Ṛebbi ur ixeddem ara lxilaf ger yemdanen: yebɣa ad ibarek lɛibad meṛṛa.

Ṛebbi yefka-d lweɛd-agi i Sidna Ibṛahim (Abṛaham): “Leǧnas meṛṛa n ddunit ad ţţubarken yis-ek.”​—Laṣel n ddunit 12:3.

D acu ara d-nelmed? Ṛebbi iḥemmel-aɣ mliḥ yerna yebɣa ad ibarek tiwaculin meṛṛa i s-yeţţaɣen awal: irgazen, tilawin, arrac.

Ṛebbi d Bab n ṛṛeḥma yerna yeţbarak wid yeţnadin a t-issinen.

Ṛebbi, Bab n Tezmert, yefka lǧehd i Sidna Musa akken ad yexdem lbeṛhanat (lmuɛǧizat) imeqranen. Ɣas akken, Sidna Musa yeẓẓull, yenna: “Mel-iyi iberdan-ik, a k-issineɣ; iwakken ad afeɣ lemzeyya ɣur-ek.” (Tuffɣa 33:13) Taẓallit-agi n Sidna Musa teɛǧeb-as i Ṛebbi yerna iburek-it: Ṛebbi iɛawen-it ad yennerni di tmusni, ad yefhem amek i gesselḥay timsal w’ad yissin ṣṣifat-ines. Ɣef lemtel, Sidna Musa yelmed belli Ṛebbi d “aḥnin, [...] d bab n ṛṛeḥma.”​—Tuffɣa 34:6, 7.

D acu ara d-nelmed? Ṛebbi yebɣa ad ibarek wid akk yeţnadin a t-issinen akteṛ, ama d irgazen, ama ţ-ţilawin, ama d imecṭaḥ. Di Tira Iqedsen, Ṛebbi yessefham-ed amek i glaq a t-neɛbed, yerna yebɣa a ɣ-ibarek seg wul w’a naf lemzeyya ɣur-es.

Nezmer a neţţubarek i lebda sɣur Ṛebbi ma neţnadi a nissin Sidna Ɛisa, ayen i gexdem d wayen i gesselmed.

Tira Iqedsen sselmadent-aɣ aṭas n leḥwayeǧ ɣef tudert n Sidna Ɛisa d wayen yesselmed. Yefka-yas Ṛebbi tazmert ad yexdem aṭas n lbeṛhanat. Ɣef lemtel, yerra-d iẓri i iderɣalen, yesseḥla iɛeẓẓugen akk-d iɛibanen. Yesseḥya-d ula d wid yemmuten. Swakka, yessken-ed amek ara ibarek Ṛebbi lɛibad meṛṛa ɣer zdat. Yessefhem-ed d acu i glaq a t-yexdem mkul yiwen iwakken a t-id-ṣaḥent lbaṛakat-agi: “Tudert n dayem: d asm’ara issinen yemdanen belli d kečč i d Ṛebbi awḥid, Illu n tideţ, ad issinen daɣen Ɛisa Lmasiḥ, win akken i d-tceggɛeḍ.”​—Yuḥenna 17:3, Awal n Tudert, 2001.

Sidna Ɛisa ḥnin, ţɣiḍin-t medden yerna yeţḥunnu fell-asen. Lɛibad meṛṛa ḥemmlen ad ṛuḥen ɣur-es, ama d yergazen, ama ţ-ţulawin, ama d imecṭaḥ, ama d imeqranen. D neţţa s yiman-is i ten-id-iɛerḍen, mi sen-yenna: “[Lemdet] sɣur-i, axaṭer nekk, d aḥnin, yerna unzeɣ seg wul: Ad ṛtiḥent teṛwiḥin-nwen.” (Matta 11:29) Sidna Ɛisa ur yeḥqir ara tilawin am lɛibad n zzman-ines. Neţţa yelha yid-sent, yeţqadar-itent yerna yeţţak-asent lḥeṛma.

D acu ara d-nelmed? Sidna Ɛisa iḥemmel mliḥ lɛibad. Yesselmed-aɣ akken ilaq amek i d-yewwi a sen-nleḥḥu i wiyaḍ.

Tira Iqedsen sselmadent belli “ɣuṛ-nneɣ nukni yiwen kan n Ṛebbi i gellan” yerna Sidna Ɛisa yeqbel s wannuz ad yili d amceggeɛ n Ṛebbi. (1 Ikurintiyen 8:6, Awal n Tudert, 2001) Sidna Ɛisa s yiman-is yenna-d belli Ṛebbi yugar-it yerna d Ṛebbi i t-id-iceggɛen ɣer lqaɛa. *​—Yuḥenna 11:41, 42; 14:28.