Ur nţekkay ara di lgirrat ɣef ssebbat-agi:

1.   Neţţaɣ awal i Ṛebbi. Adlis Iqedsen yenna-d ɣef iqeddacen n Ṛebbi: “Ijenwiyen-nsen, a ten-rren ţ-ţigersiwin” yerna ur ḥeffḍen ara ad mmenɣen.—Icɛaya 2:4.

2.   Neţţaɣ awal i Ɛisa. Yiwen wass, yenna Ɛisa i Buṭrus: “Err ajenwi-k s amkan-is. Kra n win ara irefden ajenwi, ad immet s ujenwi.” (Matta 26:52) Swakka, yessefhem-ed Ɛisa belli inelmaden-is ur ilaq ara ad refden leslaḥ.

    Inelmaden n Ɛisa ţḍuɛun lameṛ i sen-d-iǧǧa i d-iqqaren belli ur ilaq ara ad ilin “si ddunit.” Daymi ur ssekcamen ara yakk iman-nsen di lecɣal yeɛnan tasertit. (Yuḥenna 17:16) Ur ţxaṣamen ara wid yebɣan ad kkren ɣer lgirra, ur ţţeɛraḍen ara daɣen a d-ḥebsen wid yebɣan ad uɣalen d iɛsekṛiyen.

3.   Nḥemmel lɣir-nneɣ. Ɛisa iweṣṣa inelmaden-is ad myeḥmalen wway gar-asen. (Yuḥenna 13:34, 35) Ihi, ad uɣalen d yiwet n twacult i d-ikkan si mkul tamurt; iɛeggalen-is ur ţmenɣan ara wway gar-asen axaṭer ad ilin d atmaten ţ-ţyessetmatin.—1 Yuḥenna 3:10-12.

4.   Neţɛanad imasiḥiyen imezwura. Yiwen umawal i d-iheddṛen ɣef ddin d lgirra yenna-d: “Inelmaden imezwura n Ɛisa ţţagin ad ţekkin di lgirra neɣ ad sɛeddin lɛeskeṛ” axaṭer ɣur-sen ayagi “ur yeɛdil ara akk-d leḥmala iɣef i ten-iweṣṣa akk-d lameṛ ideg i sen-yenna ad ḥemmlen iɛdawen-nsen.” Kifkif daɣen, amusnaw n ddin alalmani Peter Meinhold yenna-d belli “Tamezdayt n imasiḥiyen imezwura [...] teţwali belli ur yezmir ara walbeɛḍ ad yili d amasiḥi uyerna d aɛsekṛiw.”

 Inagan n Yahwa d imdanen iṣelḥen i wid i sen-d-yezzin. Ulac acu n lemḍerra i zemren a d-awin i tmura-nsen. Ţqadaren lḥekkam, akken i t-id-nnan lumuṛ-agi n Wedlis Iqedsen:

•   “Mkul yiwen ad iḍuɛ lḥukumat ɛlayen.”—Iṛumaniyen 13:1.

•   “Fket ihi i Qayṣer ayen yellan n Qayṣer, i Yillu ayen yellan n Yillu.”—Matta 22:21.

 Inagan n Yahwa ţqadaren leqwanen, ţxelliṣen leɣrama yerna ţţaken afus n lemɛawna i lḥukumat di lmeǧhud i xeddment bac a d-awint leṣlaḥ i cceɛb.