Qqaren-d: Ur teţɛeggidem ara Nuwal axaṭer ur teţţamnem ara s Ɛisa.

 Di tin n ṣṣeḥ: Nekni d imasiḥiyen. Neţţamen belli leslak s Ɛisa Lmasiḥ kan ara d-yili.—Lecɣal 4:12.

 Qqaren-d: Tferrqem tiwaculin, axaṭer tesselmadem i wid yellan di ddin-nwen akken ur xeddmen ara Nuwal.

 Di tin n ṣṣeḥ: Neţḥebbiṛ s ṣṣeḥ ɣef twaculin. Nessexdam Adlis Iqedsen bac a nesseǧhed tadukli-nsent.

 Qqaren-d: Ur tefhimem ara d acu i d lmeɛna n Nuwal; Nuwal ţ-ţikci mebla cceḥḥa, d lehna ɣef lqaɛa, d lxiṛ ara nxeddem i wiyaḍ.

 Di tin n ṣṣeḥ: Nxeddem ayen akk umi i nezmer bac aţ-ţili lehna gar-aneɣ d wiyaḍ w’a nili d isaxiyen kul ass. (Lemtul 11:25; Iṛumaniyen 12:18) Di lemtel, nxeddem inejmuɛen-nneɣ yerna neţberriḥ Awal n Ṛebbi ɛlaḥsab n lewṣaya-yagi n Ɛisa: “Iţţunefk-awen-d baṭel, fket baṭel.” (Matta 10:8) Yerna, njebbed-ed lwelha n lɛibad ɣer Tgelda n Ṛebbi, axaṭer d neţţat kan iɣef yella leţkal n ṣṣeḥ belli a d-tawi lehna ɣef lqaɛa.—Matta 10:7.

•   Ɛisa yeḍleb ad ɛeggden asmekti n lmut-is mačči n tlalit-is.—Luqa 22:19, 20.

•   Imceggɛen akk-d inelmaden imezwura n Ɛisa ur llin ara ţɛeggiden Nuwal. Taktabt umi i qqaren Le livre des superstitions. Mythes, croyances et légendes tenna-d: “Lɛid n tlalit n Lmasiḥ sbedden-ţ lɛulama n ddin di lqern wis ṛebɛa [mbeɛd Ɛisa] a”, yeɛni xilla n lweqt mbeɛd lmut n yemceggɛen ineggura.

•   Ulac ţţbut belli Ɛisa ilul di 25 bujambeṛ; Adlis Iqedsen ur d-yenni ara acu n wass ideg i d-ilul.

•   Neţţamen belli Ṛebbi ur yeqbil ara Nuwal imi i d-tekka sɣur wid yeţɛebbiden iṛebbiten.—2 Ikurintiyen 6:17.

 Aṭas i geţɛeggiden Nuwal ɣas ma ẓran belli tewwi-d aẓar si leɛwayed n wid yeţɛebbiden iṛebbiten, mačči seg Wedlis Iqedsen. Qqaren-as ahat: Eɛni iwulem dɣa d ṣṣeḥ i imasiḥiyen ad tebɛen ṛṛay ixulfen ṛṛay n lɛamma meṛṛa? Iwacu annect-a yakk n lhedṛa ɣef temsalt-agi?

 Adlis Iqedsen yeţweṣṣi-yaɣ a nmeyyez s yiman-nneɣ, a nessexdem leɛqel-nneɣ. (Iṛumaniyen 12:1, 2) Yesselmad-aɣ a nefk azal i tideţ. (Yuḥenna 4:23, 24) D ṣṣeḥ, neţḥussu s wayen i d-qqaren fell-aneɣ wiyaḍ. Lameɛna, nettabaɛ imenzayen n Wedlis Iqedsen, ɣas ur neţţeɛǧab ara i lɛibad ɣef ddemma n wannect-a.

 Nekni, si lǧiha-nneɣ, nextaṛ ur neţɛeggid ara Nuwal. Meɛna, neţwali belli, yal yiwen yesɛa lḥeqq ad yextiṛ ayen i gebɣa di temsalt-agi; ur d-neggar ara iman-nneɣ.