Ni Maria Magdalena ket matalek a pasurot ni Jesu-Kristo. Ti naganna a Maria Magdalena ket posible a naggapu iti ili ti Magdala (mabalin a Magadan) nga asideg iti Baybay ti Galilea. Posible a nagyan idi sadiay ni Maria.

 Maysa ni Maria Magdalena kadagiti sumagmamano a babbai a nakikadua ken Jesus ken kadagiti adalanna ken nangipaay kadagiti kasapulanda. (Lucas 8:1-3) Nasaksianna ti pannakapapatay ni Jesus ken maysa isuna kadagiti immuna a nakakita kenkuana idi napagungar.—Marcos 15:40; Juan 20:11-18.

•  Balangkantis kadi ni Maria Magdalena?

•  Ni kadi Maria Magdalena ket “apostol dagiti apostol”?

•  Asawa kadi ni Jesus ni Maria Magdalena?

•  Mano a Maria ti nadakamat iti Biblia?

 Saan nga ibaga ti Biblia a balangkantis idi ni Maria Magdalena. Ti laeng ibaga ti Biblia maipapan kenkuana sakbay a nagbalin nga adalan ket pinaruar ni Jesus ti pito a demonio a limmugan kenkuana.—Lucas 8:2.

 Naggapuan ngarud ti ideya a maysa idi a balangkantis? Ginasgasut a tawen kalpasan ti ipapatayna, impapan dagiti tattao nga isu ti saan a nainaganan a babai (mabalin a maysa a balangkantis) a nangbuggo iti saka ni Jesus kadagiti luana ken pinunasanna kadagiti buokna. (Lucas 7:36-38) Ngem awan ti mabasa iti Biblia a mangpaneknek iti dayta.

 Saan. Awagan ti Iglesia Katolika ni Maria kas “Santa Maria Magdalena” ken “apostol dagiti apostol” gapu ta isu ti immuna a nangipadamag kadagiti apostol a nagungaren ni Jesus. (Juan 20:18) Ngem saan a nagbalin nga apostol gapu iti dayta. Awan ti ibaga ti Kasuratan a naawagan iti apostol.—Lucas 6:12-16.

 Nakompleto ti Biblia idi dandani agpatingga ti umuna a siglo C.E. Ngem ginasgasut a tawen kalpasanna, nagdesision dagiti opisial ti simbaan a pagbalinenda ni Maria kas Santo. Kadagiti sursurat manipud idi maikadua ken maikatlo a siglo—a saan a paset ti Biblia—nadakamat a nagimon ken Maria ti dadduma nga apostol ni Jesus. Naim-imbento laeng dagita nga estoria ken saan a naibatay iti Biblia.

 Saan. Kinapudnona, nalawag nga ibaga ti Biblia a nagtalinaed nga awanan asawa ni Jesus. a