Ti mallee bird iti makin-abagatan nga Australia kayana a manteneren ti temperatura iti pagitloganna a saan a ngumato wenno bumaba iti dua wenno tallo a degree manipud iti 34 degrees Celsius (93°F). Kasano a manmanteneren ti billit dayta a temperatura iti aldaw ken rabii iti intero a tawen?

 Tunggal winter, agkali dagiti mallee bird iti abut nga agarup maysa a metro (3 ft) ti kaunegna ken tallo a metro (10 ft) ti kalawana. Kalpasanna, kargaan dayta ti lalaki a billit iti ruruot, bulbulong, ken dadduma pay a mula. Inton matuduan ken maupran dagiti inkabilda a bulbulong ken ruruot, mangkali ti lalaki a billit iti sabali nga abut iti unegna a pakaikabilan dagiti itlog sa gaburanna ti bunton dagiti ruruot ken bulbulong iti darat. Di agbayag, marunot dagiti bulbulong ken ruruot ket bumara ti temperatura iti uneg ti bunton nga agbalin a natural nga incubator.

 No ngannganin agitlog ti babai a mallee bird, kutkoten ti lalaki ti nabunton a darat tapno makapagitlog ti babai iti uneg. Kalpasanna, gaburan a dagus ti lalaki a mallee bird ti abut iti darat. Makayitlog ti babai iti agingga iti 35 nga itlog manipud Septiembre agingga iti Pebrero. a

 Masansan nga itudokda ti sippitda iti darat tapno riknaenda ti temperatura. Kalpasanna, i-adjust-da ti temperatura ti bunton depende iti paniempo. Kas pagarigan:

•   Iti spring, no mangrugin nga agrunot dagiti naikabil a bulbulong ken ruruot, ngumato ti temperatura iti uneg ti abut, isu a kalien manen ti lalaki a billit ti bunton tapno sumngaw ti pudot. No limmamiisen iti uneg ti abut, gaburanna manen iti darat.

•   Iti summer, ti lalaki a mallee bird gaburanna iti ad-adu pay a darat ti rabaw ti bunton tapno saan a maluto dagiti itlog gapu iti init. Ngem kada bigat, isapsapana a kalien ti daga ken gaburanna manen dayta no limmamiisen iti uneg ti daga ken ti darat.

•   Iti autumn, no narunoten dagiti bulbulong ken ruruot, kutkotenna ti amin a naigabur a darat tapno mainitan dagiti itlog ken darat iti tengnga ti aldaw. Kalpasanna, igaburna manen ti bimmara a darat tapno masustiner ti pudot iti uneg ti bunton iti agpatnag.

 Kada aldaw, nasurok a lima nga oras ti average a busbusbosen ti lalaki a mallee bird a mangkutkot ken mangigabur iti agarup 850 a kilo (1,874 lbs) a darat. Adda pagsayaatanna dayta: Rumuka ti daga isu a nalaklakanton a rummuar dagiti piek iti bunton inton mapessaandan.

 Panagkunam? Ti kadi abilidad ti mallee bird a mangkontrol iti temperatura iti pagitloganna ket resulta ti ebolusion? Wenno adda nagdisenio iti dayta?