Ania ti Patpatien Dagiti Saksi ni Jehova Maipapan iti Diborsio?
Sursurotenmi ti ibagbaga ti Biblia maipapan iti panagasawa ken diborsio. Inyurnos ti Dios ti panagasawa kas permanente a panagtipon ti maysa a lalaki ken babai. Seksual nga immoralidad laeng ti ibagbaga ti Biblia a pakaibatayan ti diborsio.—Mateo 19:5, 6, 9.
Tultulongan kadi dagiti Saksi dagiti problemado ti panagasawada?
Wen, babaen kadagitoy a pamay-an:
Publikasion. Regular a maisursurat kadagita dagiti artikulo a tumulong a mangpalagda iti relasion ti agassawa, uray dagiti relasion a kasla dandanin marakrak. Kas pagarigan, kitaem dagiti artikulo a “Panangtaginayon iti Pannakaikumit iti Panagasawa,” “No Kasano ti Mangpakawan,” ken “Panangpasubli ti Panagtalek iti Asawa.”
Gimong. Kadagiti gimong, asamblea, ken kombension, ad-adalenmi dagiti makatulong a balakad ti Biblia maipapan iti panagasawa.
Panglakayen. Personal a tultulongan dagiti panglakayen dagiti agassawa babaen ti panangiyunay-unayda kadagiti bersikulo iti Biblia a kas iti Efeso 5:22-25.
Kasapulan pay kadi nga aprobaran dagiti panglakayen ti desision ti maysa a Saksi a makidiborsio?
Saan. Uray no agpatulong ti agassawa kadagiti panglakayen a mangsolbar iti problemada, awan kalintegan dagiti panglakayen a mangibaga no ania ti aramidenda. (Galacia 6:5) Nupay kasta, dagidiay makidiborsio uray no saan a naibatay iti Biblia ti rasonda saan nga ipalubos ti Biblia a makiasawada manen..—1 Timoteo 3:1, 5, 12.
Ania ti patpatien dagiti Saksi maipapan iti panagsina ti agassawa?
Iparparegta ti Biblia kadagiti agassawa a dida agsinsina uray no narigat ti situasion. (1 Corinto 7:10-16) Adu a problema ti mabalin a masolusionan babaen iti napasnek a panagkararag, panangsurot kadagiti prinsipio ti Biblia, ken panangipakita iti ayat.—1 Corinto 13:4-8; Galacia 5:22.
Nupay kasta, dadduma a Kristiano ti nagdesision a makisina iti asawada gapu kadagiti nakaro a situasion, kas iti:
Inggagara a di panangsuporta iti pamilia.—1 Timoteo 5:8.
Nakaro a pisikal a panangabuso.—Salmo 11:5.
Naan-anay a panagpeggad ti espiritualidad ti maysa, nga uray la saanen a makapagserbi ken Jehova a Dios. Kas pagarigan, no ti maysa a Saksi ket piliten ti asawana a mangsukir kadagiti bilin ti Dios, mabalin nga agdesision a makisina no dayta laengen ti pamay-an tapno ‘makapagtulnog iti Dios kas agturay imbes a kadagiti tattao.’—Aramid 5:29.