Gapu iti panagayat dagiti Saksi ni Jehova iti Dios ken kadagiti kaarrubada, maragragsakanda a mangibaga iti mensahe ti Biblia iti amin a tao, agraman dagiti nangibaga idin iti “Saanak nga interesado.” (Mateo 22:37-39) Ti panagayatmi iti Dios ti mangtignay kadakami nga agtulnog iti bilin ti Anakna a “mangipaay iti naan-anay a pangsaksi.” (Aramid 10:42; 1 Juan 5:3) Tapno maaramidanmi dayta, maulit-ulit nga ipadamagmi ti mensahe ti Dios, a kas iti inaramid dagiti nagkauna a propeta ti Dios. (Jeremias 25:4) Gapu ta ay-ayatenmi dagiti kaarrubami, ikagkagumaanmi nga isarita iti amin a tattao ti maipapan iti “naimbag a damag ti pagarian,” uray kadagiti nangibaga idin a saanda nga interesado iti dayta.​—Mateo 24:14.

 Masansan nga addan dagiti aginteres no sublianmi dagiti balay nga awan idi ti interesado. Dagitoy ti tallo a rason:

•   Agakar-akar dagiti tattao.

•   Dadduma kadagiti aggigian iti balay ti aginteres iti mensahemi.

•   Agbalbaliw dagiti tattao. Gapu kadagiti pasamak iti lubong wenno iti panagbalbaliw iti biag, adda dagiti nagbalin a “sipapanunot iti naespirituan a kasapulanda” ken naginteres iti mensahe ti Biblia. (Mateo 5:3) Kas iti napasamak ken apostol Pablo, mabalin met nga agbalbaliw uray dagiti kumonkontra.—1 Timoteo 1:13.

 Ngem saanmi nga ipilit ti mensahemi. (1 Pedro 3:15) Mamatikami a karbengan ti tunggal maysa ti agdesision no maipapan iti pilienna a panagdaydayaw.—Deuteronomio 30:19, 20.