Isu egọmeti gbe ikoko ahwo-akpọ a be sae wha udhedhẹ ziọ akpọ na ha. Nẹnẹ, a be jọ akpọ na fi ẹmo je ru ozighi vi epaọ anwẹdẹ kpobi anwẹnọ Ẹmo Akpọ Avivẹ o ro fi vrẹ no. Ahwo nọ a bu te oware wọhọ ima-idu ivẹ (2,000,000,000), koyehọ enwenọ abọvo abane ahwo nọ a rrọ akpọ na, a be rria eria nọ a be jọ fi ẹmo hayo ru ozighi.

 Fikieme ahwo-akpọ a gbẹ be sae wha udhedhẹ ze he? Eme Ebaibol na ọ ta?

1.  1. Ahwo a bi dhesẹ uruemu nọ u re ru ei bẹbẹ kẹ ae re a sae rria dhedhẹ kugbe amọfa. Ebaibol na ọ ta nọ evaọ oke mai na, “ahwo a ti you omobọ rai, you ugho, seha, wo omorro, . . . a ti ru ẹme rai gba ha, . . . a te rọwo ru ọtamuo ho, . . . a ti wo oma-onyẹ hẹ, a ti mu ofu-ọkpoo, . . . veghe uzou, fu uke avọ omorro.”—2 Timoti 3:2-4.

2.  2. Ahwo-akpọ a wo ogaga nọ a sai ro ku ebẹbẹ rai họ họ, a gwọlọ obufihọ Jihova a Ọghẹnẹ, ọnọ ọ ma rai. Ebaibol na ọ ta nọ “ohwo-akpọ nọ ọ be nya onya o wo ogaga nọ ọ rẹ rọ tubẹ kpọ ithihi riẹ dede he.”—Jerimaya 10:23.

3.  3. Akpọ na ọ rrọ otọ ogaga osu omuomu, Setan Ẹdhọ na, ọnọ “o bi su akpọ na soso thọ.” (Eviavia 12:9) Nọ orọnọ “akpọ na soso ọ rrọ otọ ogaga omuomu na,” ẹmo gbe ozighi e sai kuhọ họ.—1 Jọn 5:19.

 Ebaibol na o dhesẹ nọ Ọghẹnẹ ọvo ọ rẹ sae wha udhedhẹ ziọ akpọ na, orọnikọ fiki oware jọ nọ ahwo-akpọ a ti ru hu.

•   “‘Keme mẹ riẹ iroro nọ me bi roro kpahe owhai,’ ere Jihova ọ ta, ‘iroro udhedhẹ, orọnikọ okpẹtu hu, re me ru eware woma kẹ owhai evaọ obaro, wha ve je wo ẹruore.’”—Jerimaya 29:11.

 Ẹvẹ Ọghẹnẹ o ti ro ru eyaa riẹ yena gba? “Ọghẹnẹ nọ ọ rẹ kẹ udhedhẹ na, ọ te whọlọ Setan no.” (Ahwo Rom 16:20) Egọmeti Ọghẹnẹ nọ o ro mu evaọ obọ odhiwu oye ọ te wha udhedhẹ ziọ akpọ na. A re sei “Uvie Ọghẹnẹ.” (Luk 4:43) Nọ Jesu nọ ọ rrọ ovie Uvie na o te mu otọakpọ na họ esu no, ahwo kpobi a ti wuhrẹ epanọ a rẹ rọ rria kugbe dhedhẹ.—Aizaya 9:6, 7.

•   Re whọ gbẹ riẹ kpahe ẹme nana, se uzoẹme na “Eme Uvie Ọghẹnẹ U ti Ru?”