Napadakkelak kas maysa a Katoliko idiay Rochester, New York. Nagsina dagiti nagannakko idi walo ti tawenko. Isu a no Lunes agingga iti Biernes, agyanak ken nanangko iti maysa a housing project para kadagiti napanglaw. No Sabado ken Domingo, mapanak met iti balay ni tatangko iti lugar dagiti babaknang. Nakitak ti rigat ni nanangko a mangpadakkel kadakami nga innem nga annakna, isu nga inar-arapaapko ti bumaknang tapno matulongak ti pamiliak.

 Kayat ni tatangko nga agbalin a nasayaat ti biagko, isu nga imbagana a mapanak iti maysa a sikat nga eskuelaan para iti hotel management. Nagustuak isu a nagenrolak. Panagriknak idi, sungsungbatan ti Dios ti kararagko nga agbalin a nabaknang ken naragsak. Nagadalak iti hotel administration, business law, ken corporate finance iti lima a tawen bayat nga agtrabtrabahoak iti maysa a casino hotel idiay Las Vegas, Nevada.

 Bainte dosko laeng idi, siakon ti assistant vice president ti maysa a casino hotel. Maikunak a nabaknangakon ken nasayaaten ti biagko. Makanko dagiti kaiimasan a makan ken dagiti kanginginaan nga arak ti in-inumek. Ibagbaga no kua dagiti gagayyemko iti trabahok, “Laglagipem a kuarta ti mangpatpataray iti lubong.” Para kadakuada, kuarta ti sekreto ti pudpudno a kinaragsak.

 Karaman iti trabahok ti panangasikaso kadagiti nagbabaknang nga umay agsugal iti Las Vegas. Uray no adu ti kuartada, kasla saanda a naragsak. Uray siak saanak met a naragsak. Ngamin, uray no umad-adu ti kuartak, ad-adda met a madandanaganak ken diak makaturturog agingga a napanunotko payen ti agpakamatay. Dismayadoak iti biagko isu nga insaludsodko iti Dios, “Apo, kasanoak nga agbalin a pudpudno a naragsak?”

 Iti dayta a tiempo, dua a manangko a nagbalin a Saksi ni Jehova ti immakar iti Las Vegas. Diak kayat dagiti pagbasaanda, ngem kayatko a ti Bibliak ti basaenmi. Iti Bibliak, nalabaga ti pannakayimprenta ti amin a sasao ni Jesus. Patiek ti amin nga imbaga ni Jesus, isu a dagita ti inranud da manangko. Binasak met ti Bibliak a bukbukodko.

 Adu ti nabasak a nakakigtotak. Kas pagarigan, imbaga ni Jesus: “No agkararagkayo, diyo ulit-uliten a kas kadagiti pagano a mangipagarup a maipangagda gapu kadagiti adu a sasaoda.” (Mateo 6:7, The New American Bible) Ngem inikkannak ti maysa a padi iti ladawan ni Jesus, ket imbagana a no aglualoak iti dayta iti maminsangapulo nga Amami ken maminsangapulo nga Ave Maria, ited ti Dios ti kuarta a kasapulak uray kasano kadakkel. Isu a no isu met la nga isu a sasao ti ibagak, ulit-ulitek ngarud ti ikarkararagko. Nabasak met ti imbaga ni Jesus: “Diyo awagan iti ama ti asinoman ditoy daga ta maymaysa ti Amayo sadi langit.” (Mateo 23:9, NAB) Isu a napanunotko, ‘Apay ngarud a dakami a Katoliko, aw-awaganmi dagiti padimi iti “Father”?’

 Idi laeng nabasak ti libro a Santiago a pinanunotko no ania ti serbina ti naballigi a karerak iti lubong. Iti kapitulo 4, insurat ni Santiago: “Diyo kad ammo a maibusor iti Dios ti panangayat iti lubong? Asinoman ngarud a mangay-ayat iti lubong pagbalbalinenna ti bagina a kabusor ti Dios.” (Santiago 4:4, NAB) Ngem ad-adda pay a nasdaawak iti bersikulo 17: “Agbasol ti tao a di mangaramid iti naimbag nga ammona a masapul nga aramidenna.” Kinasaritak a dagus da manangko ket imbagak nga umikkatakon iti trabahok iti casino hotel ta diakon mairusok ti maar-aramid idiay a pakairamanan ti sugal ken kinaagum.

 Kayatko a sumayaat ti relasionko iti Dios ken kadagiti nagannakko ken kakabsatko isu a pinasimplek ti biagko tapno maaramidko dayta. Ngem medio narigatanak a nangaramid iti dayta. Kas pagarigan, nakaawatak iti promosion iti casino hotel ket agdoble wenno agtriple ti sueldok. Ngem kalpasan a naikararagko dayta, naamirisko a diak kayat ti kastoy a biag. Immikkatak iti trabahok ket immakarak iti garahe ni Nanang. Nangirugiak iti bassit a negosio a panag-laminate kadagiti menu ti restawran.

 Uray natulongannak ti Biblia a mangkita no ania a talaga ti napatpateg, saanak latta a makigimgimong kadagiti Saksi ni Jehova. Dinamag da manangko no ania ti diak kayat kadagiti Saksi. Imbagak: “Pagsisinaen ti Diosyo a ni Jehova dagiti pamilia. Ti laeng panawenko a makaduak ti pamiliak ket kadagiti Krismas ken bertdey ngem saanyo met a selselebraran dagita.” Nakasangit ti maysa a manangko ket dinamagna: “Ayanmo kadagiti dadduma nga aldaw ti tawen? Kayatmi a kanayon a kaduadaka. Ngem sika, kayatnakami laeng a kadua kadagita nga okasion ken umayka laeng gapu ta kasapulan.” Simmarut iti pusok ti imbagana ket nakasangitak met.

 Idi nakitak nga ay-ayaten unay dagiti Saksi ni Jehova ti pamiliada ken kamali ti pampanunotek kadakuada, nagdesisionak a makigimong iti Kingdom Hall iti lugarmi. Naam-ammok ni Kevin, nga adun ti kapadasanna a mangyadal iti Biblia, ket isu ti nangyadal kaniak.

 Simple laeng ti biag da Kevin ken baketna tapno ad-adu ti panawenda a tumulong iti dadduma nga agadal iti Biblia. Ti met sobra iti badyetda ti usarenda a mapan idiay Africa ken Central America tapno tumulongda nga agibangon kadagiti sangay dagiti Saksi. Nakaragragsakda ken ay-ayatenda ti maysa ken maysa. Naibagak idi iti bagik, ‘Kasta a biag ti ar-arapaapek.’

 Adda video nga impabuya kaniak ni Kevin maipapan iti ragsak ti panagmisionero, ket nagdesisionak a dayta ti kayatko nga aramiden. Idi 1995, kalpasan ti innem a bulan a serioso a panagadalko iti Biblia, nabautisaranak kas maysa a Saksi ni Jehova. Saankon nga inkararag iti Dios a bumaknangak, imbes ketdi, inkararagko: “Dinak pagbalinen a napanglaw wenno nabaknang.”—Proverbio 30:8.

 Talaga a nabaknangak itan—saan nga iti kuarta no di ket iti naespirituan. Naam-ammok ti napintas nga asawak a ni Nuria, idiay Honduras, ket nagserbikami kas misionero idiay Panama ken Mexico. Napaneknekak nga agpayso dagiti sasao ti Biblia: “Ti bendision ni Jehova ti mangpabaknang, ket saanna a nayonan iti rigat”!—Proverbio 10:22.