Kadagiti napalabas a tawtawen, napadasan ti Venezuela ti kakaruan pay laeng a krisis iti ekonomia ken problema iti kagimongan. Imbaga ti maysa a Saksi nga agnagan Edgar, “Iti laeng sumagmamano a tawen, bigla a nagsuek ti ekonomia, panagriknami addakami iti sabali a pagilian ngem saankami met a pimmampanaw iti balaymi!”

 Ania ti nakatulong ken Edgar? Kunana: “Pinampanunotmi ken baketko a Carmen dagiti misionero nga immakar kadagiti napanglaw a pagilian ken nasursuroda ti agbiag uray no awan dagiti gagangay a pagnam-ayan. Nakatulong dayta tapno mapasimplemi ti biagmi ken aramidenmi dagiti dimi pay napadpadasan, kas iti panagmula iti pangalaanmi iti makan.”

 Ngem adda pay inaramid da Edgar ken Carmen. Inkagumaanda a liwliwaen dagiti kapammatianda, agraman dagiti madepdepres. (1 Tesalonica 5:11) Imbaga ni Edgar, “Saanmi laeng a liniwliwa ida, pinaregtami ida a tumulong iti sabsabali tapno mariknada ti ragsak.”—Aramid 20:35.

 Iti rugrugi ti COVID-19 pandemic, inkeddeng ni Argenis a kasabaan dagiti kakabagianna. Dadduma ti nagpayadal iti Biblia babaen ti telepono.

 Kayat met ni Argenis a mabuya dagiti kabagianna nga awan ti koneksionda iti Internet ti 2020 a rehional a kombension. Adda kabsat iti asideg nga ili a nangted kadakuada iti kopia ti video ti programa. Sa bimmulod dagiti kabagian ni Argenis iti dakkel a TV ken ispiker. Tawtawagan ida ni Argenis sakbay ti programa tapno idauluanna ida iti kararag. Gapu iti panagregget ni Argenis, 4 kadagiti kabagianna ken 15 a dadduma pay ti nakaatender.

 Ti laeng agassawa a da Jairo ken Johana ti adda luganna iti kongregasionda, isu nga us-usarenda dayta tapno tumulong iti sabsabali. Ngem ti problema ket narigat ti makaala iti gasolina. Kuna ni Jairo, “No agpagasolinakami, adu nga oras a makipilakami, ket umabut dayta no dadduma iti agpatpatnag.”

 Narikna da Jairo a sulit ti panangtulongda iti dadduma. Kunana: “No agideliberkami iti suplay kadagiti kakabsat, maragragsakankami ta iyebkasda ti panagyamanda saan a kadakami no di ket ken Jehova a mangmangted iti amin a kasapulan dagiti adipenna.”—2 Corinto 9:11, 14.

 Uray no dandanin ag-30 ti sister nga agnagan Norianni, panagriknana a baka ibilangda nga ubing pay unay tapno tumulong iti dadduma. Ngem nabasana iti 1 Timoteo 4:12: “Dimo ipalubos nga adda asinoman a manglais iti kinaagtutubom. Imbes ketdi, agbalinka nga ulidan kadagidiay matalek.”

 Nakatulong dayta a teksto ken Norianni tapno tumulong kadagiti natataengan iti kongregasionna iti panangasabada babaen ti surat ken uray iti panangawisna kadakuada a kumadua iti panangyadalna iti Biblia. Tawtawaganna met ida ken mangise-send kadagiti makaparegta a mensahe. Kuna ni Norianni, “Impakita kaniak ni Jehova nga adu ti maaramidak.”

 Adu a problema ti pakaipaspasanguan dagiti kakabsattayo idiay Venezuela kadagitoy a narigat a tiempo. Nupay kasta, nagagetda latta iti ministerio ken ‘mangmangtedda iti kasta unay a liwliwa’ iti maysa ken maysa.—Colosas 4:11; 2 Timoteo 4:2.