“Nayanakak iti pamilia nga agserserbi ken Jehova,” imbaga ni Rachel nga aggigian itan iti Dominican Republic. “Ngem makapaladingit ta idi agtawenak iti pito, nagsardeng ni Tatang a makikadua kadagiti agdaydayaw ken Jehova, ken binusorna a permi ti kinapudno. Gapu iti dayta, narigatanak unay nga agdayaw ken Jehova. Kas pagarigan, ibagana nga ikkannak iti selpon wenno credit card, wenno mapankami iti Disneyland no agsardengak nga agserbi ken Jehova. No dadduma, bugbugbogennak pay ketdi! Ibagbagana a no saanakon a makasao wenno makapagna, saanak a makapan kadagiti gimong. Ngem saanak a pulos simmardeng. Kanayon a determinadoak a makigimong.

 “Sigsiguraduen ni Tatang a saan a makita ni Nanang ti panangkabilna kaniak. Imbagana a no ipulongko ken Nanang ti panangkabkabilna kaniak, iramanna met a kabilen ni Nanang. No makita ni Nanang dagiti limmitem a paset ti bagik, ibaga ni Tatang a gapu dayta iti martial arts nga impilitna a sursuruek.

 “Diak maibaga ken Nanang ti mapaspasamak ta nakaub-ubingak pay idi ken mabutengak unay ken Tatang, isu a ni Jehova ti pagipulpulongak. Mabayag nga agpagnapagnaak iti kabakiran nga adda iti likud ti balaymi idiay Maryland, U.S.A. Iti dayta a kabakiran, adda nagpintas a kayo nga oak nga ul-uliek, ket manipud iti komportable a puestok iti maysa a sanga, agkararagak ken Jehova. Imbagak kenkuana ti marikriknak ken ti kayatko nga aramiden para kenkuana inton dumakkelak—no la ket ta tulongannak nga agbiag iti at-atiddog pay. Imbagak met kenkuana ti aramidek inton baro a lubong, ti pamilia a kayatko, ken ti talna ken ragsak a mapadasak gapu ta awanton ti rigat ken buteng a mariknak.

 “Idi padpadasen ni Tatang a pasardengennak nga agdayaw iti Dios babaen kadagiti material a banag wenno iti panangkabkabilna kaniak, kanayon a mariknak a liwliwaen ken pappapigsaennak ni Jehova. Tinulongannak nga agtalinaed a matalek ken nabileg.

 “Nabautisaranak idi sangapulo ti tawenko, ket kalpasan ti dua a tawen, nagpayunirak. Saan idi nga ammo ni Tatang dagita. Ngem idi naammuanna, dinanognak nga uray la na-dislocate wenno nagligasi ti pangak.

 “Adda dagiti nangibaga nga ubingak pay unay nga agpayunir ta madanaganda a diak maawatan ti kinaserioso ti desisionko. Ngem nakitak nga adu nga agtutubo a Saksi iti lugarmi ti in-inuten nga umad-adayo ken Jehova. Party ken panagraragsak la ti ar-aramidenda. Makaengganio ti ar-aramidenda! Isu a no dadduma, kasla kayatko met a tuladen ida. Napampanunotko, ‘No ngay kissayak lattan ti tiempok a mangasaba tapno makapag-enjoy-ak met a kas kadagiti kaedadko?’ Ngem kada mariknak ti kasta, ibagbagak dayta ken Jehova.

 “Idi dandaniakon agtawen iti kinse, kinontaknak ti maysa a sikat a modeling agency. Imbagada a dakkel ti itedda a sueldok no makipagtrabahoak kadakuada idiay Milan, Italy. Naragsakanak iti imbagada a mabalinak nga agbalin a model, agparang kadagiti magasin, ken agisuot kadagiti nangingina a bado kadagiti fashion show. Agtallo tawenen a payunirak ket napanunotko, ‘Makatulong kaniak daytoy a trabaho tapno maitultuloyko ti agpayunir!’ Pinanawannakamin ni Tatang, isu a napanunotko met a makatulong ti sueldok tapno matulongak ni Nanang kadagiti paggastuanna.

 “Inkararagko dayta. Nakisaritaak ken Nanang, a nabayagen a payunir, ken nakisaritaak met iti maipatpateg ken mararaem a panglakayen. Kas iti dati nga ar-aramidek, napanak met iti paboritok a kayo ken nagkararagak manen sadiay. Sinungbatan ni Jehova dagiti kararagko babaen ti maysa a teksto iti Biblia nga impabasa kaniak ti panglakayen. Dayta ket ti Eclesiastes 5:4, a kunana: ‘No agkarika iti Dios, tungpalem ti karim.’ Inkarik a naan-anay nga agserbiak ken Jehova, ket madanaganak a baka madadael ti relasionko ken Jehova gapu iti daytoy a trabaho. Isu a diak inawat dayta.

 “Uray no saan a nasayaat ti napasarak idi ubingak, sibibiagak pay latta agingga ita! Naragsakak itan a kadua ni lakayko a Jaser ken ti anakmi a ni Connor, a siam ti tawenna. Panglakayen ni Jaser, ken di bautisado nga agibumbunannag ni Connor. Dandani 27 a tawenen nga addaak iti amin-tiempo a serbisio.

 “Masansan a pampanunotek dagiti napaut a pannakisaritak ken Jehova manipud iti kayo nga oak iti kabakiran nga adda iti likud ti balaymi. Inkarkararagko ken Jehova a tulongannak, ket inaramidna dayta iti nagsayaat a pamay-an. Pinapigsanak, liniwliwanak, ken indalannak. Iti intero a panagbiagko, maulit-ulit nga impakita ni Jehova nga isu ket nakaim-imbag nga ama. Maragsakanak ta pinilik ti agserbi kenkuana iti amin a pusok. Dayta ti kasayaatan pay laeng a desisionko.”