Ipakita ti Biblia nga umiso ken napateg pay ketdi ti kalkalainganna a panagayat iti bagi. Ramanen dayta ti panangaywan, panangrespeto, ken panangipateg iti bagi. (Mateo 10:31) Saan nga iparparegta ti Biblia a ti bagitayo laeng ti pampanunotentayo, ngem ibagana nga adda umiso a lugar ti panagayat iti bagi.

Asino ti umuna nga ayatentayo?

1.   Masapul a ti Dios ti umuna nga ayatentayo. Isursuro ti Biblia a ti kadakkelan a bilin ket: “Masapul nga ayatem ni Jehova a Diosmo buyogen ti intero a pusom.”​—Marcos 12:28-30; Deuteronomio 6:5.

2.   Ti maikadua a kadakkelan a bilin ket: “Masapul nga ayatem ti padam a tao a kas iti bagim.”​—Marcos 12:31; Levitico 19:18.

3.   Awan ti espesipiko a bilin ti Biblia nga ayatentayo ti bagitayo, ngem ti bilin nga “ayatem ti padam a tao a kas iti bagim” ipakitana a normal ken makagunggona ti kalkalainganna a panagayat ken panangrespeto iti bagi.

Asino ti umuna nga inayat ni Jesus?

 Impakita ni Jesus no kasano a balansien ti panagayat iti Dios, pada a tao, ken bagi, ken imbilinna kadagiti adalanna a tuladenda ti ulidanna.​—Juan 13:34, 35.

1.   Inayatna nga umuna ni Jehova a Dios ken impamaysana nga intungpal ti trabaho ni Amana. Imbagana: “Tapno maammuan ti lubong nga ay-ayatek ti Ama, no kasano a ti Ama inikkannak iti bilin nga aramiden, kasta ti ar-aramidek.”​—Juan 14:31.

2.   Inayat ni Jesus ti padana a tao babaen ti panangipaayna iti kasapulanda nga uray la intedna ti biagna para kadakuada.​—Mateo 20:28.

3.   Inayatna ti bagina babaen ti panangiwayana nga aginana, mangan, ken makikadua kadagiti pasurotna ken kadagiti potensial nga adalan.​—Marcos 6:31, 32; Lucas 5:29; Juan 2:1, 2; 12:2.

Makissayan kadi ti ragsak ken respetom iti bagim no iyun-unam nga ayaten ti sabsabali ngem iti bagim?

 Saan, ta naparsuatayo iti ladawan ti Dios, a ti kangrunaan a kualidadna ket ti di managimbubukodan nga ayat. (Genesis 1:27; 1 Juan 4:8) Kayatna a sawen a naparsuatayo a mangipakita iti ayat iti sabsabali. Adda lugar ti panagayat iti bagi, ngem naragragsaktayo no ti Dios ti kangrunaan nga ayatentayo ken agpokustayo a mangaramid iti naimbag iti sabsabali. Kas ibagbaga ti Biblia, “ad-adu ti kinaragsak iti panangted ngem iti panangawat.”​—Aramid 20:35.

 Adu ita ti mangibagbaga a naragsakda no iyun-unada ti bagida. Napatpateg kadakuada ti panagayat iti bagi ngem iti padada a tao. Ngem ipakita dagiti kapadasan ita a nasalsalun-at ken naragragsak dagidiay mangsursurot iti nainsiriban a balakad ti Biblia: “Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.”​—1 Corinto 10:24.