AḤRIC WIS 8
Ma yella teḍra-d twaɣit
“Tura, imi d ayen ilaqen, a kwen-sḥeznent i kra n lweqt aṭas n lemḥayen.”—1 Buṭrus 1:6
Ɣas ma yella txeddmeḍ ayen akk umi i tzemreḍ bac aţ-ţiliḍ d aseɛdi kečč ţ-ţmeṭṭut-ik akk-d twacult-ik, tezmer ahat a d-teḍru twaɣit. Di liḥala am tagi, yezmer a k-iṛuḥ lfeṛḥ-ik. (Amusnaw 9:11) M’ara d-nemmager uguren, Ṛebbi yeţɛawan-aɣ s leḥmala. Ma tessexdmeḍ imenzayen ara d-itebɛen, i d-yekkan seg Wedlis Iqedsen, aţ-ţizmireḍ aţ-ţqableḍ kečč ţ-ţwacult-ik ula ţ-ţiswiɛin iweɛṛen nezzeh.
1 ŢKEL ƔEF YAHWA
AYEN I D-IQQAR WEDLIS IQEDSEN: “Rret iɣweblan-nwen meṛṛa ger ifassen-is, axaṭer iţḥebbiṛ fell-awen.” (1 Buṭrus 5:7) Ɣur-ek aţ-ţeţţuḍ belli mačči d Ṛebbi i d ssebba n cceddat-ik. (Yeɛqub 1:13) Ma yella teţqerribeḍ ɣur-es, a k-iɛiwen akken iqwem lḥal. (Icɛaya 41:10) ‘Smaray-ed ul-ik zdat-es!’—Ahellil 62:9.
Aţ-ţafeḍ daɣen lǧehd ma yella teqqareḍ yerna tessenqadeḍ Adlis Iqedsen kul ass. A d-terreḍ s lexbaṛ belli d Yahwa “i ɣ-iţṣebbiren di lemḥayen-nneɣ meṛṛa.” (2 Ikurintiyen 1:3, 4; Iṛumaniyen 15:4) Iwɛed belli a k-d-yefk “lehna”, “i d-ikkan nnig kra yellan d lefhama.”—Ifilibiyen 4:6, 7, 13.
AYEN I TZEMREḌ AŢ-ŢXEDMEḌ:
-
Ḍleb i Yahwa a k-iɛiwen akken aţ-ţesɛuḍ leɛqel w’aţ-ţeẓreḍ d acu ara txedmeḍ
-
Wali d acu-tent leḥwayeǧ meṛṛa i tzemreḍ aţ-ţxedmeḍ textiṛeḍ tin yellan d lɛali, i k-isehlen
2 ḤADER IMAN-IK, TḤADREḌ TAWACULT-IK
AYEN I D-IQQAR WEDLIS IQEDSEN: “Lfahem ikeţţeb tamusni; ukyisen ţţaken tameẓẓuɣt i tmusni.” (Lemtul 18:15) Nadi aţ-ţeẓreḍ d acu i ţḥussun swaswa iɛeggalen meṛṛa n twacult-ik d wayen i ḥwaǧen. Heddeṛ yid-sen yerna ţḥessis-asen.—Lemtul 20:5.
Ma yella yemmut walbeɛḍ ɛzizen fell-ak, ur ţkukru ara a d-tbeggneḍ leḥzen-inek. Mmekti-d belli ula d Ɛisa “yeţru”. (Yuḥenna 11:35; Amusnaw 3:4) Yelha-yak mliḥ aţ-ţesteɛfuḍ kra n lweqt w’aţ-ţeṛwuḍ iḍeṣ. (Amusnaw 4:6) Ayagi yeţɛawan bnadem ad yeṭṭef di teswiɛt n ccedda.
AYEN I TZEMREḌ AŢ-ŢXEDMEḌ:
-
Ur ţṛaǧu ara alamma teḍra-d twaɣit bac aţ-ţesɛuḍ tannumi aţ-ţheddṛeḍ akk-d iɛeggalen n twacult-ik. Akka, ma yella ḍran-d wuguren, a sen-yishil lḥal a k-d-hedṛen
-
Hdeṛ akk-d yemdanen iwumi i d-teḍra taluft yecban tagi-inek
3 NADI LEMƐAWNA TQEBLEḌ-Ţ
AYEN I D-IQQAR WEDLIS IQEDSEN: “Aḥbib iḥemmel di mkul lweqt”, ula di “lweqt n ccedda.” (Lemtul 17:17) Leḥbab-ik bɣan a k-ɛiwnen, meɛna ahat ur ẓrin ara amek. Ur ţkukru ara a sen-tiniḍ ayen swaswa i teḥwaǧeḍ. (Lemtul 12:25) Nadi daɣen lemɛawna di leḥwayeǧ n ṛṛuḥ ɣur wid i gfehmen Adlis Iqedsen. Lewṣayat ara k-d-fken seg Wedlis Iqedsen a tent-teḥwiǧeḍ.—Yeɛqub 5:14.
Aţ-ţafeḍ lemɛawna i k-iwulmen ma teţɛacaṛeḍ daymen wid yesɛan s ṣṣeḥ liman di Ṛebbi yerna yeţţamnen s lewɛud-is. Aţ-ţafeḍ daɣen xilla n lǧehd m’ara teţţakeḍ afud i wid yeḥwaǧen. Ḥku-yasen ɣef liman i tumneḍ s Yahwa akk-d lewɛud-is. Ţɛawan dima wiyaḍ, yerna ur ɛezzel ara iman-ik ɣef wid i k-iḥemmlen, i geţḥebbiṛen fell-ak.—Lemtul 18:1; 1 Ikurintiyen 15:58.
AYEN I TZEMREḌ AŢ-ŢXEDMEḌ:
-
Ḥku i walbeɛḍ seg yeḥbiben-ik iɣef i tţekleḍ, teǧǧeḍ-t a k-iɛiwen
-
Ini-yas swaswa d acu i teḥwaǧeḍ yerna hdeṛ-as ɛinani