Jos laik wen yu si manggo chrii a blasom yu nuo se manggo suun staat bier, a siem wie so wen wi si som wol iip a sitn a apm wan taim, dat a di sain we shuo wi se “Gad Kindom suun kom.” Jiizas did taak bout aal a dem sitn ya we a-go apm. Im se: “Wan set a piipl a-go waar gens wan neks set a piipl, an wan kindom a-go fait gens wan neda kindom. Big ortkwiek a-go kom, an aal bout, fuud a-go shaat an aal kain-a siknis a-go kil aaf piipl.” (Luuk 21:10, 11) Tingk bout dis. Wen yu luk pan wa a gwaan aal uova di worl, yu si dem sitn ya a apm? Mek wi luk pan di sitn dem we Jiizas did taak bout.

1. WAAR

Piipl we stodi bout tingz we apm fram lang taim se iina 1914 evriting iina di worl chienj wen it kom aan tu waar. A 1914 a di fos taim wan waar did brok out we so moch konchri did en op a fait aaf dem wan aneda. An a dat a di fos taim dem staat yuuz so moch waar tangka, bum we dem jrap outa plien, mashiin gon, paizn gyas an ada tingz fi kil aaf piipl. Afta dat yu did av Worl Waar 2. Da taim de, dem staat yuuz atam bum an som ada tingz we did wikida dan wa dem did a yuuz bifuo. Sins 1914 a bier waar a fait aal uova di worl we kil aaf uol iip a miliyan a piipl.

2. BIG ORTKWIEK

Som piipl fiil se di onggl riizn wa mek it luk laik wi a av muor ortkwiek nou a kaa piipl we stodi bout dem sitn de av muor tingz nou we kyan mek yu nuo wen wan ortkwiek a gwaan. Bot ges wa, iivn ef a so it go, wa wi kyan si a dat wol iip a big ortkwiek a apm roun di worl we a kaaz nof nof piipl fi sofa an ded. Matarafak, wan buk we niem Britannica Academic se evri ier yu av bout 100 ortkwiek we so big dat dem “mash op di plies.” An iina Merika, wan a di plies we dem stodi bout ortkwiek an dem sitn de we niem di United States Geological Survey tel wi se “bies pan wa a gwaan (fram bout 1900) wi kyan ekspek fi get bout 16 big big ortkwiek iina wan ier.”

 3. FUUD A-GO SHAAT

Staavieshan a gwaan aal uova di worl. Wan aaganaizieshan we niem The World Food Programme we elp di konchri dem we puor fi get fuud did av wan ripuot bout wa gwaan iina 2018. An iina da ripuot de it shuo se aal uova di worl 821 miliyan piipl na’av notn muor dan so fi iit. An outa da nomba de, yu av bout 124 miliyan we aalmuos a ded fi onggri. Bout 3.1 miliyan pikni iina di worl ded fram staavieshan evri ier. Matarafak, iina 2011 aalmuos aaf a aal a di pikni dem we ded iina di worl a kaa dem neehn av inof gud fuud fi nyam. So weda it kaaz fram waar, koropshan iina govament, moni prablem, ar di prablem dem we a biit di faama dem, wa wi nuo se a dat fuud shaat rait roun di worl.

4. AAL KAIN-A SIKNIS A-GO DE BOUT AN SOM A-GO PRED AN KIL AAF NOF PIIPL

Wan ripuot fram di World Health Organization se iina di laas twenti ier wi a si muor an muor a di kain-a siknis dem we pred faas an kil aaf nof piipl. Som a dem kain-a siknis ya a som we did de bout fram lang taim, laik kalara, blak det an yelo fiiva. An wi av som nyuu wan laik SARS, som bad fluu we kil aaf nof piipl roun di worl, MERS, Ibuola an Ziika. An di laas wan we brok out aal uova di worl a KUOVID-19. So iivn duo di dakta an saiyantis dem nuo nof muor bout dem siknis ya dan wa dem did nuo wan taim, dem stil kyaahn fain no kyuor fi aal a di siknis dem we de bout ya nou.

5. DI GUD NYUUZ A-GO PRIICH AAL UOVA DI WORL

Iina Matyu 24:14, Jiizas did tel wi bout wan neda sitn we wuda apm we wuda shuo se Gad Kindom suun kom. Im se: “Da gud nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.” Iivn duo so moch bad sitn a apm iina di worl, muor dan iet miliyan piipl fram aal uova di worl a priich di gud nyuuz. Dem a priich bout Gad Kindom iina 240 difrant difrant konchri an iina muor dan 1,000 difrant difrant langwij. Nobadi neva si notn laik dis yet.

Da sain de we Jiizas did tel im falara dem fi luk out fa, aal a di sitn dem we im did se a-go apm a gwaan ya nou. An yu memba wa Jiizas se a Luuk 21:31? Im se: “Enitaim unu si se aal dem sitn de a apm, unu nuo se Gad Kindom suun kom.”

Wen wi mats out som tingz we apm iina di Baibl an wi luk pan di sain we Jiizas did gi, wi si se Gad did set op im Kindom govament iina 1914. a An iina da ier de, Gad mek im Son Jiizas staat fi ruul iina Im Kindom. (Saam 2:2, 4, 6-9) Suun suun, Gad Kindom a-go get rid a aal a di ada govament dem an a it wan gweehn ruul uova di wol ort. Da govament de a-go ton di ort iina wan paradais we piipl a-go liv iina fi eva.

Suun suun, wa Jiizas se iina Matyu 6:10 a-go kom chuu. Im se: “Mek di taim kom wen yu ruul iina evri wie. Mek we yu waahn apm pan ort apm, jos laik ou a wa yu waahn fi apm iina evn apm.” So fram Gad set op im Kindom govament iina 1914, wa yu tingk it a gwaan wid? An wa Gad Kindom govament a-go du fi wi wen it staat ruul uova di wol ort?