EF YU did get fi go a Indoniizha kopl ier ago, pan wan a di likl ailan dem we niem Sangir Besar, yu wuda si chrii a wi sista dem pan di biich. Piipl did nuo dem kaa dem aalwiez a tiich piipl bout di Baibl. Bot da taim ya a neehn priich dem a priich.

Di fos ting we dem wuda du a waak iina di waata an luk fi som big rakstuon, an den dem wuda kya dem pan di biich. An som a di stuon dem did big laik wan futbaal. An den dem wuda sidong pan som stuul we mek outa wud, an yuuz ama fi brok op dem rakstuon ya iina likl likl piis we likl laik wan eg. Den dem put dem iina som bokit we mek outa plastik, an kya dem op som stiez wich paat dem liv. An den dem wuda put dem stuon ya iina som big bag an den pak dem op iina wan chok so dat piipl kuda yuuz dem stuon ya fi mek ruod.

Wan a dem sista ya did niem Hulda. Kaaz a ou tingz did set op iina ar laif, shi kuda du da wok ya langga dan di ada sista dem kuda dwi’it. An shi wuda yuuz di moni we shi get fi tek kier a ar fambili. Bot da taim ya shi did dwi’it kaa shi did waahn fi bai wan tablit we shi kuda put di JW Library^® ap pan. Hulda did nuo se di vidiyo dem an di ada sitn dem we de pan di JW Library^® ap wuda elp ar iina fiil sorvis an it wuda elp ar fi gwaan stodi so dat shi kyan gwaan andastan di Baibl beta.

So fi wan an a aaf mont, Hulda wok fi tuu owa evri maanin fi brok op stuon we kuda ful op wan likl chok bak. So shi get di moni we shi did waahn fi bai di tablit.

“Wen mi staat fi yuuz di tablit, mi si se it elp mi fi priich beta wen mi de a sorvis, an it mek it iiziya fi mi go chuu di sitn dem fi di miitn dem bifuo mi go de. So kaaz a ou di tablit elp mi, aalduo mi did taiyad bad, an aal paat a mi badi did a at mi kaaz a di uol iip a wok we mi did du, mi figet bout aal a wa mi did go chuu fi get it.” An shi se di tablit did elp ar wen KUOVID did jos staat fi go roun kaa di breda an sista dem did staat fi av di miitn dem an dem ting de panlain. Bot wi nuo se a no Hulda aluon api, wi api tu se shi get wa shi did waahn.