expository Dictionary of New Testament Words, by W. E. Vine.

 Chyum Laika hta, Karai Kasang a chyoi pra ai wenyi hpe, Karai Kasang a “layung” “lata” nga nna tsun da ai. (Shakawn 8:3; 19:1; Luka 11:20; Mahte 12:28 hte shingdaw yu u.) Lata hpaji chye ai wa gaw, shi a lata hte layung ni hpe akyu jashawn ai zawn, Karai Kasang mung chyoi pra ai wenyi hpe jailang nna ndai lam ni hpe galaw wa ai:

•   Ninggawn tawa.​—Shakawn 33:6; Esaia 66:1, 2.

•   Chyum Laika.​—2 Petru 1:20, 21.

•   Karai Kasang a mayam ni galaw wa ai mauhpa amu ni hte shanhte a myit rawt ai hkaw tsun magam.​—Luka 4:18; Kasa 1:8; 1 Korinhtu 12:4-11.

•   Karai Kasang hpe madat mara ai masha ni madun ai kaja ai atsam ningja ni.​—Galati 5:22, 23.

Chyoi pra ai wenyi gaw marai hkum n re

 Chyoi pra ai wenyi hpe Karai Kasang a “layung” “lata” ‘a hpawt dat ai’ nga nna tsun da ai hpe yu yang, chyoi pra ai wenyi gaw marai hkum langai n re ai hpe chye lu ai. (Pru Mat 15:8, 10) Lata hpaji chye ai wa a lata ni gaw, shi a hkum hkrang hte myit masin lam matsun ai hte maren galaw ai zawn, Karai Kasang a chyoi pra ai wenyi mung, Karai a lam matsun ai hte maren galaw ai. (Luka 11:13) Chyum Laika hta Karai Kasang a chyoi pra ai wenyi hpe, ntsin hte shingdaw da nna makam masham, machye machyang ni hte mung ginrun nna madun da ai. Ndai shingdaw da ai lam ni hpe yu yang, chyoi pra ai wenyi gaw marai hkum n re ai hpe chye lu ai.​—Esaia 44:3; Kasa 6:5; 2 Korinhtu 6:6.

 Chyum Laika hta Karai Kasang a amying hpe Yehowa, Kasha a amying hpe Yesu Hkristu nga nna tsun da tim, chyoi pra ai wenyi a amying hpe gaw, gara shara kaw mung n tsun da ai. (Esaia 42:8; Luka 1:31) Hkristan langai re ai Stehpan mu wa ai laklai ai sumsing lamu shingran hta, marai masum n re ai sha marai lahkawng sha rai nga ai. Chyum Laika hta ndai hku tsun da ai: “Shi chyawm gaw chyoi pra ai Wenyi hpring nna, lamu de azi yu wu yang, Karai Kasang a hpung shingkang hte Karai Kasang a hkra maga de Yesu tsap nga ai hpe, mu wu ai.” (Kasa 7:55) Stehpan gaw, Karai Kasang a atsam re ai chyoi pra ai wenyi a majaw ndai shingran hpe mu wa ai re.

 Chye na shut ai lam: Chyoi pra ai wenyi gaw Masum Raitim Langai Karai hta lawm ai. Hpa majaw nga yang, Mahte 28:19, 20 hta tsun da ai majaw re.

 Teng man lam: Mahte 28:19, 20 hta Kawa, Kasha hte chyoi pra ai Wenyi hpe arau madun da ai. Dai majaw, masha nkau gaw Masum Raitim Langai Karai re ngu tsun ma ai. Raitim, dai Chyum daw hpe atsawm hti yu u. Dai Chyum daw hta masum raitim langai sha re ai Karai gaw, htani htana grin ai, atsam nga ai, arawng sadang nga ai, nyan hpaji nga ai ngu nna tsun da ai kun? N tsun da ai. Kaga Chyum daw ni hta mung dai masum hpe arau madun da ai.

 Chye na shut ai lam: Chyoi pra ai wenyi hpe Chyum Laika hta marai hkum langai hku ka da ai majaw, marai hkum langai re ai gaw teng sha re.

 Teng man lam: Chyoi pra ai wenyi hpe marai hkum langai hku nna Chyum Laika hta ka da ai shara nga ai. Ga shadawn, Yesu gaw, chyoi pra ai wenyi hpe “shalan shabran ai wa” nga nna tsun da ai. Ndai shalan shabran ai wa gaw dan leng hkra madun dan na, sharin shaga na, hkaw tsun na, na lu na, hpung atsam hpe dan dawng shangun na, hkap la na nga nna tsun wa ai. (Yawhan 16:7-15) Dai hku tsun da ai majaw, chyoi pra ai wenyi gaw, marai hkum re ai ngu n mai tsun ai. Chyum Laika hta nyan hpaji, si hkrung si htan hte mara ni hpe mung marai hkum hku nna ka da ai lam ni nga ai. (Ga Shagawp 1:20; Roma 5:17, 21) Ga shadawn, nyan hpaji a “amu bungli” “kasha nlang” ni a lam tsun da ai hte maren, yubak mara gaw hkalem ai, sat ai, ra marin ai lam hpe byin shangun ai nga nna tsun da ai.​—Mahte 11:19; Luka 7:35; Roma 7:8, 11.

 Chye na shut ai lam: Chyoi pra ai wenyi hte hkalup hkam ai ngu tsun da ai majaw, dai gaw marai hkum rai ra ai.

 Teng man lam: Chyum Laika hta “amying” hpe kalang lang, ahkang aya hku nna malai tsun da ai. (Tara Jahprang 18:5, 19-22; Eshta 8:10) Inglik ga hta “upadi hte maren” ngu nna tsun ai shaloi, “upadi a mying hte” (in hte name of hte law) ngu tsun chye ai. Raitim, upadi ngu ai gaw marai hkum n re ai. Dai zawn sha, chyoi pra ai wenyi a “amying nsang hta” hkalup hkam ai ngu tsun ai shaloi, Karai Kasang a yaw shada lam awng dang ngut kre ai hta chyoi pra ai wenyi a dagu hte shi a lam hpe chye ai ngu tsun mayu ai re.​—Mahte 28:19.

 Chye na shut ai lam: Yesu a kasa ni hte tsa ban langai na sape ni gaw chyoi pra ai wenyi hpe marai hkum hku nna kam wa ai.

 Teng man ai lam: Ndai lam hpe Chyum Laika hta n tsun da ai zawn, labau hta mung n mu lu ai. Encyclopædia Britannica Chyum hta ndai hku tsun da ai: “Chyoi Pra Ai Wenyi gaw Karai Kasang langai re ai lam hpe lachyum hpaw da ai hpe . . . A.D. 381 hta galaw ai Constantinople zuphpawng hta tsun dan wa ai.” Dai gaw kasa ni si mat nna, shaning 250 jan na yang she, paw pru wa ai lam re.