Kaaz wi a Jeuova Witnis, wi wok aad fi bil op wi uona fambili an elp ada piipl fi bil op fi dem fambili tu. Wi shuo se wi av nof rispek fi Gad kaaz a im a di Wan we aal a di fambili dem kom fram. (Jenisiz 2:21-24; Ifiijan 3:14, 15) Di ting dem we im tiich wi iina di Baibl a elp piipl aal uova di worl fi mek dem marid laif wel api.

 Wen wi chrai aad fi du di ting dem we di Baibl se, wi si se it elp di wan dem uu a ozban, waif, mada, an faada fi du beta. (Pravorbz 31:10-31; Ifiijan 5:22–6:4; 1 Timoti 5:8) Di sitn dem we wi lorn fram di Baibl kyan elp di piipl dem we dem an dem fambili biliiv difrant difrant tingz bout Gad. (1 Piita 3:1, 2) Yu av som piipl we a no Jeuova Witnis we marid tu sumadi we ton wan Jeuova Witnis. Mek wi ier wa tuu a dem se:

•   “Afta wi marid, yu si di fos siks ier dem, wi neehn api at aal kaaz wi eva did a kos wi wan aneda. Afta Ivete ton wan Jeuova Witnis, shi staat tek ar taim wid mi an shuo se shi lov mi muor. Di sitn dem we shi du chienj wi marid laif fi di beta.”​—Clauir we kom fram Brazil.

•   “Wen mi ozban, Chansa, did staat stodi di Baibl wid di Jeuova Witnis dem, mi neehn iina it at aal kaaz mi did tingk se dem piipl de dis mash op piipl fambili. Bot mi get fi si se di sitn dem we im lorn fram di Baibl mek wi marid laif beta.”​—Agness we kom fram Zambiya.

 Wen wi a priich tu piipl an a tiich dem bout di Baibl, wi elp dem fi si ou wen dem du di sitn dem we di Baibl se it kyan elp dem fi

•   Pik wan gud sumadi fi marid tu

•   Nuo ou fi diil wid di kain-a prablem dem we a-go kom di fos ier dem marid

•   Nuo ou dem kyan liv gud wid dem in-laa dem

•   Nuo wa dem kyan du so dat dem no wies dem moni

•   Si ou dem kyan tap kos out dem wan aneda

•   Lorn ou fi paadn dem wan aneda

•   Lorn ou dem kyan gruo dem pikni gud

 Wi get fi si se, som a di taim it kaaz prablem fi chuu. Yu av wan kompni we niem Sofres we stodi bout fambili an dem ting de. Iina 1998, dem du wan ripuot we dem fain out se wen yu av wan ozban an waif an wan a dem ton wan Jeuova Witnis, fi evri 20 fambili, 1 a dem de en op av som big prablem iina dem marid laif.

 Jiizas did tel wi se piipl we du we im se dem fi du, som a di taim, dem wuda en op av prablem iina dem fambili. (Matyu 10:32-36) Wan man we stodi bout tingz we apm iina di paas we niem Will Durant se wen di Ruoman dem did a ruul, “Di wan dem we did a Kristiyan, piipl se dem did a mash op piipl fambili laif.” * An wi si se a di sed ting piipl a se bout di Jeuova Witnis dem tide. Bot yu tingk se dat miin se a so it go fi chuu?

 Som piipl we se di Jeuova Witnis dem mash op piipl fambili laif kyari dem go a kuot fi it. Bot da kuot ya we niem Yuuropiyan Kuot A Yuuman Raits​—wen dem stodi di kies dem​—dem si se a di wan dem we a no Jeuova Witnis riili a kaaz di prablem, kaaz “dem kyaahn si chuu wa mek sumadi wuda ton wan Jeuova Witnis an dem no waahn dem fambili dem fi av notn fi du wid dat.” Plos, di kuot se: “Dis apm iina aal a di fambili dem we yu av piipl we biliiv difrant difrant tingz bout Gad. So a no notn difrant wen it kom aan tu di Jeuova Witnis dem.” * Iivn wen dem fambili memba dem chriit dem bad kaaz a wa dem biliiv iina, wi si se di Jeuova Witnis dem chrai aad fi du wa di Baibl se iina Ruoman 12:17, 18: “Ef sumadi du yu sopm rang, no bada du dem bak notn rang. . . . Ef it kyan apm, du evriting we unu kyan du fi mek shuor se unu liv iina piis wid evribadi.”

 Di Baibl se ef sumadi a-go marid, dem fi marid tu sumadi we a “wan a Gad pikni.” (1 Korintiyan 7:39) An a dat di Jeuova Witnis dem du. Dem onggl marid tu sumadi we biliiv di sed ting we dem biliiv. Wi si se wa di Baibl se riili mek sens fi chuu. Sitn we dem rait iina wan buk we niem Journal of Marriage and Family iina 2010 se: “Wen yu av wan ozban an waif we biliiv di siem ting dem bout Gad, wi fain se dem wan de muo api dan di wan dem we di ozban an waif dem no biliiv di sed ting dem bout Gad.” *

 Bot dat no miin se di Jeuova Witnis dem a se ef wan Jeuova Witnis marid tu sumadi we a no wan Jeuova Witnis tu, dat miin se dem fi lef dem. Di Baibl mek wi nuo se: “Ef wan a yu choch breda dem av wan waif we no biliiv iina Gad, an shi api fi gwaan liv wid im, im no fi lef ar. An ef wan uman av wan ozban we no biliiv iina Gad, an im api fi gwaan liv wid ar, shi no fi lef im niida.” (1 Korintiyan 7:12, 13) A dis di Jeuova Witnis dem du.