AḤRIC 15
D acu i xeddmen lecyux n tejmaεt?
Lecyux-nneɣ ur llin ara d lḥekkam n ddin i geţwaxellaṣen ɣef wayen i xeddmen. Sεan lεalaqa iǧehden akk-d Yahwa yerna ţwaxtaṛen bac ad ksen tajmaεt n Ṛebbi, am wid n lqern amezwaru. (Lecɣal 20:28) Ṭṭebbiqen ccuruṭ i d-iḥudd Wedlis Iqedsen, daymi i ssawḍen ad wellhen tajmaεt w’a d-lhin yid-es. Acu kan, ur xeddmen ara ayagi “s tin n bessif, lameεna seg wul, [yerna] mačči s ṭṭmeε, lameεna s leḥṛaṛa.” (1 Buṭrus 5:1-3) Acu i xeddmen ɣef lǧal-nneɣ?
Lehhun-d yid-neɣ yerna ţḥaraben fell-aneɣ. Lecyux ţwellihen tajmaεt, ţḥaraben fell-as yerna ţεawanen-ţ akken aţ-ţeṭṭef di Yahwa. Imi ẓran belli d Ṛebbi i ten-iwekklen ɣef ccɣel-agi ameqran, ur ḥekkmen ara deg-neɣ; deg wemkan n waya, ţεawanen-aɣ akken a naf akteṛ n lehna d lfeṛḥ. (2 Ikurintiyen 1:24) Lecyux-agi ţnadin ad issinen mkul yiwen si tejmaεt, am umeksa i d-ilehhun d yal tixsi seg wulli-ines.—Lemtul 27:23.
Ţwerrin-aɣ-d amek ara nexdem lebɣi n Ṛebbi. Mkul smana, lecyux sseddayen inejmuεen bac ad sseǧhden liman-nneɣ. (Lecɣal 15:32) Irgazen-agi, yeţţaken mliḥ si tezmert-nsen, ţţilin daɣen d lemtul n lεali deg uberreḥ. Ţberriḥen yid-neɣ yerna sselmaden-aɣ mkul ṣṣenf n ubecceṛ.
Sseǧhaden-aɣ. Lecyux ţmeslayen yid-neɣ di Tzeqqa n Tgelda yerna rezzun-d fell-aneɣ s axxam bac ad εiwnen mkul yiwen deg-neɣ akken ad yesseǧhed lεalaqat-ines d Yahwa. Xeddmen aya bac a ɣ-εiwnen w’a ɣ-d-fken afud s Wedlis Iqedsen.—Yeεqub 5:14, 15.
Ţ-ţideţ, lecyux qeddcen di tejmaεt. Lameεna, amur ameqran seg-sen sεan daɣen lxedma yerna ilaq-asen a d-lhin ţ-ţwaculin-nsen; annect-a yeṭṭalab-asen-d xilla n lweqt. Atmaten-agi “iqeddcen” s leεtab uklalen a ten-nqader.—1 Itisalunikiyen 5:12, 13.
-
D acu i d ccɣel n lecyux?
-
Amek i ţεawanen yal yiwen deg-neɣ?