Di govament dem an di wan dem we a ron tingz iina di worl kyaahn get rid a waar so dat piipl kyan liv iina piis. A wol iip muo waar a gwaan ya nou dan eni ada taim sins Worl Waar 2. Iina di plies dem we dem waar ya a gwaan, a bout 2 biliyan piipl liv de.

 So wa mek di govament dem kyaahn get rid a waar, no kier ou aad dem chrai? Wa di Baibl av fi se bout dis?

1.  1. A piipl mek op govament, an di Baibl tel wi bout som wiez we piipl av we wuda mek it aad fi dem get rid a waar. Di Baibl tel wi se iina di laas die dem, “piipl onggl a-go bizniz wid demself an dem a-go lov moni. Dem a-go gwaan buosi-buosi an ful-a demself, . . . an dem naa go av notn fi du wid Gad. . . . Piipl naa go av no kanchuol uova demself an dem a-go gwaan laik dem a wail daag. Dem a-go ton chrieta an . . . dem a-go gwaan laik dem beta dan evribadi els.”​—2 Timoti 3:2-4.

2.  2. A Jeuova a wan kyan fiks di prablem dem iina di worl. Nobadi els kyaahn dwi’it, weda dem a chrai bai demself ar dem a chrai wok tugeda fi dwi’it. Di Baibl mek wi nuo se “it no op tu man fi iivn disaid fi imself ou im fi waak.”​—Jerimaiya 10:23.

3.  3. A Sietan a ruul di worl. Im powaful, an im wikid, an di Baibl se im a “chrik di uol worl fi sin gens Gad.” (Revilieshan 12:9) Waar an dem kain-a ting de naa go tap so langks “di devl [a] kanchuol di uol worl.”​—1 Jan 5:19.

 Di Baibl mek wi nuo se a Gad aluon kyan get rid a waar so dat piipl kyan get fi liv iina piis. Nobadi pan ort kyaahn du dat.

•   “Jeuova se, ‘Mi nuo wa mi waahn fi gwaan fu’unu. Mi no waahn unu fi av no chobl—nuo sa, mi waahn unu fi av piis iina unu laif. Mi waahn fi mek unu nuo se tingz a-go get beta fi unu.’”​—Jerimaiya 29:11.

 Ou Gad a-go mek dis apm? Di Baibl mek wi nuo se “Gad we gi piipl piis iina dem aat,” a im a-go mash op Sietan. (Ruoman 16:20) Gad a-go yuuz im govament we set op iina evn fi get rid a waar an mek piipl aal uova di worl liv iina piis. Di Baibl kaal da govament de “Gad kindom.” (Luuk 4:43) A Jiizas a di Ruula iina Gad Kindom an wen im tek uova di ort, im a-go mek piipl lorn ou fi liv iina piis wid dem wan aneda.​—Aizaiya 9:6, 7.

•   Riid da sitn ya we niem “What Will God’s Kingdom Accomplish?” fi fain out muo bout dis.