Wen Jeuova mek di fos man an uman, im put dem pan di ort fi liv. Gad neva mek Adam an Iiv fi liv an av pikni iina evn—im did mek ienjel fi liv iina evn aredi. (Job 38:4, 7) Jeuova did put Adam an Iiv iina wan priti priti gyaadn niem Iidn. (Genesis 2:15-17) So Adam an im jinarieshan dem kuda get fi enjai laif pan ort fi eva.​—Riid Psalm 37:29; 115:16.

Iina di biginin, paradais did onggl de iina di gyaadn a Iidn. Adam an Iiv did fi moltiplai, an dem an dem jinarieshan did fi ful op di ort an spred paradais aal uova di ort. (Genesis 1:28) Di ort naa go bon op, mash op, ar don we wid. Piipl a-go liv pan it fi eva.​—Riid Psalm 104:5.

Wach da vidiyo ya Wa mek Gad mek di ort?

Adam an Iiv neehn du wa Gad tel dem fi du, so Jeuova ron dem outa di gyaadn, an so wi no av no paradais nou. Di Baibl se: “Bot di wikid piipl dem an di fraad dem a-go get fram bad tu wos.”—2 Timoti 3:13.

Bot dat stil naa go stap Jeuova fram du wa im waahn fi du fi wi. Im a di Almaiti! An eniting we im se, a dat a-go apm. (Isaiah 45:18) So im stil a-go mek di ort bikom wan paradais.​—Riid Matyu 5:5.

Di ort a-go ton iina paradais wen taim Jiizas a ruul az King. Iina di Aamagedan waar, im an di ienjel dem a-go get rid a aal uu go gens Gad. Afta dat, im a-go lak op Sietan fi a touzn ier. Bot yu si di piipl dem we a sorv Gad? Jiizas a-go kip dem sief, an dem a-go liv fi eva iina di Paradais ort.​—Riid Revilieshan 20:1-3; 21:3, 4.

Jiizas did tel im falara dem we dem fi luk fa fi nuo se “di worl suun don.” Di wie ou tingz a-go nou, it shuo wi se a dem taim ya im did a taak bout.​—Riid Matyu 24:3, 7-14, 21, 22.

Memba di 1,000 ier we Sietan a-go get lak op fa? Iina da siem taim de, Jiizas a-go ruul uova di ort fram iina evn. (Isaiah 9:6, 7; 11:9) Im a-go get rid a aal a wi sofarin. Plos, im a-go tek we sin fram aal a Gad piipl. So Gad a-go yuuz Jiizas fi en aal siknis, uol iej, an det.​—Riid 1 Korintiyan 15:26; Revilieshan 21:4.

Di piipl dem we du wa Gad se, a dem a-go liv iina Paradais. (1 Jan 2:17) Jiizas did sen im falara dem fi sorch fi ombl piipl an tiich dem ou fi sorv Gad iina di rait an prapa wie. Rait nou, miliyanz a piipl a get chrienin fram Jeuova fi liv iina di Paradais we suun kom. (Zephaniah 2:3) Dat a di chrienin we piipl a get wen dem go a di Jeuova Witnis Kindom Aal. Dem a lorn fi bi beta ozban, beta faada, beta waif, beta mada. Pierents an dem pikni a worship Gad tugeda iina yuuniti an lov, an a benifit fram di gud nyuuz.​—Riid Revilieshan 15:4.